أنا والليجاسي ووكالة اليمني

بسم الله الرحمن الرحيم

السلام عليكم و رحمه الله ...

كيف الحال يا شباب عسي بخير ...

أنا اليوم جايب لكم قصتي مع وكالة اليمني وتعاملهم معي مؤخراً

كان يا مكان في قديم الزمان وسالف العصر والأوان <---- مصدق نفسة إنه بيروي قصة :bigggrin:
قبل اربع سنوات تقريباً كان فيه واحد اسمة NEW كان يتابع منتدا يقاله منتدى السيارات و
ويشوف ويطلع، المهم اعجبته سيارة يقالها ليجاسي عند شركة سوبارو المهم بعد ما نزلت السوبارو
الستة سرندل وبعد حوس ودوس ويمين ويسار شرى ذا الموتر الي يقالة ليجاسي :bigggrin: من وكالة اليمني
للسيارات المهم كات تعاملهم ممتاز وأكثر من ممتاز محترمين وصياته ألف كانو ايضاً اكثر من
ممتازين المهم سألهم اخونا NEW عن متى يجي للصيانه القادمة قالو لعاد تجي ولا تعتب على باب
وكالتنا إلا إذا في سيارتك مشكلة، قلت أنا ابرك والفكة، المهم السيارة تمام ولى فيها مشاكل بس
خويكم ما إرتاح وقرى الكتلوج ثلاث مرات ومره رابعة على عجل وشاف ان فيه اشياء
وزيوت لازم تغير في 30.000 كم. ويوم مشت السيارة الثلاثين الف قلت اروح اسير عليهم
واشوف وش اخبارهم (الفرع الرئيسي في الرياض) رحت واستقبلوني بالترحاب
وكانو تمام هنا ايضاً، وغيرت زيت القير وفلتر هوا واشيا اخرى لا تحضرني حالياً
المهم معاد جيتهم إلا لاشياء انا اخذها واركبها برى مثل الفحمات وفلتر زيت ( اجي كل مرة
واخذ خمس حبات وكل مرة سعرها يختلف :confused1:) وربل (مطاط للمساحات) المهم جيتهم بعدين
في صيانه 80.000 وكان فيه صوت في السير قلت لهم غيرو السير لاني كنت بسافر
وقلت ما له داعي ينقطع وانا في سفر واتبهذل وكان تعاملهم عادي وغيرو لي اشياء
كثيرة مثل زيت الدفرنس وموية الأديتر ونضفو المكينه (شفط هواء) وغيرو فلتر البنزين
والسير طبعاً وفيه اشياء انا نسيتها، وكل هاذي الصيانات السابقة كانت سيارتي
تطلع في نفس اليوم حتى صيانه ثمانين ألف، المهم طلعت السيارة ورحت في السفرة
المذكوره سابقاً وفي اول 400 كيلو طلع صوت في السيارة من بكرة السير ( الي يدور عليها السير)
طبعاً هاذا الكلام وهي مالها إلا سته ايام طالعه من الوكالة توهم مركبين السير، المهم معنا واحد
قال امش عليها تراها تتحمل وقلت توكلنا على الله المهم رحنا للطائف وتعرفون جبال الطائف
ثم رحنا لمكة ثم جدة والصوت موجود والسيارة ماشيه ما فيها شي غيرة، المهم جينا معودين للرياض
وفيه ذيك الطلعة الكبيرة الي في غرب الرياض ناسي اسمها، المهم انا كنت خايف منها قلت
اهي الي بتعطلنا ووصلناها ثم رقيتها كامله والسيارة تمام، وعاد تعرفون خويكم انبسط وكتمت
الدعسة من الفرحة ويوم وصلت 160 كم إلا وكل إشارة في الطبلون ولعت، لمبه البطارية والجلنط
ومدري كم لمبه بعد، وصار الدركسون ثقيل وعلى طول عرفت انه السير، وانزل اشوف إلا اهو
انفرط بس، كامل موجود ما إنقطع، بس طاح من البكرات، وكانت الساعة تقريباً 4:30 صباحاً
حاولت اركبة حتى يوصلنا بس ما قدرت، المهم شفنا سطحة وشال السيارة إلى البيت
وفيه كهربائي أعرفه جاء وفك البكرة وخذها وصلحها وغير الرمان ورجعت السيارة تمام
انا الصراحة عصبت على الوكالة يعني السيارة ما لها ولى نص شهر طالعة من الصيانه
والسير جديد ويصير كذا حتى الي معي شمتو فيني، إلى الحين وهم يقولون (اسكت بس
لا ينفرط السيرالحين) المهم انا ما رحت للوكالة ولا قلت لهم شي قلت خلها تمشي
وبعد ها يمكن بثمانية شهور احترق النور الواطي الي قدام السواق رحت ادور شمعة في الوكالة
قالو خلاص بنطلب لك من جدة وتجي بعد ثلاث أيام لان ماعندهم في المستودع شي،
المهم بعد ثلاث ايام جيت وقالو جدة ما عندهم شي في المستودع اسبر اسبوع وتجي
