سلام عليكم جميعا
بصراحه انا لي مده اتابع مواضيع هالمنتدى الرائع واخيرا قررت اسجل واشارككم تجربتي وقصتي اللتي تحتوي على كثير من المفارقات المضحكه
طبعا راح اتكلم عن السيارة الحلم سوناتا واللي اعتبر اقتنائها من افضل القرارات اللي اتخذتها بحياتي ان لم يكن الافضل :smilie16:
بدايه القصه كان معي جيب باترول ربع ( سلق ) وتقريبا جميع سياراتي دفع رباعي ماعدا كامري وسوناتا والكامري ماكملت سنه معي المهم ان الباترول كان خادمني في البر والمدينة وماشتكيت من شي الا يوم توظفت وبديت امشي تقريبا 150 كيلو يوميا
وكان مبهذلني بالبنزين وكان فيه احتمال كبير جدا اني انقل للرياض وبنفس الوقت حسيت اني وصلت عمر المفترض اني ابدا احوش للقواز ( الزواج) :bigggrin:
فقررت ابيع الجيب واشتري سيارة مريحة واقتصاديه وبنفس الوقت ماهي غالية
طبعا من اسوأ الاشياء انك تبيع سيارتك وبنفس الوقت منت عارف وش تشتري او ماحطيت في بالك سيارة معينة انا توهقت بعت الجيب وبديت ادور في هالمعارض
جا في بالي اخذ كامري قلت سيارة عارفها وبينكم عيش وملح لمدة سنة خخخخخ لكن لما سألت عنها وقالوا الستاندر اللي النوافذ الخلفية هندل ب 65000 الف :confused1: تركتها وحلفت ماشتري تويوتا لو ينزلون عرض خذ سيارة والثانية مجانا
وبعدها شفت العديد من السيارات مثل الاكورد والتيما ومكسيما وخلافه لكن كلهن فيهن غلاء بالسعر وانا رجال ابحوش
مريت صالة عرض الهونداي وشفت السوناتا وحبيتها من اول نظره ولاتهون الازيرا بس انها غالية هههههه المهم قاعد اناظر داخلها شفت مثبت سرعه وسيدي وفتحة وقير توماتيك ومرايات كهرب قلت شكلها فوق الثمانين الف
لكن سألت عنها قالي الموظف 60000 الف ريال ولو جزمت ننزلك الف انا ماكذبت خبر طلعت دفتر الشيكات وقلت استعجلوا بتجهيزها :bigggrin:
لكن قال ترا مافيه الا لون ابيض بس قلت طيب لؤلؤي فضي برتقالي اي شي غير الابيض تعقدت منه من يوم يومي جيوب بيضاء جتني عقده من اللون هههههههههههه
قال والله مافيه حتى الفروع الثانيه مخلص اللؤلؤي لكن فضي اطلبها لك يبيلها اسبوع او اكثر
فكرت وقلت طيب بيعوني هذي اللي عارضينها .. تفاجأ شوي وقال هذي للعرض :confused1: قلت مخالف هي سياره نفسها نفس اللي بالمستودع وممشاها جديد 25 كيلو بس اجرا بعض المكالمات مع كم انسان
وجا قالي هات الشيك وترا نزلولك الف ريال عشان انها حقة عرض :a1120(86): يعني ب58000 ريال صارت<< يلبى قلوبهم
المهم بعدها بدا مسلسل التخويف اللي انتم عارفينه .. هذي كوريه ماتنفع وهذي حقة عرض لعبوا عليك مخربينها . غالية كان زودت واخذت كامري ...الله يعينك على الاعطال ... لو سألوك الناس وش سيارتك ووش بتقول ... وهلم جرا
كلهم كوم وابوي كوم قالي انت حتى الجيوب ماتصبر عليك هالنوعيه من السيارات يبيلها شباب يدلعها ويغسلها كل يوم ويمر الزينات كل اسبوع انت بعد شهرين اقص يدي ان مالقيناك كاشت بها بالصمان ههههههههههه
بعد هالتحطيم وبعد مانسوا بديت الاستخدام للسيارة والصراحه من اروع مايكون تفوقت على توقعاتي كنت حاط في بالي انها سيارة حلوه لكن طلعت سيارة الاحلام بالنسبة لي بحيث انها عطتني راحه ومواصفات حلوه واهمها المثبت والقير التوماتيك وقوة مكينه والشكل الحلو وفوق هذا سعر مناسب جدا واكثر من مناسب
وللعلم ابوي صدق في كلامه طلعت عليها للبر مثل ماكنت اطلع في الجيوب امشي بالطرق الوعره بسرعه كبيرة
ولاعمري شيكت عليها بالوكالة ابد ابد ابد اصلن ماشافوا وجهي بعد ماعطيتهم الشيك :bigggrin:
رقيت فيها اكثر من مره على ارصفه ومطبات على السرعه ماعترف في شي اسمه فرامل كل من ركب معي مايصدق اني ماسويلها تربيط كل فترة وفتره حتى الاشياء الاستهلاكية ماغيرتها ورحت بها لكل مكان والان هي معي من سنتين ونص جاها كرف مايجي على ددسن شركه خخخخخخخ
مفارقة مضحكه ولد خالتي سافر معي مره واعجبته مره مره السوناتا بشكلها ورساوتها وراحتها لانه كان معه فورد قديم وقرر يشتري لكن لما عرف انها كورية تراجع
واخذ اكورد لانها قريبة من شكلها لكن ياباني اتوقع اخذها في بحر الثمانينات ومع ان ممشاها لايتجاوز الخمسين الف ويشيك عليها كل خمس الاف الا انه غير فحمات مرتين وهوبات وراس المكينة ومدري وش بعد وبعدها صدم عليها صدمه خفيفة جدا يوم شفتها قلت ممكن تكلفك 2500 ريال بالكثير لكن بعد التسعير اتضح انها تكلف 12000 ريال :blue:
وانا بما انها كورية اعطالها كثيرة ومافيها جوده خاصتن انها الحين ماشية 90000 الف كيلو :a1120(86):
للاسف اتضح انه يبيلها شد جلنط ووزن اذرعه وفحمات ولو الكوري مايتحمل الصراحه ههههههه كلها ماتكلف خمس مية ريال
وصدم عليها اخوي صدمه قوية كلفت 8000 ريال وللعلم ماتغير فيها شي حتى بعد الحادث من حيث الرساوة والراحه اللهم الشماسه طاحت بس :bigggrin:
كل هالمعطيات خلتني احبها حب كبير جدا وبما اني ماحوشت شي للزواج ههههههههههههههههه
قلت ياولد اطرب عمرك واشتر جيب
بس ماتهون علي السوناتا مرتاح فيها مره عيبها الوحيد انها ماهيب دفع رباعي اذا بغيت البر يوما ما
واذكر مره شفت موضوع لواحد يقول انه راسل كل شركات السيارات يشتكي سوء الوكلاء عندنا وغشهم بالاسعار ولكنه ماتلقا رد الا من هونداي قمت انا اخذت بريدهم وراسلتهم وعرضت عليهم
انهم يطورون جيب سوناتا :bigggrin: بعدها بفترة تلقيت الرد ان الاقتراح سيدرس او شي من هذا القبيل
الله لو يصدقون ويطورون جيب سوناتا ابكون اول المشترين
ملاحظة :-
ولد خالتي حاليا اشترى سوناتا :bigggrin: <<< كني احس السوناتا تقول اجيبك يعني اجيبك خخخخ
معليش ادري اني كثرة الكلام بس هي مشاركه حبيت اشارككم فيها
في امان الله
