محتار جداً في شراء يوكون أو لاند كروزر أو باترول 2007

مجنون باترول متأكد من هذا الكلام ؟

سألت موظف الكونتر في الوكالة قال ما فيه حساسات !!

وبحكم أنك مجنون باترول ( باسم الله عليك :) ) ممكن تسرد لي مميزات الباترول المهمة ؟

مثلاً هل هو مكيفين وثلاجة والا لا ؟

يعطيك الف عافية :)

السوبر سفاري 2007 يجي حساسات وبلوتوث وكالة من اليابان مو ابو جميل مركبة بالصين

الله يديمكم ذخر ، والله عاجز عن الشكر ، بيض الله الوجيه الطيبة وما قصرتوا ..

وش رايك تفكر في الباجيرو الجديد

توه نازل .. الأكثر تطور في نظام الدفع الرباعي .. يعني هو ملك الصحراء الحقيقي ورايلي دكار شاهد

مريح اكثر من اي جيب اخر وافخم ياباني وكد ومد واجمل في الشكل

رح شفه ومنتب خاسر شي .. بعده الباترول ونس الباقي

أنا انصحك بطويل العمر [COLOR=red]باتروووول وبس [/COLOR]

آمين يارب العالمين


وفيه شيء ما جاوبت عنه أجابة كاملة معليش



النظام الدفرنشر الي تكلمت عنه موجود في الدفرنس الخلفي فقط.

عموما أنا بعد قد سمعت أن ناس تقول ان البرادو مو راسي كثير وأنا منب متأكد من المعلومة مع أني مستغرب أني أظن أنه فيه نظام زي الدفع الرباعي المستمر وهذا يخليه راسي بس أقطع الشك باليقين وجرب السيارة أحسن شيء

هو يعيبه بنسبة لي شيء واحد أن زاوية الميلان له قليلة والسبب بس عرضه القليل مقارنتا بطول السقف وأرتفاعه

بس يضل بنسبة لي سيارة رائعة |1|

أخوك أبـــوأســـد|3|

على فكرة مشكور يا أبو أسد على الرابط الله لا يحرمنا والديكم الجنة ويرحم موتاهم ويحفظ حيهم ويجعلهم لنا ذخر وعز ..

العزيز أبو أسد والعزيز صالح

حقيقة عاجز عن الشكر ، والبرادو خيار جديد وممتاز ، ويستحق التفكير والتأمل ، ورايح بكرى للوكالة آخذ عنه فكرة مفصلة ، مع أني سمعت أنهم ما مدحوه من حيث رساوته على الخط ، لكن ما بعد شورك حسوفة ..

السلام عليكم

العفو وماقمنا الا بالواجب

وانا مع ابو اسد في اضافة البرادو في القائمة

أخوي العزيز أبـو عبد العزيز

اليوكون مافيه دفلوك فيه نظام مشابه له ويسمى الدفرنشر زي عمل الدفلك بس هو مخصص لمنع الأنزلاق وتقدر تقول يعمل نفس عمل الدفلوك بس بشكل ألكتروني

أخوي العزيز عندي لك شور ثاني يمكن وش رايك تشتري لك VX أن شاء الله راح يعجبك

هذا برادو 6 سلندر فل كامل بقيمة لا تتعدى 143 ألف على ما أذكر أو حولها

له ميزات كثيرة وعندي بصراحة أفضل من تفكر تشتري لك GXR

طبعا خذ خليجي يجي تنكيين الأول سعته 87 لتر والأحتياطي 90 لتر لو تجمعها يصير 177 لتر وهذا على كلام المندوب تعبيه على أخر الشهر :D
يجي الفل كامل بدفلك وشاشات معلومات رحلات وفيه تحكم بمساعدات وهيدروليك ومثبت وثلاجة ووووو يعني بصراحة موتر ممتاز جدا بالمواصفات وأشياء كثيرة

هذا أذا بغيت شيء عائلي

أما أن كنت تبي شبابي فعندك تويوتا أف جي كروزر بينزل قريب بالضبط ما أدري بس يمكن يبيله أقل شيء 4 أشهر أن كنت تبي تنتظر.

