السيارة مابعد التوظيب

abu jawad @user_161331 · 23-05-2009

السلام عليكم

سيارتي لومينا 2002 ماشية 150 الف كيلو

كانت عندي مشكله في الحرارة كل مابين فترة

واخرها قبل شهر ونصف حيث قمت بتبديل مبرد الزيت مع الخراطيش وكلفتني حدود 1100 ريال.

وقبل اسبوعين ارتفعت على الحرارة بشكل كبير جدا قريبه جدا من H

رحت سيخت الرديتر وقال لي لازم اروح الميكانيكي لتشييك الراس والقازقيت

طلعتها من عنده والحرارة نفس الشي مرتفع جدا ودخان ابيض يطبع من الشكمان

المهم،، وصلت الميكانيكي قلت له القصة شيك على معيار الزيت قال السيارة خالطه

قلت له طيب يعني،، قال توظيب !!

قلت انا لله وانا اليه راجعون راحت السيارة

المهم الان هي في الورشة للتوظيب (توظيب كامل) وراح تخلص الاثنين.

قال تحتاج رقعة ماي - طرمبة ماي - طرمبة زيت - شنابر - سبيكة - بساتم - تكايه - كرسي ماكينه -

جلد تأمين - سير ماكينه - ماء رديتر - قازقيت ماكينه - بوجي واسلاك - وخراطه

وراح يعطيني ضمان 6 اشهر على التوظيب

@ هل السيارة بعد التوظيب ترجع طبيعيه والا انتهت السيارة ؟

@ هل في طريقة معينه اتاكد منها ان التوظيب تمام؟

@ هل هناك اشياء يجب مراعاتها بعد التوظيب للحفاظ على سلامة الماكينه، البعض يقول تمرين وغير ذلك؟

ارجوا انكم اتجاوبوني عى التساؤلات واتطمنوني على سيارتي بعد ماتتوظب

مشكورين

traveller @user_2048 · 02-06-2009

ما أنصحك بالمكيف في فترة التمرين لانه يثقل على المكينة .

abu jawad @user_161331 صاحب الموضوع · 02-06-2009

اقتباس:

@ هل في طريقة معينه اتاكد منها ان التوظيب تمام؟
اشتغالها وفحص الزيت بعد اسبوع تشوف كيف حالته
ولا يوجد طريقة معينه ممكن تتاكد منها غير ان تشوف اشتغال الماكينه مضبوط

انا اشوف تشغيلة السيارة حليوه واجد ومشيتها حليوه ولا أحس فيها اي صوت غير طبيعي

ودائما أتأكد وأطلع تحت السيارة عشان اشوف في تهريب في الزيت لكن ماشوف شي

وشيكت على معيار الزيت اشوف الزيت نظيف جدا

والان مشيت 400 كيلو والميكانيكي يقول لي بعد 500 كيلو ابدل زيت

يعني باقي 100 كيلو واغير الزيت

ياليت اتفيدوني في موضوع المكيف !؟

abu jawad @user_161331 صاحب الموضوع · 02-06-2009

طيب اخوي فني يسارات مشكور على التوضيح

طيب بالنسبة للمكيف أشغله والا لا أثناء التمرين؟؟

يعطيك العافية

فني سيارات @user_8460 · 02-06-2009

اذا فيه زيت في اراديتر يعطيك احتمالين هو وجود احتراق كازكيت الماكينه (الجلد ) او ان تبريد الجير خلط مع الراديتر من جديد

اما لو كان الخلط ووجدت زيت الماكينه من قيج الفحص ماء او بياض هذا يعني ان السيارة تخلط ماء مع الزيت ويحتاج توضيب وقد تحتاج الى خراطه او مسح وبحسب الحاله البعض يقول بما انك فكيت الماكينه هي فرصة لتبديل بعض القطع الهامة كما هو حاصل معاك فيه اشياء مش ضروري تبدلها ولكن يبيك تبدلها بناء عليه عطاك ضمان جيد
لان الكثير لايعطي مدة كبيرة لهذا الضمان ولا حتى الوكاله في اعتقادي

