فورد أو كيا... الفزعة يا أهل الفزعة!!

هلا بك فيصل مرة ثانية.. والله الاكسبلورر مرددني عنه بعض الشباب يقولون فيه خرابات... مدري
أما عاد الشكل الجديد دفع أمامي...قوووووووووووية... أجل باي اكسبلورر 2011

التوريس ياخي حسب ما أذكر يقول 160,000 ياخي شي مو معقول أبداً.. وتراه جا على بالي بس السعر!!!

صراحة إن ردك يبرد الخاطر... الكوري فعلاً لمعة بس والله الكادينزا تغري... ياخي لو تسمع مكينتها تقول موستنق.. هذا و السعر المناسب... ياخي ما أدري ليش ماني مقتنع أشتري سيارة سيدان فوق المية ألف... أما الاكسبلورر لي يومين أقدم رجل و أرجعها... واحد يشجع و واحد يخوفك منها و يقول خرابات و يشتكون منها لكن جربت سيارة مديرنا 2007 ... والله موتر لأني لي 10 سنوات على كامري 2000 قير عادي فحسيت بالفرق مع الأمريكي...
أما الألوان فالؤلؤي غير متوفر إلا في الفل أبشن أم البرتقالي فهو من الألوان الغامقة مع إنه جديد..
أنا أفكر في الفضي.. لكن خلنا نتخذ القرار أول!!

وعلكيم السلام

يجب ان تكون من نفس الفئة

على العموم

اذا كنت تحب طلعات البر و عائلتك كبيرة خذ اكسبلور

اما اذا كنت لا تهوى طلعات البر و عائلتك صغيرة خذ لك كيا

والله أعلم

نصيحتي فكر بالهونداي سنتافي, السيارة معي من 2007 وما صرفت عليها غير بنزين وزيت. وهذه السنة بدلت القطع الاستهلاكية (كفرات, بواجي, فحمات, وفلاتر) فقط ولله الحمد ماشفت منها أي أعطال. سيارة ناعمة جميلة الشكل, وسيعة وقيادتها ممتعة والأهم ان سعرها يبدأ من الثمانينات.

نصيحة تشوفها بالوكالة او لو تقدر تجربها خاصة ماكينة 3.5 ليتر ورح تدعيلي

بالتوفيق مهما كان اختيارك.

صور السيارة

فورد اكسبلورر شايف اعلان انه بـ81 او 91 والله ناسي بس اتوقع انه 81 المديل الجديد من الوكالة واكيد انه افضل من الكيا بمراحل
واهم شيء استخير واذا بتاخذ الكيا السوناتا افضل منها بكثيييييييييييير

السلام عليكم ورحمة الله وبركاته
وبعد ....
(اعذروني يااصحاب الكيا والهيونداي للاسف هذا هو الواقع ) كلامي ماراح يزيد عن طالب مشورة الا كلمتين بس نصيحه لاتاخذ كوووري والله يعقدك
ولد خالتي معاه سوناتا كل 3 ايام رايح الوكاله مرة جلدة البنزين ومرة الدينمو ومره فتحة السقف ماتفتح مشااااكل تـــشيب شعر الراس وصديق لي اشترى لسواقه كيا كارنفال العائليه والله ماتقعد معاه فلوس كل شوي رايح الوكاله وهذا غير مخالفات ساهر الله يهديهم
وبعد كل هذا الصناعه الكوريه تغري الناس بالشكل والمواصفات الداخليه المعدومة
وراح تندم مليونين % لو تاخذ كووري
تحيـــــــاتي

واضح من كلامك اخوي انك مايل للأكسبلورر اكثر

و الشكل الحالي لا غبار عليه و سمعته ممتازة في السوق

واتوقع بعد نزول الشكل الجديد سترتفع اسهم الشكل الحالي بحكم ان الجديد دفع امامي

و مثل ما قلتلك في ردي السابق شوف انت وش تبي من السيارة وشوف اي السيارتين تلبي احتياجاتك اكثر


*طيب ليش ما تفكر في منافس الكادينزا من فورد و هي التورس

اتمنى لك التوفيق

انت عارف ان سعر اكسبلورر 2011 يجيب لك حبتين 2010 ..

سلاااااماااااااات يالربع .. دبل قيمة القديم على أيش .. انا بصراحة ضد من يدفع هذا الفرق مقابل تغيير الشكل..

