هل تسقط الكامري والأكورد أمام اللومينا لأنهما دفع أمامي ؟ سؤال تقني !

اخوي مهند

اضافه الى ما ذكرت لك سابقا، بقي ان اذكر لك ان الدفع الامامي يعيبه العكوس وخصوصا الكامري ستجد التفاصيل في هذا الرابط:

http://www.assayyaratnet.com/forums/showthread.php?s=&threadid=25136

تحياتي،،،

انا اقول الاكورد مشيها مزبووووووط وفيها قوة وصارلها 3 سنين عندا والحمد لله يعني ييحين ماصادها شي يسوى عكس اللومينا القير بسرعة يخترب
والكامري والله مادري عنها

اخوي عاشـ عبود ــق

كلامك صحيح .... الي ما يحبها يظهر فيها العيوب ... لكن الي ما يحبها من الاساس

الله يعطيك العافية

تحياتي

انا اقول من ناحية الامريكي والياباني طبعاً الياباني افضل

لاكن انكم تذكرون اللومينا انها فيها خرابات كثيره انا ماصدق

هالكلام واللي يقول ان اللومينا تكثر فيها الخرابات يذكر الخرابات

اللتي واجهته ويذكر كم كلفه كل خراب وماضن انكم تذكرونها

لانكم ماتملكونها !!!

اعتقد ان الخرابات هي خراب القماشات ومره وحده فقط؟؟؟!!؟؟؟


تحياتي اذا كترت واخطيت على احد..

اخوي مهند الخالد
انا مابتكلم على اللومينا انا بتكلم
على الامريكي والياباني
السيارات اليابانيه افضل من الامريكيه بمراحل عديده
وهذا كلامي لاني جربت الاثنين
تحياااااااااااااتي

والله يا شباب مشاركات تشكرون عليها لكن ما ادري كأني اشم ريحة التعصب دخلت في بعض المشاركات والدليل التضارب الكبير بين الآراء الحقيقة أنا كنت اتوقع ان اللومينا سيارة ممتازة ولا عليها ملاحظات لكني تفاجأت كثير يقولون أنها كثيرة خرابات والبعض يقول العكس لكن ما ادري وين الدليل على الكلام يعني اللي مجرب اعتقد حجته اقوا لكن اللي مو مجرب ولا يعرف مجرب عز المعرفة يمكن يكون متأثر بكلام غير صحيح والله اعلم ،،،

السلام وعليكم ورحمة الله وبركاته
اخي مهند الخالدي رأي في موضوعك هو ان الهوندا اكورد سياره روعه ولا فيها اي مشاكل وواسعه افضل من الكامري فأنا افضل الهوندا على الكامري بكثير وبالنسبه الى انها دفع امامي فأعلم بأن الهوندا هي من السيارت الاولى في الدفع الامامي ولا اعتقد بأنها صنعت من قبل دفع خلفي فهي من البدايه من اول ما صنعوها كانت دفع امامي غير السيارت الاخرى الي توها هذي لسنين مسوينها دفع امامي وأما بالنسبه الى الومينا فهذا مختلف عن السيارتين السابقتي فأذا اردت السياره كلاسيكيه وغير صرفيه في البانزين فعليك بالهوندا اما اذا اردت سياره عزمها قوي وشبابيه اكثر فعليك بالومينه
وعندي تعليق على الاخوان الذين يذكرون الومينه بالخرابات الكثيره فأعتقد بل انا متأكد ما في ولا واحد يملك لومينه من الذين يتكلمون بالخرابات لان انا عندي لومينا مديل 2000 وشاريها مستخدمه والى الان لم تصادفني اي مشكله ولله الحمد وغير انني قليل العنايه يعني حتى الزيت ما يتبد الا بالموت كل يوم على اليوم يعني بالعربي غير البانزين والزيت ماكو ويكون فالعلم انا من اخذتها الى يومك هذا لم ادخلها عند الوكيل نهائيا . فكيف لو كانت جديده على يد شخص واحد ويتحمل ويعتني بالسياره ,
(ما يدري عن الومينه الا الي عنده الومينه والي ماعنده الومينه اعتقد مقهور:mad: انه اخذ غير الومينه وما أليه الي يذكرها بسوء على قول المثل الي ما يطول العنب حامضا عنه يقول)
ولكم احترامي واعتذاري:cool::cool::cool:

الاكورد البدي حقها خرطي..!!!

