هلا اخوي
تفضل الاجابه
اول شي ...
اللون الأحمر في الصوره هو عباره عن هواء قادم من العادم ..
والازرق الهوا الي داخل للمحرك ..
بس بيي واحد ويقولي اوكي شو فايدة الهوا هذا ؟؟
الجواب .. يا الحبيب هذا الهوا شغلته انه يدور العمود التوربيني الي موصل بغرفة الضغط الي فيها المروحه والي شغلها تدوير الهوا الي لونه ازرق مثل ما تشوف ...
واييني واحد ويسألني .. .. وبعدين بعد ما الهوا يدور العمود الي موصل به المروحة وين يسير الهوا هذا ...
الجواب .. يا الغالي .. هذا الهوا بعد ما يكمل مهمته وهي تدوير العمود الي فيه الشفرات ( المراوح ) يظهر دايركت ( علطول ) للعادم وتستمر ها الدوره ..
وبعد اييني ريال طيب يقولي بخبرك الحينه انا اسمعهم يقولون عادم 3 انش ولا 4 انش ممكن تقولي شو يعني لاني الصراحه دوخت من سوالف الشباب..
الجواب يا عزيزي .. انت فكر فيها كل ما كان الشي واسع انت تاخذ راحتك فيه صح .. بيقول هي .. اوكي العادم كل ما كان (((( مناسب ))) كل ما كان احسن .. بيقولي كيف مناسب انا ادري ها السؤال لازم يسئله
بقوله يعني اذا عندك سياره صالون وانت حاط في بالك كل ما كان اكبر العادم كل ما كان أريح بيقول هي .. برد عليه بقوله سير بطل المني فول ابركلك
واحد طيب شراتكم بيسألني .. يالحبيب اوكي انت الحين رمست عن هذا الهوا مال العادم ( الي لونه احمر ) اوكي الي لونه ازرق وين يسير ؟؟
بقولك با بعد عيوني الهوا الي لونه ازرق الي ياي من الفلتر بعد ما ينضغط بسبب دورة الشفرات الي يدورها هوا العادم ينضغط بشكل كبير لين ما تسمحله الفرصه عشان يظهر ويسير ويضغط على السلندرات وبهذا يكون مدخل وياه بترول أكثر وهوا أكثر ..
بيرد ويسألني اوكي انت قلت لين ما تسمحله الفرصه انه يظهر ؟؟ متى يعني
بقوله يا قلبي يوم يفتح التوربو عندك هني يبدا الهوا المضغوط يدخل للمكينه ..
بييني ياهل ويقولي عمي ملك التزويد اليوم شفت سياره عليها توربو قلتله كيف عرفت .. بيقولي سمعت صوته ؟؟
شو هذا الصوت ..؟
الجواب .. الصوت هذا عباره عن صوت البلو فال( صمام الأمان) وفيه منه نوعين نوع كاتم ونوع بو صوت بس الأفضل والأكثر امان النوع الكاتم وهذا الله يسلمك عباره عن الهوا الزايد عن حاجة المحرك او التوربو يظهره برع
وبسبب الضغط القوي تسمع الصوت هذا الي متخبلين عليه العالم
توني يابي بركب السياره .. ياني واحد ودق عليه الجامه !! يوم شفت ويهه عرفت السؤال .. قالي ياخي خاطريه اركب توربو بس ابغي اعرف يا الطيب هو مضر ولا ..
الجواب ..
أكيد مضر دام انه راح يزيد من عزم المكينه وبسبب الضغط على البساتن والسلندرات مع مرور الأيام لازم تتبدل دورياً ...
منقوووووووووووووووووووووول من منتدى الإمارات
