السلام عليكم ورحمه الله وبركاته
أخوآني بعد مـآعزمت على السوبارو 2008 فل أوبشن 4 سلندر..
ياليت تنصحوني فيهـآ قبل مـآسوي أي شي
للحين معزم عليهـآ وجاهز لها بأذن الله بس مابعد سويت شي ..
نبي مميزاتها وسوالبهـآ وقطع غيارهـآ والعزل و و و...إلخ ,, كل شي عنهـآ
الله لايهينكم نبي إفـآدتكم بأسرع وقت
السلام عليكم
شوف يا طويل العمر، أنا معي سوبارو ليجاسي 2008 ستاندارد قير أوتو لها معي تقريباً أسبوعين
بأعطيك عنها معلومات باختصار
أولا شكل السيارة ما يحتاج أكيد تعرفه ومواصفات حلوة يعني كل الأنواع تجي بجنوط 17
ثانياً داخلية السيارة ممتازة جدً وخلينا أشرح لك الداخلية باختصار
الطبلون أنواره روعة في الليل (الأرقام بلون أبيض وعليها دوائر حمراء) يعني شكله حلو مرة وفيه حركة حلوة أول ما تشغل السيارة تنقز العدادات كلها للأخير وترجع (حركة رياضية)
التابلوه. توزيع الإنارة فيه ممتازة (الأزرار باللون الأحمر وشاشة المسجل والمكيف باللون الأبيض)
النظام الصوتي. ما عليه تقدر تقول عنه حليو وعلى فكرة تجي بست سيديات مع تشغيل mp3 لكل الطرازات
فيه مدخل للآي بود في الدرج بين المقعدين الأماميين بس أنا ما قد جربته بصراحة
مكيف السيارة ما عليه كلام ممتااااااااااااااااااااااااااااااااز وعلى فكرة ترى من أفضل المكيفات ودرجة الحرارة فيه تجي 15 ومعظم السيارات أقل درجة حرارة 18 يعني في الصيف ما عليك لا تخاف من الحر
مكينة السيارة حلوة (4 سلندر 173 حصان) وعزمها حلو مقارنة بفئتها لكن إذا تبغاها حق مطارحات فترى القير الأوتو ما يصلح في السوبارو خذ قير عادي أحسن وعلى فكرة ترى فيه فرق جااااااامد بين القير العادي والأوتو خصوصاً في السوبارو
ولكن مع ذلك عزم الأوتو حلو. أنا حاولت أجرب تسارعها وجابت تسارع كويس بس ترى أنا ماني خبرة يعني ماغير ارفع رجلك عن الفرامل ودوس بنزين واحسب بالساعة وجابت تقريباً في 10 ثواني تقريباً بس ترى التسارع ماهو دقيق يعني أي كلام. ولمعلوماتك ترى السيارة إلى الان ماشيه 2000 كيلو بس يعني مع التمرين الحلو وبعدي فترة أتوقع بيكون عزمها ممتاز
نجي للرساوة والثبات. لو تجرب سيارة سوبارو على السرعات العالية وخصوصاً لو كنت قد جربت ماركات كثيرة سابقاً أقول لك صدقني إنك بتعوف باقي السيارات
جربتها على سرعة 180 وبصراحة تعجبت من الرساوة والثبات الغير طبيعي
وجربتها أيضا في المنعطفات. قبل أربعة أيام جيتك مع منعطف وأنا ماشي تقريباً 140 وماسك اليسار وما غير تكبيس الناس يطالعون فيني ويقولون وش ذالمجنون.
بس بصراحة قيادتها لا يعلى عليها
وصوت المكينة حلو ورياضي بس أحياناً يكون مزعج شوي
العيوب اللي أشوفها في السوبارو إلى الآن هي أربعة عيوب
أولاً القير الأوتو عزمه لك عليه شوي هو حلو لكن توقعت إنه يكون أفضل من كذا
ثانياً في بعض الأحيان تحس إن صوت المكينة مزعج زي ما ذكرت فوق
ثالثاً وهو ضيق المقاعد الخلفية. بس أنا ملاحظ إنه إذا أحد جاب طاري الليجاسي على طول لازم يقولون المقاعد الخلفية ضيقة تحس إنهم يتكلمون عن أكسنت وإلا يارس هي ماهي ضيقة زي ما البعض يتخيل هي مناسبة بس ماهي بمستوى السيارات الأخرى المنافسة لها.
رابعاً: السيارة تحس إنها نازله مرة في الأرض. يوم الخميس اللي فات طلعنا أنا والشباب نتمشى على الموتر ركبوا معي خمسة واحد قدام وأربعة ورى المهم وقفنا عند البيت عشان بآخذ شغله يوم نزلت من السيارة وألاحظ إنه الرفرف شوي ويحك في الكفر من كثر نزله السيارة
كل ما ذكرته فوق انطباعي عن السيارة في اسبوعين فقط ومن الأفضل تدور على شخص تكون السيارة لها معه سنة أو سنتين عشان تتأكد
وفي النهاية أقول لك ترى مواصفات السيارة كثيرة مقارنة بسعرها. إنت روح للوكالات الثانية وشوف مواصفاتهم وأسعارهم وأحكم بنفسك
أتمنى إني أكون أفدتك ولو بالقليل وفي النهاية تقبل تحياتي ومبروك مقدماً والله يعطيك خير السيارة اللي بتاخذها ويكفيك شرهاً وبالتوفيق
وأهم شي لا تاخذ أي سيارة حتى لو كانت ليجاسي إلا إذا كنت مقتنع فيها اقتناع تااااااااااااااااااام
تحياتي