وتراه يعتمد عليه في البر وفي المدينة وقوي جدا ونشيط |1|

وباقي الدراهم الي تفكر تشتري بها أن كنت بتشتري كاش

أنصحك تشوف هذا الرابط وتناظر كلام CamSHAFT بصراحة عجبني والدال على الخير كفاعلة :)

http://www.assayyarat.com/forums/showthread.php?t=96620

وأي شيء ثاني بالخدمة أن شاء الله

أخوك أبـــوأســــد|3|

الإخوة جميعاً شكراً لكم ، وبصراحة عاجز عن الشكر الله لا يحرمنا خيركم ، وفعلاً حسيت أني استفدت أكثر والصورة بدأت تكون أوضح الآن ..

الأخ / الخيال : شور قيم ومشكور وما قصرت ..

الأخ / أبو أسد مشكور جداً جداً على التفاصيل ، ولو أنك حيرتني ثانية :) بصراحة أنت ما قلت شي غلط ، الباترول خذ رجال في البر والطرقي والمقناص والدهنا ، بس في الديرة والراحة والفخامة وتعدد المميزات ما عندك أحد ، واليوكن على العكس ، خذ فخامة وتشخيص بالإضافة إلى القوة والعزم ، بس مطراق البر والتكسير يتعفل بسرعة ، يتفكك ويهرهر هواء والله يبعد عنك الشر بس ، بقي الأستاذ لاند كروزر بجميع فئاته ، فخامة وراحة وقوة ونشاط ويصبر ويتحمل ، صح فيه بعض العيوب بس ما تقارن بمميزاته ، وعلى قولتك عيبه الثقل والـ vxr الخيار الأفضل ، بس ما تلاحظ أنه غالي حبتين شوي $$$ لكن في نظري يبقى اللاند هو الأفضل من حيث جمعه لأكثر المميزات وتضاؤل عيبوبه عندها ، لكن السؤال : الدفلوك في اليوكن على الكفرات الأربع أو الخلفية بس ؟ أرجو منك الاجابة . ومشكور يا غالي وما قصرت .

الأخ / az5z : مشكور على المشاركة ، بس وش يضمن لي أني أطيح في جرف أو أطامر غصب :)

الأخ / salehhd : مشكور وما قصرت ، بس ما تلاحظ أن الباترول ميح في المميزات ، أنا بصراحة أقدر العزوم والقوة في البر وتسوى عندي شي واجد ، بس قهر والله تحط فيه 166 الف وجيوب أقل سعر منه بكثير تنافسك في مميزاته ، تخيل حتى الحساسات ما حطوها فيه !!

مشكورين جميعاً وما قصرتوا والله لا يحرمنا منكم ..

السلام عليكم

رايي من راي اغلب الشباب السوبر سفاري ، سيارة قوية ومعروفة في البر وما تحتاج صيانة كثير والتفكك قل في الموديلات الجديدة وارخصهم سعر ويكفي اسمة ملك الصحراء

وانصحك بالاستخارة فما خاب من استخار

بالتوفيق

أخوي انا من رايي أنك تاخذ يوكن دينالي اوتاهو LTZ
وبالنسبة لوجهية اليوكن أنها طايحة هذا مايضر في البر الا لا بديت تطامر وطحت على الوجهية <<< تروح ورق
لهذا اذا اخذت يوكون ادخل فيها البر بس لا تتطامر فيها يعني لا تخربها
وبعدين اليوكن والتاهو افخم واريح واحسن من الاند والباترول

والبتوفيق ,,

والله شوف أخوي أنا مثل ما شفت المقارنة من أسم الموضوع بصراحة تحيرت

بس يوم دخلت خلصت المقارنة عندي على طول :D

أنا على بالي المقارنة بأنها بتكون يوكون أو لاند كروزر أو باترول 2007

بس طلعت قلت يوكون دينالي ولاندكروزر GXR وباترول سوبر سفاري

بصراحة شوف أن كنت تبي سيارة مخصصة للبر وتتحمل أشور عليك الباترول 4800 وأهم شيء فيه دفلك

أما أن كنت مثلي يعرف يتحكم بأي موتر بالبر فخياري الأول والأخير هو الدينالي بلا منازل والسبب هو

أقواهم وأعتقد لو كان بدون دبل صدقني بروح أضحك على الي معه GXR لأنه ثقيل بالرمل.