شف حبيبي .. نصيحة لوجه الله تعالى ( ولا يزعل مني باقي الشباب ) .. سيارات كورية لا تاخذها ولا تفكر فيها .. لو يضمنها لك الوكيل مليون كيلو ..ومن واقع تجربة ( راكب ) كأنك راكب صندقة :bigggrin:

اللي يمدحونها أكيد أنهم شارينها جديدة .. وبالتالي أي سيارة جيدة بتكون حلوة..بس تعال اسألهم بعد سنه وتشوف كيف هم متندمين ( ولو أنكروا) :smilie16:

أبغاك تزل المعارض وتشوف أسعار الستعمل منها كيف طااااايحه .. ولا حد يقول وين مفتاحها ..

بينها الأمريكي .. سيارة معتبرة .. ولها وزنها في السوق .. ولها قوتها
أنا بنفسي وقفت على سيارة يوكن مغرز في الثمامة وجا جيب كروزر يبي يسحبه وغرز .. وأخيرا جا اكسبلورر اظن 2006 وسحب الأول ثم سحب الثاني ..

غير كذا .. انزل بها المعارض ,, والله ما تشوف الا شمغ الشريطية تتطاير على قزاز موترك


الألوان : خذ لك لؤلؤي ..أو برتقااااااااالي ... بصراحة لون خرافي .. ولا تاخذ لون غامق ابد

والقرار الأخير لك بعد الإستخارة .. واتمنى لك التوفيق

أنا بغمض عيوني عن الكادينزا بس ياخي اللي يخليني أتراجع و أعود أفكر فيها يوم شفت شكل الاكسبلورر الجديد.. والله قهر تشتري 2010 و 2011 بهذا الشكل الفتان.. لكن مشكلته غالي ولاني حوله أبد... عشان كذا أرجع أفكر في الكادينزا لأن شكلها من التصاميم اللي الجديدة زي الاكسبلورر 2011.. و أجرع في نفس الدوامة!!

طيب وش أحسن يا شباب للاكسبلورر 2010... الأسود أو الفضي؟؟

مشكور أخوي فيصل على المرور و الإضافة الممتازة.. أنا راسي بينفجر من كثر التفكير
المهم أنا عائلتي صغيرة ... أنا و الزوجة فقط.. لكن الكادينزا شكلها شبابية أكثر منها عائلية
أنا ما فكرت يالاكسبلورر إلا بعد ما شفت عرضهم و سعره المناسب بالنسبة للجيوب... الجيب مغري لكن المشكلة ما جاء العرض إلا على وقتي و وقت 2010.. آآآآآآآآآآآآآخ بس لو جا على 2011..
الكادينزا جميلة من حيث الشكل الجديد و المواصفات الجديدة و الحركات الحلوة.. لكن زي ما قال لي واحد من الشباب... تبغى تعرف قيمة سيارتك.. أول ما تشتريها نزلها المعارض و شف كم بينزل من قيمتها و أيها بتمسك قيمتها... الفورد له أسمه و معروف.. و الكيا توها داخله السوق بقوة... ما ندري وش يصير بكرة!! أنا الظاهر باخذ الاكسبلورر و ان شاء الله يتم الموضوع على خير

حبيبي .. غمض عيونك وخذ اكسبلورر

كيا لا يغرك لمعتها في المعرض .. والله بكرة تجي تبيع وتنشب في نحرك ..

و عليكم السلام ورحمة الله

اخوي السيارتين من فئة مختلفة عشان كذا الاختيار راح يكون على حسب استخدامك للسيارة

وعلى حسب عدد افراد العائلة

الاكسبلورر يشيل 7 اشخاص و الكادينزا 5

الاكسبلورر مناسب للرحلات البرية لكن الكاديزا افضل في المدينة و الخطوط بحكم انها سيدان

الاكسبلورر سيارة معروفة وشكلها اصبح مستهلك و عادي و الموديل الجاي راح يتغير

الكادينزا شكل جديد و ملفت

الاكسبلورر وكيله افضل من الكادينزا
مع العلم ان الاكسبلورر معروف و ممكن تصلحة برا الوكالة بعكس الكادينزا سيارة جديدة على السوق

في الاخير حدد انت وش تبي من السيارة

اذا كانت عائلتك اقل من اربع اشخاص و منت راعي بر انصحك بالكادينزا
اما اذا كانت عائلتك اكثر من اربع اشخاص انصحك بالاكسبلورر


اتمنى لك التوفيق و مبروك مقدما

تكفون لا تخلونا!!

ودي بالجيب لأنه رسمي و رفيع لكن أحس زي ما قالوا الشباب أنه تصريف للموديل القديم
أما الكادينزا حاجة حلوة و حركات و موديل السنة لكن ما تحصله الحين لأنه مقطوع و أحس داخليته حقت شباب أكثر منه عائلي...

الحل يا أخوان؟

كيا كادينزا