أرجوا المساعدة، سيارتي جديدة والفرامل ما تمسك والسبب... نظام الـ ABS
السلام عليكم
أنعم الله علي واشتريت سوبارو ليجاسي أربعة سلندر موديل 2008، وبعد مرور شهر لاحظت إنه فيه شي غريب في فرامل السيارة، جربت الفرامل أكثر من مرة ووجدت إنها ممتازة وما فيها شي لكن فيها حركة غريبة يوم أدوس الفرامل أكثر من النص.
ويوم من الأيام وأنا طالع للدوام الصباح وكنت ماشي تقريباً 60 كم، وفجأة ما انتبهت إلا والخط واقف، على طول دست على الفرامل بأقوى ما عندي لكن للأسف ما مسكت معي تمام وحسيت إن الفرامل فيها حركة غريبة كأنها تدف رجلي (وإنتو بكرامة) وآخر شي دعمت السيارة اللي قدامي لكن الحمد لله ما تضررت السيارة.
كملت طريقي ورحت للدوام وأول ما طلعت من الدوام توجهت للوكالة عشان أشوف حل لهذي المشكلة.
قابلت الفني اللي في الوكالة وكلمته بخصوص المشكلة قال لي الحركة الغريبة اللي تطلع لك يوم تدوس الفرامل هي من نظام الـ abs(مانع إنغلاق الفرامل). لكن مو معقول إن الفرامل ما مسكت معك، قلت له هذا اللي صار ووريته بأثر الصدمة (حكات خفيفة في الصدام واللوحة تعفطت). شرح لي الفني طريقة عمل الـ Abs وهي إنه نظام يدبل الفرامل عشان ما تغلق وهذا الشي يسمح لك إنك تتحكم بالسيارة حتى في حال الفرملة القوية بعكس السيارات اللي مافيها هذا النظام واللي إذا دست فرامل ما تقدر تتحكم بالسيارة أبداً، قلت له كلامك يفسر الحركة الغريبة في الفرامل لكن هذا الشي مو معناه إن الفرامل ما تمسك أبد، قال لي راح نفحص سيارتك ونشوف وش فيها. تركت السيارة في الوكالة ومشيت.
ويوم جيت آخذ السيارة، سألت الفني وش المشكلة، قال لي فيه هواء في الفرامل والآن كل شي تمام.
طبعاً أنا ما أفهم في الأمور الميكانيكية عشان كذا قلت له أهم شي إن الفرامل تمام.
و أول ما طلعت من الوكالة مشيت شوي وكبست الفرامل عشان أتأكد ولقيت كل شي تمام قلت الحمد لله.
وبعد كذا تكرر معي الموقف أكثر من مرة وكانت الفرامل بتوديني في داهية لكن الله ستر.
سألت واحد قريب لي معه هوندا أكورد 2007بخصوص المشكلة، وقال لي حتى أنا عندي نفس المشكلة إذا دست الفرامل فجأة ما تمسك معي وأضطر إني أرد نمر، ويقول لي الله يعينك لازم تتعود ترد نمر
سيارة قريبي قير أوتو وإذا بغى يرد نمر يدف القير على 3 ثم على 2 وعلى طول تهجد السيارة
لكن أنا سيارتي قير أوتو (تبترونيك) يعني فرضاَ لو صادفت موقف يتطلب مني أدوس الفرامل كاملة، الفرامل ما راح تمسك معي، معناها لازم أحول السيارة لقير عادي وبعدين أرد نمر، على كذا صادم صادم !!!!!
غريبة والله، معقوله نظام الـ Abs فاشل لهذي الدرجة؟؟؟ أو هل فيه طريقة لاستخدام هذا النظام والاستفادة من إمكانياته؟؟؟ أو هل هي مشكلة في نفس سيارتي وفي الإمكان حلها (علماً بأن سيارتي ماشيه لحد الآن 6500 كيلو فقط، يعني باقي جديدة!!!)؟؟؟ أتمنى منكم الرد العاجل لأني صرت أخاف بشكل كبير وخصوصاً إنه واحد من إخواني أحياناً يستخدم السيارة فأخاف إنه يجيب العيد في السيارة
اعذروني عالإطالة
بانتظار ردودكم.
وفي أمان الله
أخوكم
