السلام عليكم
يسعد صباحكم ...
اخبار الشباب ؟؟
ندخل بالموضوع .. لي بالمنتدى هذا من 2002 الى الحين وكل هالسنين نسمع وانفجرت روسنا من سالفه ولا انتهت حتى الحين اللي هي السيارات الكوريه
صح انا معي سوناتا واحب هالسياره بس كلامي ما يمنع اننا نصلح اخطائنا
بالمنتدى لازم نسمع وحده من الثنتين
يا متعصب للكوري
يا دينه ودين الكوري
والمشكله بدون اي دليل ولا صور ولا شي
يا شباب خلوكم واقعيين
ترا الادله والمواقع والشهادات والدروع للسيارات الكوريه كلها هيونداي الامريكي
وتكون مصممه للسوق الامريكي
اذا زينه عندهم حنا مالنا دخل لأن معروف ما يجينا الا الشين
(ألا اذا واحد مسوي بطره بيطلب سونات طلبيه بـ 90 ألف؟؟؟)
انا بقول الحق وبصراحه
قبل ما اشتري سوناتا كنت بأخذ كامري
قارنت السوناتا مع الكامري
كانت السوناتا فل والكامري xli مطور
كلهن موديل 2004
السوناتا بـ 52.000
الكامري بـ 65.000
الفرق 13.000 ريال
قلت والله حرام حط الزايد بالجيب وخذ سوناتا
للأسف عندي فواتير تصليح بالوكاله بسبب خربات السوناتا تعدت ألحين 21.000 ريال
ومن زين حظي الغبي ان ما طلعت الخرابات الا بعد ما انتهى الضمان
لو اجمعها اطلع كامري فل مو ستاندر
يعني على قولت (يبي يكحلها عماها)
وعلى طاري الكامري مره اخذتها حقت الوالد وصار لي حادث فيها طيرت ام الشنطه وتصلحت بالوكاله مع صبغ القطع فرن وكل شي طلع 4800 ريال
والسوناتا طق كفر ورقيت مثلث والبدي ما صارله مخش بس صلحت السياره بـ 6400 ريال
تقولون قير مكينه ؟؟ لا .... العكوس لحالها بـ 3450 ريال
بالله عمركم سمعتو العكوس قطع استهلاكيه ؟؟
والحين لو نجمع اللي دفعته يطلع 73.000 ريال
والسياره لو ابيعها ما تجيب 20.000 ريال
يعني حوالي الخمسين ألف راحت هباءا منثورا:mad: :mad:
بهذي القصه اللي حصلتلي مو من حقي اكره الكوري ؟؟؟
هل تتوقعون اني باخذ كوري مره ثانيه ؟؟؟
مهما تطور حتى لو تعدى الالماني
صارت مثل العقده النفسيه (كوري كوري كوري لااااااااااا):eek: :eek:
انا اللي بغيته تقولون ليه تحبونه ولا ليه تكرهونه بسبب مو بالكلام وبس
واللي يقول مواصفات عاليه ورخيصه .... بقول يا صاحبي بتتندم وتدفع سعر موترك مرتين |4| |4|
والكلام هذا مو تعصب (لا تنسون عندي كوري) بس مجرد راي واتمنى يكون حل