زي ماقالك اخوي كامري...اغلب السيارات الجديدة البودي حقها ضعيف شوي..والامريكي القديم موب زي الجديد...من ناحية البودي ومن ناحية الخرابات بعد...بس ابتكلم عن الاكورد لانها معي ومجربها...الموتر راسي جدا...وسواقته مريحة لابعد درجة وفيه امان والبودي قوي....عشان كذا الموتر ثقيل...وتشوف قومته ثقيلة...

اللومينا...والله مدري وش اقول..!!،هالموتر احس ان اللي يشتريه المفروض يفتحون له ملف في شهار:D،ياخي الواحد يشتري موتر يريحه ولا يشتري موتر يغثه ويجيب له المرض والصداع والقلق ؟!،صدقني الخرابات تخليك تكره كل شي...واذا على القوة والعزم...خذ لك مكسيما اقوى من اللومينا...وشكلها حلو:)

الكامري...اعرف كثار معهم كامري جديدة...بصراحة ماسمعت احد يشتكي منها ولا من خراباتها...طبعا غير الصوت اللي يطلع...لكن صدقني اخذ لي اكورد او كامري سياحي ولا اخذ لومينا اس اس..!!


الخرابات تهد بلد;)!!




تحياااتي

شوفو انا اعتقد الافض من السيارات ذي هي الومينا احتمال عشني مجربها وعارفها زين اما الكامري سمعت الناس يشتكون منها والأكورت ماسمعت عنها ولا شي لا طيب ولا بطال لاكني اشوف الشكل القديم احلى بكثير من الجديد

خذ لك بي ام و ريح راسك .... و لو كان مستعمل قديم شوي تحصله وارد ياباني ,,, تاخذه و تروح فيه المريخ و ترجع و ما يصيبه شي باذن الله ,,,,

اخوي مهند الخالدي

والله انك صادق الامريكي في صلابته ما يتقارن مع اي سياره يابانيه



انا اصلاً ما اتوقع مثل هذا الحادث لان الاكورد سياره راسيه ومتماسكه

ولو كان فيه حوادث لا سمح الله ........ الاكورد افضل من الكامري واقوى هيكل

الله يعطيك العافية

تحياتي

أخي العزيز انت تتكلم عن امريكي موديل قديم شوي
ولد اختي معه كابريس 95 حشى هذي مو سياره عليها صدمات كنه صدام تريله ( مشاء الله تبارك لاصك عين الحين :D )

واحنا نتكلم عن سيارات موديل جديد
وزي مانت عارف ان اغلب السياره الجديده بديها ( خرطي )

انت تقول كامري لموزين صدمك على الرفرف اليمين
طيب انا كامري لموزين صدمني من الرفرف اليسار
انا كنت ماشي 40 واللموزين مسرع
شوف الصوره |5| :



أخي الكريم هل تعتقد ان اللومينا او الكامري او الاكورد ( 2003 ) هيكلها قوي
طيب هل تعتقد ان الصدام قوي زي الكراون فكتوريا القديم او الكابريس القديم او الكراسيدا

فيه فرق لذلك لاتقارن القديم بالجديد

تحياتي

مشكور اخوي كامري ما قصرت وانا الحقيقة راغب الاكورد بشكل كبير لكن المشكله لهم شهرين ما عندهم سيارات والدفعات محجوزة والله اعلم متى توصل لكن لازم ما نبخس حق الامريكي بنقطه مهمه وهي صلابة الهيكل انا سيارتي فكتوريا 96 فل كامل صراحه تمشي بالخط ما شاء الله كانك راكب سفينة في وسط المحيط كأنك على امواج منت على ارض وصار معي حادث نمت وانا بطريق سفر وكانت سرعتي لا تقل عن 150 صحيت فجأه على منحرف ما قدرت اعدل السيارة نزلت من انحدار 3 متر على الاقل يعني قفزت السيارة على الارض ارتطمت ودارت فوق صخور الحادث تتوقع بعده سيارة تشليح لكن كلفتني بس 5000 ريال والبدي ما صابه الا ظربة بسيطه كلفت 250 ريال الضرر كان اغلبه في بطن اليساره ،،،

تتوقعون لو مثل هالحادث على كامري او اكورد ايش بيصير ؟!

كذلك قبل شهر في تقاطع صدمني لمزين مسرع جدا لدرجة انه ضرب فرامل قبل وصوله لي ب 3 متر تقريبا وارتطم بسيارتي هو بالوجه صدم رفرفي الايمن انا توقعت السيارة منعدمة نزلت لقيت وجه الكامري صاير شورما اما سيارتي صدقوني كأنه واحد ضاربها بقبضة يده يعني عفط خفيف قدروه بالورشه يكلف 500 ريال بدون قطع !