ويكفيني أنه أعلى فئة في اليوكون وهو أكبر محرك بينهم وناقلات الحركة هي 6 سرعات يعني قمة ونظام الدفع فيه رباعي مستمر على كلام الوكالة أنه يثقل نظام الدفع في البر وهو أيضا يخليه أكثر سيارة راسية بين اللاندكروزر والباترول.

بس شوف ترى الجمس من تجربة صعب جدا في البر والسبب بس أنه ثقيل جدا ومو مخصص كثير للرمل بس قوته العالية تخليه يتجاوز مثل هذي الأشياء |1|

أن كنت تبي مقناص وتوغل وتدخل جوى البر 180 كيلو وبتخيم وبتروح يمين ويسار في وسط البر وزي كذا

خياري بيكون سوبرسفاري ما أكذب عليك أني قابلت ناس أمتلكو الباترول وأجتمعو على شيء واحد وهو أن الباترول يتفكك بسرعة بس أمتدحوه لي وخصوصا واحد مجرب اللاندكروزر VXR وباترول 4800 يقول أن الباترول في الطين والتغاريز والأماكن الصعبة الأكثر قوة وتحمل هو الباترول والسبب أن قير الدبل حقه كبير جدا بعكس اللاندكروزر ولا تنس أن الباترول دفرنسين مو دفرنس وعكوس أمامية.

ومعلومة أخيرة أعطيكياها على بلاطة ما أحب أفكر باللاندكروزر إلا أذا كان VXR لأن بتجربتي أنه ثقيل بالشارع بالمرة كيف أجل بـ GXR بتمل منه بسرعة

أخوك أبـــــوأســــــد|3|

في نظري الدينالي خيار استراتيجي

شكل جديد سوف يستمر على الأقل 7 سنوات جديد

قوة في القير والماكينه لا ينافسه فيها أحد

راحه لا تنافسه فيها السيارات المذكوره

رائع جداً في البر مع دعم رباعي مستمر وقوة هائلة من الماكينة

مواصفات لا ينافسه فيها السيارات المذكوره

والرأي الأول والأخير لك

يكفي أنه جمس ( للقوة هيبتها )

الإخوة الأعزاء : S E N I O R / KSA_MATRIX / MYNAAME / OMAR

شكراً لكم فرداً فرداً على كريم التجاوب وحسن الاهتمام ..

الأخ / S E N I O R : رأي في غاية الدقة ، لكن أخوك ما يفوت البر حتى في الصيف :) بس طبعاً ليلاً لا تقول وش ذا المهبول ، ولعلك تتفق معي أن السيارة إذا مشت في البر معك صح في الدهناء والصمان وغيرهم حتى لو شهر هنتك في حياتك كلها :) تحياتي وتقديري لك .

الأخ / KSA_MATRIX : كلامك عين الصواب ، فئات اللاند كروزر فخامة وراحة ومكدة ، بس العيب الشديد فيه وأنا أخوك أنه راح يتغير السنة الجاية ، يعني قهر 160 الف ريال تحطها فيه ثم يتغير بكرى ، بس لا تقول لي انتظر لأني بصراحة مليت :)

الأخ / MYNAAME : الله يريح بالي وبالك ، بس أنت ما شاء الله عليك بتصبر ، لكن واحد مل وش يزين ، عموماً خيار التاهو ( مش بطال ) لكن ما فرقه عن اليوكون ؟ وكم سعره ؟

الأخ / OMAR : مشكور على التفصيل والإفادة ، وحقيقة اليومين هذي مايل كثير لهذا الاختيار ، ورايك سديد ومهم والله يعطيك العافية .

مشكورين جميعاً ، وإذا كان فيه فايدة لا تبخلون علينا :)