السلام عليكم
ناوي بإذن الله أبيع اللومينا حقتي لأن شياطين الإنس - الله لا يبارك فيهم - لثالث مرة يكسرون القزاز و يسرقون الاستبنة .. و القهر إن الواحد ما بيده يسوي شي :o مثل اللي نصفق كف في الظلام و لا يدري من اللي صفقه ثم يجيه بعدين و يصفقه مرة ثانية و ثالثة و هو مفهي |10|
المهم رجعت لفكرتي الأولة يوم جيت أبي أشتري سيارة قبل أربع اشهر و هي إني اشتري جيب ..
شفت البرادو أربع سلندر قير أوتوماتيك و مواصفات جيدة بـ 102 ألف ريال .. لكن مو مقتنع بجيب بمكينة أربع سلندر ..
فقلت ما لي إلا أفكر في الإندونيسي الفورتيونر .. و الفورتيونر ست سلندر قير أوتوماتيك بـ 102 ألف ريال و الفل كامل بـ 109 ألف ريال ..
فايش رايكم في السيارة ؟
هل هي فعلا " تويوتا " حسب و نسب ؟ :)
اشلون عزل الصوت فيها ؟ هل هو مثل الكامري و لا أحسن ؟
السيارة نزلت من عام 2007 م .. يعني لها تقريبا سنة و نصف .. فـ... ايش عيوبها ؟
و هل آخذ الفل كامل ؟
هل تفكيري كله صحيح ؟! من بيعة اللومينا إلا اختيار الفورتوينر ؟!
و شكرا مقدما ..
أنا أشوفه من أفضل الخيارات ... مريح في الركوب جداً، محرك جبار، قدرات رائعة في الرمال، عائلي يشيل سبع ركاب. لكن صحيح ليس فيه فخامة ولا يوجد فتحات تكييف في الصف الثاني، وبدلاً منه يوجد في الصف الثالث. المكينة والقير نفس إللي في البرادو تماماً مع خمس تغييرات، دفع رباعي مستمر. أنا معي واحد من زمان وجداً مرتاح معه. والسيارة بالمناسبة نزلت في 2005 كموديل لـ 2006، وليس 2007 كما ذكرت. أنا شريت سيارتي في أواخر 2005.
أخوي أبو بدر الفورتشنر قوي ويعجبك إلا نزلت من الزفلت لكن بتشكي من صرف البنزين والتنسيم (أحياناً تكول كنك منسم للقزازة) خصوصاً أيام الهبوب ..
صداماته لينه بشكل رهيب بحيث انه مع أول مطب جامد بتلقاه اختل مكانه (خصوصاً من ناحية اتصاله مع الرفرف)..
ما أنسى أقولك إن ما به مكيف للصف الوسط من المقاعد (المكيف للصف الأخير مع الشنطة)
هذا اللي أذكره وإن شاء الله ما أكون نسيت شيء ولا بالغت في الوصف وكل اللي قلت لك من واقع تجربة
تحياتي.
صرف البنزين؟ بالعكس أفضل سيارة في فئتها في صرف البنزين. عيبه أن خزان البنزين صغير جداً، ربما هذا الذي تقصده، سعته 65 لتر فقط. يمشي في السفر 450 كيلو، وداخل المدينة 400 كيلو.
صدماته لينة؟ تقصد أن تعليقه لين؟ تعليقه ليس لين جداً، متوسط، بحيث يحافظ على راحة الركوب وفي نفس الوقت يتحمل الاصطدام في المطبات. وهذا من تجربتي الشخصية. وتعليقه أفضل بمراحل من السيارات الأمريكية، التي فعلاً توصف باللينة.
وعزلها للهواء ممتاز جداً، وأختلف مع الذي يقول أن هناك تنسيم. لا يوجد تنسيم أبداً في السيارات الفورتشنر التي جربتها، بما فيها سيارتي.
