يا إخوان ... من يساعدني في حل مشكلتي الكبيرة والمحيرة مع سيارتي الماركيز

هلا وغلا أبو سعود

لمبة التشيك انجاين حالياً غير مضاءة ... لكن ما اخفيك دائماً بعد كشف الكمبيوتر في الورشة مباشرة تضيء وبعد كم يوم تطفي من حالها .. وش تتوقع السبب منه ؟

شكراً لمرورك

شكرا لمرورك وتعقيبك مرة أخرى

لكن بصراحة أنا احترت الآن بين التشييك على تركيب الثلاجة وبين فحص حالة الكويلات اللي ما أظهر الكمبيوتر أي خلل فيها ما عدا 3 و 8 على حد قول صاحبنا الفلسطيني
وللأسف إني بعد جولة سريعة في النت على المواقع اللي تهتم بالفورد اتضح لي أن أغلب أجهزة الكمبيوتر لا تستطيع تحديد ضعف الكويلات من عدم ذلك
وهذا الكلام قاله لي كهربائي سيارات قديم ومشهور عندنا في مكة وتخصصه كويلات وتنظيف بخاخات بس ما عنده كمبيوتر ... بعد ما فحص لي سيارتي قال : حل مشكلة سيارتك واضح وهو إنك تغير كل الكويلات مع البواجي ( تصفية كاملة يعني )

وأخوك محتار الآن

أما سالفة الزيت ... فجميع اللي حكيت معهم سالفته قابلوني بالضحك وقالوا : سلم لنا على صاحبك بس وقل له يستريح

هلا والله اخوي MTS
أنا والله اللي تشرفت بمداخلتك التي اتفق معها كثيراً ولو تقرا ردي اللي فوق راح تكون الصورة عندك اوضح

مشكلة الفني هذا انه شخص حقير بمعنى الكلمة وشايف نفسه على ايش ماني داري ولا قسما بالله كل مرة اجي لعنده وانا مشحون ومرات ودي اتضارب معاه ... لانه احس انه مو مخلص وصادق وقسما بالله ما استبعد انه متعمد يعدم السيارة عشان اصير زبون دايم عنده
ما راح ارجع له ... لكن راح اشوف لي ميكانيكي صادق يشيك لي على ثلاجة المكينة ولو تطلب الامر فكها مرة اخرى وقسما بالله لو طلعت المشكلة منها اني لا أوريك فيه وأعرف كيف آخذ حقي منه

الف شكر على الرد أخوي وتقبل اعتزازي ايضا بك وبمداخلتك

يا هلا والله وغلا أخوي ... وسعدت والله بمرورك

ابقول لك شغلة ما قلتها فوووق في المشاركة الاولى ... بعد ما ركبت ثلاجة المكينة عند الفني قال لي : لازم ترجع لي بالسيارة بعد فترة اشيك عليها لو ما زبطت معاك .. قلت له ليه ؟ عندك شك ان شغلك مو مضبوط .. قال : لا بس عشان نطمن انه الراس ما تضرر من تهريب موية اللديتر ... وهذا الكلام اقلقني كثير

بعد كم يوم حصل معاي انه بعد تشغيل السيارة صار تفتفة ورجة قوية جداً في السيارة وهيا واقفة وريحة زيت او بنزين محترق .. وسبحان الله وقتها ما كنت في مكة كنت في المنطقة اللي اعمل فيها وهي اشبه ما تكون بالقرية قلت : الله يستر شكل المكينة خبطت
لكن من حسن الحظ كان فيها ورشة اتراك ... رحت للمعلم الكبير الشايب عندهم ... قال لي : انا ما في يدي الا اشيك لك على شيء واحد واذا ما ضبطت ما لك الا تشيلها على سطحة للوكالة .. وفعلا شيك على ( لي الهوا ) اللي يشبك في بلف لونه ازرق في طرف المكينة وبالفعل طلعت منه مشكلة التفتفة القوية قام ولّف لي واحد من عنده مؤقت واختفت التفتفة القوية اللي قلت لك عليها ... ويوم رجعت مكة ركبت ( لي ) اصلي قيمته 130 ريال ...

لكن ما زالت التفتفة اللي مع بداية دعس ابنص البنزين وضعف العزم موجودة واللي هيا في نظري المشكلة الرئيسية

الشاهد من كلامي هذا كله زي ما قال الاخ العزيز MTS المشكلة اعتقد والعلم عند الله ما لها علاقة لا بكويلات ولا يحزنون ... وإنما من طريقة تركيب ثلاجة المكينة اللي اتوقع انه فيها شي غلط والدليل كل المشاكل هذه ما طلعت الا بعد ما ركبت ثلاجة المكينة ولا قسما بالله قبل ما اغير الثلاجة السيارة من ابدع مايكون من جميع النواحي ما عدا مشكلة التهريب

مرة اخرى تحياتي لك وشكرا جزيلا لمرورك

مساء النور أخوي طلال

والله يا أخوي ما عندي شك أبد في أنهم نصابين حقين المجمع الآلي ... لكن أنا محتار وما أدري وين أروح ... لأنه اذا انت صاحب فورد تعرف معناتنا في مكة من قلة ورش الفورد المتمكنة واللي عليها الكلام ... ماعندنا غير هذاك الفلسطيني النصاب اللي ما عنده ما عند جدتي وهو اللي نكب لي سيارتي الله لا يوفقه ... لكن سبحان مقسم الأرزاق

الله يجزاك خير على الرد والإفادة ... وبإذن الله راح أمر على المهندس يوسف في أقرب وقت