وراح يعطيني ضمان 6 اشهر على التوظيب

@ هل السيارة بعد التوظيب ترجع طبيعيه والا انتهت السيارة ؟

ترجع طبيعية واحلى من الاول لو تم خرط الماكينه بشكل جيد ونظيف

@ هل في طريقة معينه اتاكد منها ان التوظيب تمام؟

اشتغالها وفحص الزيت بعد اسبوع تشوف كيف حالته
ولا يوجد طريقة معينه ممكن تتاكد منها غير ان تشوف اشتغال الماكينه مضبوط

@ هل هناك اشياء يجب مراعاتها بعد التوظيب للحفاظ على سلامة الماكينه، البعض يقول تمرين وغير ذلك؟

نعم التمرين مهم ولاتدوس بنزين بزيادة بتحميل او بدون تحميل يعني على الفاضي او مع المشي
على الاقل 1000 كيلو

ارجوا انكم اتجاوبوني عى التساؤلات واتطمنوني على سيارتي بعد ماتتوظب

مشكورين

ان شاء الله خير

abu jawad @user_161331 صاحب الموضوع · 02-06-2009

الحمدلله طلعت السيارة والان تحت التمرين وماشاء الله اشوفها حليوه واجد والحرارة ثابته

بس اخواني عندي استفسار اتمنى القى الجواب الشافي

بالنسبة للمكيف أشغله وإلا لا أثناء التمرين؟؟

وهل تشغيله يضر الماكينة او لا؟

وماهي علاقة المكيف بالتمرين والتوظيب؟

وشكرا

وشكرا

bilany2003 @user_19836 · 25-05-2009

بعد التمرين يقولون لك البعض غيرها كل 7000 كيلو والبعض يقول لك غيرها كل بعد 2000 كيلو

وانا اخذت الوسط واغيرها كل 3500 كيلو متر

اللي يقول لك غيرها كل 7000 كيلو يتعذر لك بان الزيت الان تطور وشركات الزيوت تنصح انك ما تغيرها الا بعد 10000 كيلو وكذا طبعا متناسين ان الحر عندنا يتعدى حدود 50 درجة مئوية

واللي يقول لك غيرها كل 2000 يقول لك حماية وضمان للسيارة وما يدري انه يخسر امواله وكذا ممكن يغير الزيت في الشهر مرتين

وركب زيت مكتوب عليه 20w50 في الصيف

حيث رقم 50 هي اعلى درجة حرارة خارجية يشتغل تحتها الزيت

و20 هي اقل درجة حرارة يشتغل عندها الزيت

فخير الامور اوسطها وافضلها وغيرها كل 3500 الى 4000 كيلو متر

وفي الشتاء ركب زيوت بلزوجة اقل من كذا مثلا 10w30 او 0w40

abu jawad @user_161331 صاحب الموضوع · 24-05-2009

اهم شي عداد الهواء او الضغط ما يتعدى 3 ار بي ام يعني ما تتعدى سرعة دوران المحرك 3000 كيلو

هذي مافهمتها؟؟ وكيف اعرف ضغط الهواء كم وكيف اعرف سرعة دوران المحرك بحيث ماتتعدى 3000 كيلو.

- لازم انك تتاكد من تغيير الزيت في الوقت المحدد

كل كم كيلو يفترض اني اغير الزيت والفلتر؟

مشكور اخي bilany2003 وماقصرت

اخي الحوية 511
اشكرك على الرد، طمنتني ان السيارة ترجع مثل اول
مشكور على النصائح

امير البحار ، اشكر لك مداخلتك

ارجو من الاخوة الاجابة على الاستفسارات

تحيتي

أمير البحار @user_49060 · 24-05-2009

خليه يشيك على الراس ممكن يحتاج مساح بسيط ونشاء الله رايح ترجع السياره افضل من الاول بي مليون مره لان كان عندي كابرس كنت اشتكي من ارتفاع الحراره ونقص الزيت وصرفية البنزين فداك اليوم جت في بالي ابدل ربل المكينه بي الكامل من فكاك المكينه وكشفه على حقيقته طعن من قبل ماخلية حاجه ماركبته فيه لامروحة تبريد زياده ولا رديتر ويوم جيت با بدل ربل المكينه فكو المكينه ولقيت البلاوي المكينه مشمبره السلندر فيه شفه ربلة الراس منعدمه عمود التيمن خربان عمود الكرنك يحتاج خراط وقالو الراس رايح يودونه المخرطه يفحصوه ولقو الراس يحتاج مساح فتفقة معاهم ادا مسح الراس ماريح احتاج ادبل ربل قالو ماريح تحساج تدبيل ربل قالت توكلنا على الله والحمد الله صار ليه سنه من بعد التوضيب ماشتكي من حراره ولا من نقص زيت ولا من ضرفيو بنزين زياده

