السلام عليكم و الرحمة و البركة
في بداية الصيفية أنخرطت مع أصدقائي في المقاومات لأنها على قول السائقين متعة لا يضاهيها أي شيء.
في بداية يوم جديد حيث كانت الساعة 5:30 فجرا , كانت مجموعة مكونة من : لومينا أس أس و كابريس أس أس يتقاومون عند التميمي اللي قدام دوار الكتاب عند جامعة الملك سعود , المهم بدينا من الساعة 4 وأستمرينا , طبعا في اللومينا شخص واحد وهو السائق أما الكابرس فكنا 3 أشخاص أنا الراكب الأمامي موقعي , فجأة دخّل معنا شخص عرفته من سيارته و لوحته أنه أمير في حارتنا طبعا بالسيارات نعرف بعض لأننا في حارة وحدة و هي المحمدية الشرقية , المهم كان معه رانج روفر سبورت 2006 , الرجال ما أكل عيش معانا بطبيعة الحال بسبب ثقل وزن سيارته , المهم قال لنا لا تتحركون 10 دقايق و راجع , و بالفعل 10 راح جاب مرسديس أس أل 55 برابوس 580 حصان , و الله صرنا حنا اللي ما ناكل معه عيش , المهم رابع قومة معاه ماكانت في البال ولا في الخاطر , مع البوري الثالث فزينا كلنا و صار هو الاول و الأسف كان تحته مويه كثيرة مما أدى الى انزلاق الكفرتين الخلفيتين بأتجاه اللومينا و اللومينا اتجه بدوره ايضا صرنا كلنا متجهين الى الرصيف والشجر, كل واحد أخذ نخلة و شجرة غير ركوبة الرصيف العالي , اللومينا على طول شبت سيارته نار من الماكينة والمسكين رجله تعلقت في الباب لا قدر ينزل ولا يتحرك , الحمدلله كان فيه عمال و بياعين الفول والبقالات اخذوا طفاية حريق من سيارة الأمير وطفوا فيها اللومينا ما احد مننا قدر يتحرك , أخطر اصابة حصلت من بين الركاب والسائقين هو الراكب الخلفي في سيارتنا الكابرس كان يصور وما درى بنفسه الا و هو تحت مرتبتي رقبته انكسرت و جاه نزيف في المخ و حالته صعبة مرررررررة , أما الباقين كسور , و أنا في المرتبة الثانية من حيث قوة الأصابة حيث صار لي كسر مضاعف في رجلي يعني 11 سم من الفخذ الأيسر فقدت و تهشمت , أما الباقين اللي في يده واللي أنكسر خاطرة على سيارتة :D .
كلنا نقلونا الى مستشفى الملك خالد الجامعي الا الأمير راح مستشفى الملك فيصل التخصصي (( شوفوا الواسطة كيف ))
طبعا هو المتسبب الرئيسي بالحادث لنا جميعا لكن انا ما فيني حيل ولا قوة لكن اذا صرت بخير ان شاء الله رح أجمع أخوياي كلهم و نروح ونتفاهم على أشياء كثيرة :mad:
أنا من تاريخ 1\4 سويت العملية عبارة عن حدايد تطول النقص المفقود , وألحين لي 4 شهور 2 شهرين في البيت و شهرين في المستشفى و باقي الله العالم كم لكنها رح تطول .
أنا لي شهرين ما طلعت من البيت الى للمستشفى اما مكان ثاني ولا كنت أحلم بسبب الحديد الثقيل هو داخل الرجل وفي الخارج ايضا و شكله كبير و مخيف بسبب كذا ما اقدر أطلع اي مكان بالعربي ( أنا الوحيد في العالم اللي ما أستمتعت في الاجازة وايضا الوحيد اللي ما أستفاد من مكرمة أبو متعب في تخفيض البنزين ))
الحمدلله على كل شي , صحيح اني بعكازتين أمشي وأروح المستشفى كل يومين لتغير الشاش و للعلاج الطبيعي , لكن مرتاح نفسيا , و سمعت أن الأمير أبوه عوضه ب مورسيلاجو رودستر لسلامته و تعافيه من كسر الحوض اللي جاه .
والله يعوضنا بخير احنا بعد |3|
أنا حرّمت أركب مع واحد يتقاوم أو حتى يسرع بعد , ما أبغى أقضّي عمري كله على السرير الأبيض .
نصيحة أخويه يا شباب , خذوها من واحد ذاق الأمرين أتركوا الشباب المتهور , و أتركوا المقاومات لأن فيه خراب بيوت و خراب سيارات , واذا ما أخذت بنصيحتي و مصّر أنك تقاوم , قاوم لحالك ولا تاخذ معك أحد تحمل نفس معك وهي في رقبتك الى يوم القيامة .
نشوفكم على خير وأنتم بصحة و عافية و قيادة سليمة
سلالالالالالالالالالالالالالالالالالام
بو العابد 
