السلام عليكم ورحمة الله وبركاته
:D بإختصار هذا ماحصل معي
يوم السبت قبل اسبوعين رحت لمدرسة تعليم القيادة لاستخراج رخصة , طبعاً سار كل شي بشكل طبيعي محاضرة اختبار كمبيوتر اختبار ميداني وملفاتي خلصت في نفس اليوم .
راجعت شباك المرور بعد الصلاة لاصدار الرخصة , انتظرت ونادى بأسمي قال فلان الفلاني .
أنا : سم
هو : أسمك ماتترجم في الاحوال (احوالي القديمه)
أنا : كيييف !!؟
هو : يعني ماكتب بالانقليزي في الاحوال
أنا : طيب وش المشكلة ؟!
هو : الرخصة الجديدة يكتب فيها بالانقليزي
أنا : طيب وش الحل ؟
هو : راجع الاحوال .
أنا : ماشي يعطيك العافية
دخلت على الضابط ودار الحوار التالي
أنا : السلام عليكم
هو : وعليكم السلام , سم
أنا : هذا اللي صار معي وش الحل ؟
هو : والله هذي عشر ملفات عندي فيها نفس المشكلة .
أنا : وش الدبره طيب ؟
هو : بقدم لك بلاغ تغيير اسم وراجعنا الاثنين
أنا : اوكيشن
يوم الأثنين :
دخلت على الضابط
أنا : سلام عليكم , وش صار على معاملتنا
هو : هات ملفك اجرب
هو : يطقطق على الكمبيوتر
هو : ماتترجم للأسف
أنا : يالييييل وش الحل طيب
هو : مالك الا تطلع جواز او تروح الاحوال يجددون لك .
أنا : يعطيك العافية ماشي ماشي .
رحت بعدها بيوم للمجمعة علشان سالفة الأسم الانقليزي (مصدره في المجمعة)
وفي مبنى الاحوال ومع واحد من الضباط
أنا : سلام عليكم , ابي اترجم أسمي .
هو : ابك شلون ؟
أنا : السالفة كذا كذا .
هو : ههاهاهاا , ابك زين عندنا ناس يكتبون عربي علشان تبيني نكتب انقليزي
أنا : باللهي ؟ , واطلع من عندهم وأخلص كم شغلة في المجمعة .
رجعت الرياض وتذكرت سالفة الجواز
جهزت ملفاتي صورت وخلصت اموري ومشيت الجوازات
أختصاراً ... دار التالي :
الضابط : بطاقتك قديم يالطيب
انا : وش المشكلة ؟
الضابط : لازم بطاقة جديدة علشان الجواز
انا : |10||10||10|
انا : يبن الحلال ما ابي الجواز علشان اسافر حدي الشرقيه ان خربتها يخوي ابلشتونا الله ياخذكم انتم ورخصتكم . < ترا قلتها في نفسي
الضابط : هااه وش تقول
انا : ابد سلامتك
الضابط : زين زين بروح
اليوم اللي بعده أتوجه إلى مبنى الاحوال في الرياض
زبدة الكلام أنهم قالوى رح طلعها من المجمعة يالحبيب .
أنا : ولعن ولعنتين وثلاث لعنات توني جاي من المجمعة قالولي مانكتب انقليزي ياخي .:mad:
بعد يومين مشيت المجمعة بغية تجديد هالاحوال الله لايعيدها من الرخصه اللي مرمطتني هالمرمطه .
احوال المجمعة ازحم من الاحوال الرياض , كل شي صار بشكل عادي واستلم بطاقتي بعد رفعة ضغط ولطعات وغثا .
وارجع الرياض .
اليوم اللي بعده وبعد صلاة الظهر في الرياض اراجع المرور لعل وعسى .
أنا : طلعت بطاقة جديده شف باللهي ترجمت ولا لأ
الضابط : طقطق على الكمبيوتر , لا ماتترجمت .
أنا : زين سلام عليكم
اليوم الثاني رحت الجوازات خلصت اموري الحمد لله .
اليوم اللي بعده راجعت الجوازات واستلمت جوازي .
نفس اليوم راجعت المرور , :D اول ماشافني الضابط قال هات ملفك اخلصك اول واحد << صرت واسطة من كثر ما اجيهم .
نص ساعة ويسلمني هالرخصة |4| قال ياولد اليوم معزوم على ذبيحة بهالمناسبة < والله انهم ذيبان حسوا بمعاناتي .
|6| غلفت البطاقة وحطيت عليها برواز وعلقتها في الغرفة وصورت جنبها
