حل مشكلة الخشخشه والصرقعه والتفتفه وبعض التسخين وعزم سيارات فورد كراون فكتوريا 99

الله يجزاك خير ويوفقك

جعلك تسلم والله مثلك عارف دوام يهد الحيل وتعبت وانا ادور كمبيوتر سعودي ل93 وماحصلت اللي احصله من 96 وطالع انا معي حق بوليسي سعودي بس ل96 اخاف اركبه ويلعب بالقير عندي ويخبط لان قير ال96 يختلف وان شاء الله احصل واحد راح اركبه واجربه وان نجحت راح افيدكم باذن الله باقرب وقت وبالتوفيق ..........

مشكور اخوى على ردك
اذا الكمبيوتر بهالقيمه اعتبره بلاش اهم شي تروح هالمشكله
ننتظر تجربتك و الله يوفقك

هلابك اخوي من 98 لوتركب بلف كابرس الحرارة راح تبقى ع النص على مااعتقد يوجد بلف بثلاجه المكينه غير البلف العادي لاني جربته على 98 مانزلت الحرارة نفسها ع النص بعكس موديلات 97 وتحت اذا ركبت بلف كابرس تبقى ع الربع او الثلث وتوصل النص ع حسب الجو واذا شلت البلف ماراح تخبط المكينه بس يحصل لخبطه بالهواء وصرفيه بنزين وغيره من اضرار لاحصر لها وماانصح بإلغائه من ناحية البلف انساه مايجدي نفع من 98 وطالع لكن المشكله مومن الحرارة المشكله من الكمبيوتر مايقدم الشرارة كلما زادة الحرارة زاد الاحتراق الداخلي الامريكي برمج ع الاجواء البارده يعني يتأخر بالشرارة بعكس السعودي صمم كمبيوتره او برمج ع التقديم للتأكيد اسأل اي شخص معاه فورد سعودي اذا عنده فرقعه او لا الجواب لا رغم نفس المحركات اللهم الكمبيوتر مبرمج مواصفات خليجيه واشياء ميكانيكيه اخرى واسعار الكمبيوتر من 2002 وتحت على 150 الى 200 ريال هذا على سومتي له قبل 7 شهور بالتشاليح وبالتوفيق ............

مشكور على الرد بس ابي اوضح لك شي انا اللى اعرفه انه المكينه تخبط اذا شلت البلف نهائيا
وانا ماابي اشيله انا ابي اغيره ببلف يسمح للحراره على الاقل توصل تحت النص فقط

طبعا سيارتى 99 استخدام امريكي كل شي عندى ولله الحمد تمام وانا بنفسي اصينها

بس هالمشكله مالقيت حل لها الى اللحين وامس رحت لواحد عنده ورشه وعنده كمبيوتر برمجه وهو احسبه انشاء الله صادق قال لي انا برمجت سيارات كثير وراحت فتره ورجعت هالمشكله واخر واحد برمج سيارته كان موديلها 2004 قبل مايبرمجها غير كل شي بقيمه تقريبا 3000 ريال من حساسات من كويلات وبواجى وفلاتر ........الخ ومانفع معه البرمجه . ويقول تبينى ابرمجها لك اللحين عادي بس ماابي اخسرك لانه مااينفع راح ترجع هالمشكله

وانا معك انه اذا الحل بتغيير الكمبيوتر بس ان شاء الله يحل المشكله؟؟؟؟؟ بس الكبيوتر بكم سعره ؟ واذا تبي نصيحتى قبل ماتشريه اشرط عليه تجربه اول واذا فيه اى مشاكل ترجعه

هلابك اخوي انا مركب بلف كابرس الليل الحرارة الحمدلله ع الربع الثلث والفورد لازم يوصل النص الظاهر لوماوصل النص بتخبط مكينته من القهر؟؟؟؟؟؟؟؟؟ لكن الجو عندنا مااقول الا يالله النجاة من النار توصل درجة الحرارة ع الاقل الظهر 45 وانت تمشي 140 وطالع والمكيف شغال وبتمشي اكثر من 50كم وين ماتوصل النص معه المشكله من كمبيوتر السيارة مايقدم الشرارة يعني يبي لنا كمبيوتر فورد سعودي مبرمج على الاوكتان عندنا والفرقعه هاذي فقط بالامريكي اما السعودية مافيه ولو كان فيه اكيد عنده مشكله بالصبابات وبالتوفيق ....................

حياك اخوي

تدري وش افكر فيه اللحين ؟

افكر اغير البلف ببلف مايسمح للحراره توصل النص ابيها على الثلث عشان ماايطلع صوت القرقعه علما ان الحراره بسيارتى مازيد عن النص حتى وقت الظهر والمكيف على الاخير بس مشكلتنا القرقعه تطلع اذا وصلت الحراراه نص

وانا طرحت سؤال قبل كذا على الاخوه اللى عندهم خبره وش احسن بلف يركب على الفورد وهل يضر المحرك لو بدلنا البلف ببلف ثانى مايسمح للحراره توصل للنص؟

