السلام عليكم ورحمة الله وبركاته
.
.
اشتريت ولله الحمد لاند كروزر GX-R ثمانية سلندر 2010 لونه ابيض لؤلؤي من عبداللطيف جميل
الـ GX-R ثمانية سلندر يجي ثلاث خيارات
الاول: بدون فتحة وبدون كفر علاقي وبدون ونش وبدون دي في دي
الثاني: يزيد بخمس الاف ريال عن الاول وفيه فتحة ودي في دي زيادة
الثالث: ماادري كم الزيادة بقيمته بس مافيه لا فتحة ولا دي في دي بس فيه ونش ودفلوك وكفر علاقي
المهم ان الوالد قرر ياخذ الاول وقالوا له سعره 188 الف ريال كاش ..
الغريب اني الحين اشوف بموقع المتحدة للتقسيط اللي هو موقع تابع لعبداللطيف جميل سعره بـ 183 الف ..!!
مدري شالقصة هم ضحكوا علينا ولا سووا تخفيضات خلال شهر من نزول الموديل ؟؟!!
هو جا معاه تضليل وحماية واجهية من كول لايت رغم اني ما قلت لهم يحطونها .. مدري ان كانها تبرر زيادة المبلغ ولا لا ..
المهم نجي للاهم وهي الميزات والعيوب ..
ميزات المفخرة:
1- المحرك صحيح انه موب ذاك الزود بس كان افضل مما توقعته بكثير ..
2- القير سلس جدا وتغييراته مريحة
3- راحة ورساوة عالخط
4- اضاءة قوية وكابس زينون يغطي الخط كامل من ايمن مسار الى ايسر مسار
5- مواصفاته جيدة مثل: تشغيل زر وتشغيل السيارة بالريموت والمكيف الكتروني والحساسات وغيره ..
6- منظر وهيبة بالشارع بين المواتر
عيوب المفخرة:
1- الكراسي يدوي
2- مافيه تحكم المسجل بالدركسون
3- ما فيه الا ايرباقين وهذا اكثر شي مزعجني
تجربة الخمس الاف:
رغم ان السيارة المفروض انها للوالد بس كانت معاي طول الاشهر الماضية بسبب ان الوالد بنفس اليوم طلع ساب جديد من الجميح ومرتاح فيها ولا يحب سواقة اللاند ..
اطلع عليه يوميا الدوام من الدمام الى الهاف مون (60 كيلو رايح و60 كيلو جاي) والموتر صراحة فيه رساوة ممتازة وان كنت بالبداية ماكنت مرتاح له باللفات لانه اول جيب نمتلكه من فترة طويلة ..
نجي للنقطة الاهم والاغرب .. بعد اسبوعين من طلعت الموتر من الوكالة كان ممشاه فوق الـ 800 كيلو تقريبا .. كنت رايح الخبر على خط الميناء وطلعت بوجهي دينا واضطريت اضغط بريك جامد ..
المهم ان الـ ABS اشتغل ..
عقب مااشتغل الـ ABS ولعت ثلاث لمبات وهي لمبة ABS ولمبة الهاند بريك ولمبة الدبل ..
ولا رضوا يطفون حتى عقب ما طفيت السيارة وشغلتها ..
وديتها الوكالة وقالوا لي تعال عقب العيد .. ورجعت لهم بعد اجازة العيد وغيروا لي كمبيوتر الاي بي اس .. ورجعت المفخرة ولله الحمد الى يومها ما فيه شي ..
لكن كان العطل غريب من مفخرة الارض
وزيادة على كذا خرب علي اجازة العيد لانهم قالوا لا تشغل الدبل ولا تدخل فيه بر :a1120(82):
تقييمي العام للسيارة:
المفروض يكون 10\10 بس علشان سالفة الايرباقين بخليها 9\10 ولانه اخترب قبل ما يكمل الالف بنزلها 8\10 جواب نهائي
واعتذر عن تنزيل صور لان ماعندي كاميرا ولا اعرف انزل صور اصلا <<< ليش عايش:bigggrin:
