نصائح القيادة في الرياض...

نصائح للقيادة في الرياض
أولا يا أخ العرب ..
تدق إشارة يمين وإلا يسار يعني تكشف نفسك ، لا تعطيهم فرصة يعرفون وينك رايح ، والا وين تبي ... حسب خبرتي ، إذا أنا دقيت إشارة محد سمحلي ، الدنيا عبط يا حبيبي

مكتوب في كتاب دلة إنك تترك مسافة بينك وبين اللي قدامك تحسبا لأي خطر مفاجئ ، لا يهمونك ، الخطر والله إذا تركت مسافة وجا واحد يبي يدخل بينك وبين السيارة اللي قدامك

خللك انسيابي ، هذا سر "المهنة" يعني رح يمين يسار وتنقل بين الخطوط في الشارع ، هذا يعطيك مساحة تتحرك فيها بسهولة ، وتسهل حركة الثانين

إذا ولعت حمرا ولا أمداك ، حط رجلك ترى إذا صرت صتيمه وهدّيت خطر تكمخ أو تنكمخ

لا تحارش السيارات الخجمة (= قديمة = خشلة = كبيرة الحجم على غير سنع) هذولا إن صدموك ما عندهم دراهم ، وإن صدمت أحد منهم ، ما لقيت له قطع غيار

الرقم اللي تشوفه في لوحة مدورة في الطرق السريعة هذا مهوب السرعة القصوى ، هذا السرعة المقترحة ، وهو مجرد اقتراح ، تبي تاخذ فيه كيفك ، ما تبي بكيفك بعد

الرياض كلها طرق مختصرة للي يفهمون والخبراء ، لا تصير حبّيب وطيب وتمشي مع الشوارع الكبيرة كلها زحمات ومهاوش
ازرق مع شوارع صغيرة ولفلف وما جاك علي

هاللي يأشرون لك على الطريق يبون فزعة لا تعطيهم وجه ، أصلا ما يتعطل الا الضعوف اللي سياراتهم قرنبع يعني ما منهم نفع ولا فود ، سلم عليه وعدي .. والله يعطيه

سيارات الجيب هذي مصنوعة للمهاترات والمناكفات وكل واحد شرى جيب ترى سيارته اللي قبل صغيرة وشاري الجيب عشان ينتقم ، دير بالك منهم ولا تحارشهم تراهم والمين

السواقة في الرياض متعة للي يشعر بملل ويدور وناسة ، إذا ضاق صدرك يوم اطلع على الدائري وخل بينك وبين سيارتك تحدي على انك تطق الطبلون ، ياهي وناسه ، كنك في الملاهي ، والأونس العالم اللي يتنطلون يمين وشمال ياهووووووووووووووووو FUNNNN

في الرياض لازم تضرب بوري إذا ولعت خضرا ، بيب والا طاط ، والا ترى اللي قدامك ما يمشي ، حنا تربينا كذا ، وتأكيد لكلامي ، انتبه لواحد واقف لحاله عند إشاره ، تلقاها تخضر وتحمر وهو ما جاب خبرها

حمرا وقف ، صفرا تزهّب ، بس خضرا مهوب معناها امش ، معناها ، اذا ما فيه احد فيمكن تمشي ، العالم هذي مستعجله ، والحمرا لغيرهم مهيب لهم ، الين بغيت تمشي تلفت يمين يسار بعدين امش

هدف كل واحد يسوق في الرياض انه يصير الأول ، في الإشارة ، والا في المسار ، وانه يوصل لمكانه بأسرع وقت ممكن ، ولهالغاية ، ما تهم الوسيلة

اللي يسوقون صح في الرياض من المخضرمين ، ممكن يقرا جريده وهو ماشي ، والا يجيب شي من الشنطه وهو يسوق ، ويقدر يفتح الباب ويشيك الكفرات والسيارة تمشي ، لا تستغرب عادي يا بابا ، واللي مهوب قد السواقه لا يسوق

مطر ، والا عج ، والا ظلما ، هذي من الله ، إنت مالك دخل وخللك طبيعي ، وترى هذا غرض اللي يسوقون صح ، وهنا نعرف الحرّيف من الغشيم ، وتقدر وقتها بعد تختبر كفراتك ، ونور سيارتك ، ونظرك بعد

البنزين غالي ، وكل ما سقت بسرعه نقص استهلاكك ، لو تمشي 200 للخرج ما نقص من التانكي الا لترين ، من قال ان السرعه ما تفيد؟

ما فيه شي اسمه سايد واحد ، والا ون وي عندنا ، العالم ما تعترف بهالخرابيط ، اذا شفت نور قدامك تراه في خطك ، لا تحط رجل على رجل وتأمن