هذا من واقع تجربه لكن انا اعتقد ان الهوندا اكثر رساوه ومتانه من الكامري ،،،

بسم الله الرحمن الرحيم

اخي العزيز : مهند الخالدي


بصراحه امرك هذا محير

حالياً استبعد رائي الناس ( في حبهم لسياره معينه ) وضعه على جنب

في الوقت الحالي انظر في الامر بنظره خاصه ( منك انت )

الياباني كما هو معروف انه يصبر اكثر من الامريكي

اذا تبي تشتري كامري
الكامري سياره بسيطه عمليه مميزاتها بسيطه
ولكن الجديده ( 2003 ) فيها مشكله مزعجه لأصحابها وهو الصوت الذي يظهر من جهة المرايا الجانبيه

اذا تبي تشتري لومينا
اللومينا رواده السابقين يقولون بها خربات نادراً ماتظهر ( ومن روادها اخوي الكبير الي باعها بعد 5 شهور من شرائه لها )
والجديده للاسف يقال انها سريعة الانحراف في اللفات القويه وليس زي 2002

اذا تبي تشتري الاكورد
الاكورد تتطورة وماعاد هي زي اول والمميزات حلوه
شكل متتطور فخامه رائع وشبابيه ويابانيه
اذا العيب الوحيد هو غلاوة قطع الغير
السياره جديده وماهي مستعمله
اذا كانت مستعمله نقدر نقول قطع الغيار غاليه ( لان ماهي غريبه ان تظهر خربات في سياره مستعمله )


اخواني ماكتب فوق هو رائي شخصي ولاحد يزعل :D

ان شاء الله ترسى على بر

والله يعطيك خيرها ويكفيك شرها مقدماً

تحياتي وتقديري

يعطيكم العافية شباب على مداخلاتكم القيمة والله الحقيقة انتم لامستم كثير من رغبتي الداخليه انا مرتاح جدا للاكورد لكن فقط وقفت عند نقطة انها دفع امامي علشان كذا سألت الخبراء في منتدى ورشة السيارات بخصوص العيوب التقنية للدفع الامامي خصوصا مع الزمن ،،،

اتمنى نسمع من الخبراء في الميكانيكا والف شكر للجميع ،،،

السلام عليكم
اخواني انا انصحكم بالاكورد لسببين فخامتها الداخليه
وافضلية القير
اما اللومينا ابعدو عنها بلا راحه بلا خرط
تراها مهي راسيه هي والكابرس تحوص بسرعه وخراباتها كثيره
وبلنسبه للكامري
سياره جديده والعيوب الي فيها بسيطه جدا
حتى الاكورد فيها عيوب بسيطه
والاختيار الاول والاخير
تحياااااااااااااااااتي

اخوي مهند ان عندي نفس المشكلة ميزانيتي حوالي الـ 70 ومحتار بين الأكورد والماكسيما.

على العموم نصيحتي لك انك تتجنب الامريكي لأنه صحيح سواقة الامريكي حلوه ومريح على الخط لكن خذ خرابات ومشاكل، وباختصار معروف ان الياباني اصبر من الامريكي بمراحل هذا واحد.

اثنين اللومينا صحيح ان سواقتها حلوه ومريحه على الخط وقويه وعزمها حلو لكن خراباتها كثيره.

بالنسبة للكامري شلها من راسك، الناس اللي تشتريها غالبا تشتريها لسببين الاول قطع غيارها رخيصه والثاني تجيب سعر عند البيع، اما غير كذا فالسياره مافيها زود، والموديل الجديد 2003 اكيد سمعت بمشاكله وعيوبه، اضف الى ذلك انهم زادو ارتفاع السياره بشكل كبير وهذا معناه ان الكامري اللي كانت من اول ماهيب راسيه صارت الحين اسوء من اول. باختصار الكامري تقدر تقول انها منظر يعني شكلها حلو وفخم وبس.

الاكورد ما قد سمعت احد يذمها او يشتكي منها بالعكس الكل يمدحها والموديل الجديد يقولون اوسع من الكامري من داخل والسياره راسيه وسواقتها حلوه وقيرها صار خمس سرعات ومكينتها صارت اقوى، لكن عيبها قطع غيارها غاليه وماتجيب سعر عند البيع. لكن الاغلبيه يقولون انها اصبر من الكامري فيمكن تهون سالفة قطع الغيار شوي.