من برا ( مدري اليابان او المانيا) وبعد اسبوع ما جا شي قالو جت دفعة بس شمعة النور الواطي
ما جت وبعد أكثر من ثلاث اسابيع توها تجي، يعني حول شهر وانا اسوق سيارتي عورا
ويوم جت سألت قلت كم فيه من حبه جتكم قال 50 شمعة وبتتوزع على فروعهم في المملكة
وقلت اجل ابشتري ثنتين احتياط, وشريت ثنتين وحده ركبتها والثانية إلى الان عندي
وبعدين السيارة وصلت 100.000كم. وقلت خل اوديها للصيانه وقبل لا اوديها طلع فيها
صوت من جهة السير أيضاً وصار رمان البكرة حقت كمبرسر المكيف قلت وديتها وقلت
غيرو الرمان، قال الرمان ما يتغير مالك إلا تغير كمبرسر كامل :confused1: (واول ما شرحولي انا فهمت
ان الكمبرسر نفسه خربان في رمان ولا ينفك ولازم يتغير) والي قاهرني ان المكيف تمام
وبارد ولا فيه شي، وسالت عن سعر الكمبرسر قال فوق الأربع ألاف ريال :confused1: وبعد التخفيض ثلاث
الاف واربع مئه، قلت يابو الشباب اذكر الله، قال مافيه إلا كذا، وقلت تدري طلها لا تصلحها
وطبعا في هذه الصيانه قلت لهم يصلحون عدة اشياء لاكن ما صلحو إلا السير كان متقطع وغيروه
وغيرو زيت القير مع الفلتر وفيه وغيرو رمان بكرة من بكرات السير وبس وخذو ثمان مئة ريال
والسيارة قعدت عندهم اربع ايام كامله على هذي بس!!
وانا كنت قايلهم اوزنو النور لان الي ركبه ما ضبطة، وقلت لهم ان الباب الخلفي يبيلة تغير قفل
وكان عندي فتحات المكيف متكسرة وقلت غيروها وقلت لهم غيرو فلتر البنزين ولا سوو أي شي
من هاذي كلها، انا رحت بعد اربع ايام قلت اكيد السيارة صارت وكالة إلا اهي على حطة يدك
المهم رحت للتشاليح ادور كمبرسر وبعد التعب حصلت وقالي خذة ب 2000 ريال و عيا يخفض ابن
اللذين امنو وانا وياه ورافض يخفض ولو ريال المهم قلت له فكة قال تعال بكرة ما يمدي اليوم
المهم وانا راجع من التشليح اسب والعن، وكان معي واحد وقالي شف يا اخوي يا NEW انت
الكمبرسر مغيرة مغيرة وش رايك الحين نروح لورشة ونشوف وش مشكلة الكمبرسر حقك
إن قدر يصلحة كان بها وإن ما قدر انت مغيره مغيرة ولانت بخسران. وقلت وبراسك يا
ابو خليل واروح لكهربائي اعرفة ابن كلب ( ترى قصدي مدحة لحد يفهم غلط) وقال بشوف لك وش
الخراب وبحاول اصلحة، وبعد ساعة اتصل علي وقال الخراب من رمان البكرة حقت الكمبرسر
انا اول ماكنت ادري انه رمان البكرة الي يدور عليها السير انا احسبة رمان في الكمبرسر ولا شي
لان الي فهمته من الوكالة ان الكمبرسر خربان ولا زم يغير كامل و لا يصلح (حتى اني مستغرب
ان الكمبرسر خربان والمكيف تمام حلها ذي) المهم قلت تقدر تصلحة قال انا بكرة بدور لك نفس
الرمان وبشتريه وأركبة واتستلمها إنشالله بكرة، ومن بكرة إلا والرجال يدق علي يقول سيارتك
ضبطت تعال استلمها، والتكلفة الإجمالية 290 ريال مع شغل اليد مع قطع الغيار مع تعبئة فريون
(الرمان ب50 ريال بس، وكانو يبوني اغير كمبرسر كامل عشانه) وانا الصراحة عقب هذي الحادثة
بصير اكثر حرص في تعاملي مع الوكالة واقل ثقة في كلامهم، واكثر شي قاهرني في الوكالة
قسم قطع الغيار ما يرد على المكالمات ابد ادق عليه الصبح العصر المغرب وكل وقت
ولا فيه امل ير حتى الي ما يصدق يجرب يتصل 2300000 التحويلة 3 بعدين 2، ما
فيه امل يرد احد انا الصراحة يأست منه.

واخيراً انا اسف إن كاني طولت عليكم لاكن قلت يمكن احت يستفيد من تجربتي،
وانا الصراحة إلى الان راضي تمام الرضا عن سيارتي ولله الحمد ولاعندي اي
نية ابيعها او اغيرها قريباً، قصدي مع هذي المشاكل ورفعة الضغط احياناً
إلا إني إذا ركبتها وسقتها خلاص تروح عني الهموم والمشاكل <--- ياهوه يالرومنسية والشاعرية

والسلام عليكم ورحمة الله وبركاته