السلام عليكم
كيف حالكم
انا اشتريت سيارة رينو فلوينس الجديدة وانا من البحرين يعني الكلام الي راح ينقال هو عن الي في البحرين مو محل ثاني
اولاً انا استلمت السيارة تاريخ 14 رمضان وهو تاريخ مميز لانه يكون ليلة النصف من رمضان و هناك احتفالات في البحرين بهده المناسبة
اشتريت السيارة بمبلغ 5200 دينار بحريني .... مبلغ حلو بلنسبة الى حجم السيارة و المواصفات الي فيها
السيارة من فئة LE فيها كل شيئ تقريباً ما عدا فتحة سقف و الكراسي ليس جلدية "قماش" و بها مفتاح وليس ريموت
طبعاً انا مشيت بها حالياً 5077 كيلو متر وراح اعطيكم فكرة عن السيارة
اولاً المميزات:
1-محرك السيارة هو نفس محرك النيسان تيدا 100% 1.6
2- المكيف الصراحة مكيف جبار ولا يعلى عليه وهناك ايضاً تكييف خاص للركاب في الخلف بس انا ما استخدمتة كثير لان المكيف اساساًُ بارد جداً ويبرد السيارة مهما كان الوقت "في عز الظهر مثلاً"
3- الراحة اثناء الجلوس والقيادة فيها .... الكراسي جداً مريحا وتخليك تبغا تقعد في السيارة اكبر مدة تقدر فيها
4- الثبات ممتاز الصراحة وينافس السيارات الي حتى اكبر منها
5- جودة المواد الداخلية .... المواد ذات جودة عالية جداً واعتقد مثل او تنافس سيارات فولكس واجن ... القولف خصوصاً
6- الوكيل ممتاز و عملو لي صيانة الـ1000 و 5000 مجاناً
7- المواصفات الكثيرة
بس كل شيئ له سلبيات
السلبيات:
1- في اول 3000 كيلومتر تقريباً كانت السيارة ثقيلة جداً في القومة "بداية المشي بعد التوقف" بس حالياً صارت احسن بكثير من قبل
2-السيارة ليست معمولة من اجل سباق ولا تصلح للسرعة العالية بل هي سيارة مريحة في المرتبة الاولى وتصلح لمن يقع في الازدحامات الكثيرة او حتى من يقطع مسافات طويلة فهي مريحة جداً في هذه الحالات
3- العزل الارضي سيئ نوعاً ما مع ان العزل الخارجي جيد جداً الى ممتاز
4-السيارة خشنة قليلً نوعاً ما في المطبات .... بس حالياً صارت افضل من قبل
5- قلة المساحات التخزينية ... الكل يتذكر رينو ميغان وشلون كانت المساحات التخزينية فيها بس في الفلوينس الامر مختلف
بلنسبة الي السيارة فوق المتوقع بكثير و لو رجع بي الزمن الى ورا راح اشتريها بدون حتى النظر الى المنافسين
سيارة بلفعل بلفعل تستاهل كل شي دفعتا فيها وانصح اي شخص يفكر في الكوريلا مازدا3 و السيارات الي من هذي الفئة انا متاكد ان الفلوينس راح تعجبة
وانا احس السيارة قوية وتتحمل وعندها صبر
و السيارة مناسبة جداً مقارنة بسعرها
و احس السيارة قاعدة تنتشر عندنا شوي شوي و الناس قاعدة تقتنع بماركة الرينو اكثر واكثر
اي استفسار انا مستعد اجاوب عليه