الحويه511 @user_145274 · 24-05-2009

الاخوان ماقصروا واحب اضيف بعض التوجيهات

اول شي لاتخاف من التوضيب بالعكس كان موترك توه جديد زي الوكاله
ثاني شي خل الموتر خل الموتر يمشي حبه حبه على مهله لا تشد له يعني خلك رايق في وسط المدينه وفي الخط عاد لاتتعدى 80 ولاتحاول تخلص الكيلوا المحدد لتمرين بسرعه وخل تمرينك في الليل في البراد
ثالث شي لاتحاول تطلع اي طلعه حاول تتجنب الطلوع لانها تتعب المكينه في البدايه

رابع شي خل كل يوم تقطع 150 كيلوا او 200 وخلها فله وتماشي على الخطوط ولاتنسى الخوي لانك بتطفش لحالك وان شاء الله ان موترك يظبط ويزين وتتلافى كل مشاكله

واسأل مجرب ولا تسأل طبيب (( بس خبرتي بالعايدي )) اما التماتيك ماعمري مرنته

bilany2003 @user_19836 · 24-05-2009

تمشي 1000 كيلو متر بدون تسارع قوي وبدون ما تتعدى سرعة 80 كيلو او اهم شي عداد الهواء او الضغط ما يتعدى 3 ار بي ام يعني ما تتعدى سرعة دوران المحرك 3000 كيلو وبعد اول الف كيلو غير الزيت لانه يكون فيه برادة حديد كثير فلازم تغير الزيت والفلتر ضروري لاجل الرائش اللي يكون موجود وبعد كذا خلاص خذ حريتك

نصائح بالنسبة للومينا

1- بمجرد ما تتعدى الحرارة الحد الطبيعي طفي السيارة تماما

2- لازم انك تتاكد من تغيير الزيت في الوقت المحدد

3-حاول انك ما تتسارع بشكل قوي من الصفر بشكل دائم

abu jawad @user_161331 صاحب الموضوع · 24-05-2009

نعم اخوي كانت تطلع دخان ابيض من الشكمان لما ادوس بنزين مثل سيارات المبيد الحشري الابيض

الميكانيكي قال لي انه راح يمرنها يوم كامل وبعدين استلمها..

طيب ويش اسوي أمرنها بعد والا لا ؟؟

كيف طريقة التمرين؟؟

مشكورين

bilany2003 @user_19836 · 23-05-2009

بعد التوظيب لازم تمرن السيارة وحاول ما تتعدى 80 كيلو متر في الساعة او عداد الار بي ام ما يتعدى 3 ار بي ام او 3000 دورة في الدقيقة حسب ما هو موصى اصلا من الوكيل اول ما كانت تنباع

نصيحة ركب قطع اصلية

بالنسبة للي قاله لك الميكانيكي صحيح لازم تغييره وهذا عيب اللومينا اذا ارتفعت الحرارة دايم تروح فيها المكينة على طول

M~أمير بكلمتي~M @user_58367 · 23-05-2009

اخوي من المفترض اذا كانت السياره خالطه تشوف الدخان الابيض ورا كانك مثل

سيارات المبيد الحشري الابيض

واصلا اذا السياره خالطه تغير حاجيات مثل القازقيت والشنابر الي تأكالت وخلت الزيت والمويه

يختلطوا والتوضيب الكامل اذا كانت السلندرات مكسوره او مضروبه وتحتاج الى خرط وقتها تغيرها

اخوي اهم شئ القطع تكون اصليه الورشه تكون محترفه وذات جوده في توضيب المكائن

بعد التوضيب اكيد ومن المهم تمرين الماكينه

للتاكد ملاحظة الماكينه والسياره

تفتفه - دخان - نقص زيت - نقص موية - ارتفاع الحراره - رجه في الماكينه - صوت - .. الخ

من العيوب الي تكون في الماكينه لا قدر الله وقتها ترجع له

اتمنى من الله ان يوفقك وان ترجع السياره سليمه باذن الله

أخوكـ