اللى عنده خبره بخصوص هالموضوع يشااركنا ولكم تحيااتى

هلابكم وماقصرت ياخوي والله من ناحية القرقعه من سيارة لسيارة تختلف واللي قاهرني الفورد السعودي مافيه قرقعه بمكاينه بس بالامريكي حسب تجربتي بسيارات اخواني من بوليسي سعودي وامريكي وسعودي ستاندر مافيه الاموتري يقرقع انا بغيت اوضب بسبب هالقرقعه وخسرت 2000 ريال بجنازير وطرمبة زيت وشدادات ....الخ .. وبالنهاية ولاشي وثلاث سنوات على اوكتان95 والصوت نفس الشي يخف بنزول الحرارة يعني لومسكت الطريق والحرارة على الربع مايطلع الصوت ابد لكن اذا وصلت النص ياحبيبي قسم بالله كني بخبيتي كرررررررررررررررررر مالك الا تزيد على المسجل وطق المكيف على 3 وامسك الخط الجبيل الرياض ذهابا وايابآ و160 ولي حول السنتين الحين واذا بوشت الله لايخلينا من 996 واقرب سطحه وغير مكينه قالها لي هندي يقول المكينه تمام امش عليها واذا خبطت غيرها كلام مقنع والله يكون بعون الجميع والسر يااخوان بالكمبيوتر تبع السيارة ان شاء الله راح اركب كمبيوتر سعودي واجرب وافيدكم بأذن المولى سبحانه سلاااااااااااااااااااام عليكم..........

الله يعطيك العافيه اخوى drive

انا عندى نفس المشكله بسيارتى اللى هى صوت قرقعه وانا فعلا ارجح كلامك علما انى اول شي سويته غيرت البنزين من 91 الى 95 ولا نفع

في خلل بس وين ؟الله اعلم والشغله يبيلها وقت و سعه صدر وان شاء الله راح القى الحل

بنفسي طبعا راح اشيك على كل قطعه لها علاقه بالمشكله

حتى مسأله البرمجه مااظن انها الحل الاكيد احيانا تنجح واحيانا لا واعتبرها اخر مرحله

وشكرا لك

ماشاء الله تستاهل و الله لانك رجال طيب والله عطاك على نيتك في السؤال ثم التحري ثم ولاهم انك مابخلت على الخوانك في طرح النتيجه
لك الان موضوعين بنفس الطريقة حتى لو قصرنا معاك انت ماتقصر معانا في طرح الحل بارك الله فيك

على فكره البنزين كما انصح اخواني دائما كل ماارتفع الرقم بيكون البنزين نقي وافضل بتاكيد يعني لان في المملكة نزل البنزين مختلف متاخر جدا ولكنه في الخليج من زمان فيه منه انواع كثيره منها 97 و 98 اوكتين وهي الافضل
ويوصي بها دائما في السيارات الحديثة وسعرها اكثر من البقيه لانها الانقى من الرصاص

بارك الله فيك اخي الحبيب على مشاركتك
حقيقي المشكله عانيت منها 7 اشهر
الى ان القولون اشتغل معي تمام في كل مشوار اذب بالسياره
اخدت الحل من كبير مهندسين في توكيلات الجزيره وهي الوكيل المعتمد لفورد كراون فكتوريا
والله أعلم

لدي نفس سؤالك اي drive اي هل انه حل نهائي او لربما قد ترجع المشكلة لا سمح الله؟

الله يبارك لك في مالك ويحل لك مشاكلك كلها
قل آمين


حبيت انوه على نقطة
انتقالك الى بنزين اعلى من المحدد من الشركة الام (في حالتك فورد) والبنزين الاعلى اوكتان يحل المشكلة
فمعناه ان عندك واحدة من 2
اما انت معدل بالسيارة وانت ما تدري وتحتاج احتراق بنزين اعلى
او عندك مشكلة في منظومة المكينة (تختلف الاسباب من ضعف طرمبة الى تنسيم هواء من الثلاجة الى ضعف اسلاك بواجي الى خراب حساس الطرقات الى امتلاء دبة الرصالص الى....)
يعوضه احراقك العالي للوقود

مثل لما تكون عندك حريق في درام
وتقدر تطفيها ب جالون ماء..... هل تتوقع انك اذا صبيت 3 جوالين راح تغير شئ او تطفي اسرع.....لا

لكن اذا كان الجالون مخروم راح مايكفي جالون واحد وراح تحتاج الى اكثر من جالون


الحل المؤقت هو صب اكثر من جالون
لكن هل هذا هو الحل اللي تتوقع انه النهائي؟

ومرة اخرى ادعي للكل
الله يعطيكم خير اموالكم ويكفيكم شرها

اخي العزيز
الصوت الظاهر معي يختلف عنك
اتمنى توضع رابط توضح المشكله حتى يتسنى لك الوصول للحل الصحيح

وبالمناسبه
انتقالك الى بانزين 95 يحافظ على سيارتك

يأخوان
والله العظيم اختفى الصوت نهائياً
والسياره تغير عزمها
والتفتفه اختفت
والخراره صارة مثل يوم اخدتها من وكالتها
وربكم الرزاق

والله مشكله كل واحد يعطيك مشكله واخر شي من البنزين


مشكووووووور على الموضوع

يعطيك الف عافية اخوي على وصفك للعلاج والحل ... وان شاءالله تظل السيارة على ما هي بدون خشخشة .. لكن لدي استفسار هل الصوت (صوت الخشخشة والصرقعة) خف عن اول ولا اختفى نهائي وما اعاد اله وجود؟؟
تحيتي
:)

والله انا عندي نفس المشكلة اول ما اشغل السيارة الصبح يصير في صوت ولا تقول تكسير تحت انا سيارتي قراند شيروكي واستخدم بنزين 91 ويش رايك اذا غيرت لين 95 ما في ضرر