الخبراء والأعضاء ماهي وجهة نضركم عن رساوة الأكورد هوندى 6سلندر

zoomzoom6

قل .. ما نقارون اللومينا بالأكورد مهب الأكورد باللومينا .. عشان يصير كلامك متناسق ..:)

الصراحه اللي عاجبني بالاكورد انها من الخارج فخمه بس (لاني بس اشوفها بالشوارع)

بس اذا جربتها انشالله بيصير كلام ثاني

لو الواحد يفكر بعقلة يعرف يا ناس يا عالم من يقارن الهوندا باللومينا انا اقول الهوندا واذا تبغون تعرفون شوفو الهوندات القديمة الى اليوم تمشي في الشوارع على اكمل وجه ولكن اللومينا الموديل يقعد اربع سنوات ويختفي معد تشوفة في الشارع
مثال:كيا كلارس اول ما وصلت اكتضت الشوارع بها والان انقرضت كالدينصور

81 الف >>>>>>> 4 سلندر

90الف <<<<<<<< 6سلندر ..

بس الفرق 10 الف ..

بس الفرق في السيا رتين


السما عن الأرض

يا خوك خل عنك ماشاء الله على الاكورد ماشين تقريبا 230 على اكورد موديل 2000 وفي منعطف صعب شوي بس السيارة عينيي عليها بارده راسيه وزي
الصخره بس العيب فيها صوت الهوا اللي يدخل عليك في المقصورة مزعج
سوال الله يعطيكم العافيه
كم سعر الاكورد 2004 اربعه سلندر فل اوبشن

8
8
8
حفضك الله أخي الكريم ومايامر عليك عدو .. وأتمنى لك التوفيق في حياتك وأن يرزقك الله خير هذه السياره ويكفيك شرها .. أمـــين .. وتقبل تحياتي

أخوي المطرفي
السلام عليكم ورحمة الله وبركاته
انت تامر أمر هذي المعلومات اللي طلبتها منى وإنشاء الله أكون أفيدكم
1- العزم في السرعات ممتاز جداً في كل السرعات
2- بالنسبه للمنعطفات ما أ قدر أفيدك فيها لأن مافي منعطفات قوية بالرياض أكبر منعطف في الرياض U-turn ههههههههههه
3- بالنسبه لسؤالك ماهي أبرز العيوب ؟ انا حمد لله لما الآن مالاحظت عيوب فيها في فيها شي واحد لفت إنتباهي اللي هو لما تكون تسوق وفي راكب جنبك وجالس جلسه مائلة مو مستقيمه تولع عندي لمبه الإير باق تنبهني إن الإير باق ماراح يشتغل بسبب الجلوس الخاطئ
4- مستوى الجلد ممتاز جداً ومريح لأبعد الحدود
أتوقع كذا أكون جاوبت على كل الأسئلة أخوي المطروفي

وآسف على الإطالة
أخوكم
Accord V6

ياليت أخوي تعطينا بعض المعلومات من خلال تجربتك في قيادة الأكورد سته سلندر .. مثلا العزل في السرعات المتوسطه والعاليه .. الثبات في المنعطفات .. ماهي أبرز العيوب .. وعن مستوى الجلد

إي والله صدق إني صح النوم:D

السلام عليكم ورحمة الله وبركاته

أنتظر من زمان واحد يقدر يكتب ويرد بمعرفة شاملة عن الأكورد وأظن لقيت

اللي أبغى..........

بس رد سريع للأخ المطرفي >>> أولا أنا بعت اللومينا لذا مالسبب في رأيك

أني ارد عن اللومينا لأنها قعدت معي شهرين وبيعت وأشوف بعض الأعضاء

بالمنتدى ماكلينها وهم ماجربوها أبد يعني ليت في تجربة كل ساعة واحد يقول

خويي يقول احترق مع الراديتر واللي يقول طاح القير >> محد تكلم عن تجربة

محد جرب إلا راعيها وأنا كنت راعيها أحب أوضح بعض النقاط للي ماجربوها

وأ بسط كلام على كلامك أنك ذكرت أن السيارة اللي صارت لها مشاكل 2001

واللي تنعدم بها الرساوة كلها الموديلات اللي تحت بس في عام 2003 م

تلقى سيارة صح وياليت الأخوة الكرام بدال الدردشة عن غير تجربة يجرب موديل

2003 و2004 ويتكلم بصراحة دون تعصب لسيارة........

الأخ خالع وسكن والع:

قلت :الهوندا والياباني عموما معروف بقوة المكيف وقدرته الفائقة على التبريد
..يعني اللومينا فيها مكيف خلفي..لأكن اراهنك باللي تبي ان مكيف الاكورد يبرد السيارة بشكل افضل من اللومينا رغم عدم وجود مكيف خلفي..!!،مكيف الاكورد الكتروني مزدوج...يشتغل بلمسة ويضبط بلمسة وبامكان فصله للراكب الامامي بدرجة حرارة اخرى...مااعتقد فيه طريقة استخدام افضل الا ان المكيف يشتغل لحاله اذا احتر:)..!!


أولا الياباني المعروف بقوة التكييف سيارات شركة تويوتا إلا إذا في اعتراض

هناك أناس لايقومون بتعبئة فريون خير شر ولاحظ التكييف خاصة الظهر طبعا

كلها كامري ولاند من الأخير سيارات تويوتا .......

الأنظمة اللي ذكرتها بنظام تكييف الأكورد موجودة باللومينا وأكثر وعن التبريد

تبريد لومينا 2003 تقريبا نفس الشيء من الأمام متوازي مع الأكورد باستثناء

الخلف اللومينا أبرد ...

سؤال : أنت لماذا حكمت عن تبريد الأكورد أنه أفضل من اللومينا دون سابق

تجربة ... أليس هذا يدل على التعصب والعاطفة في كلامك !!

أريد منك تجربة لومينا موديل 2003 أي فئة ولا حظ الفروق ثم قم بالتحدث

وإبداء وجهة نظرك .


قلت :سالفة مؤلمة للعين...بامكان خفض اضائة الطبلون وتحطها بالدرجة اللي تبي...،حلوة شكل الارقام...تبيهم يحطون لك لاتيني ولا افغاني:rolleyes:..!!،بالعكس شكل ارقامه حلوة والمسافة ايضا مناسبة وموجود السرعة بالميل..،بصراحة انت اول واحد والله العظيم اشوفه يسب طبلون الاكورد...

أعلم أن هناك درجات في تخفيض الإضاء لكن لايميز الطبلون سوى إضاءته

الجميلة ، وعن شكل الأرقام نعم أنا أنقدها بشكل كبير .. وإن سألتم لماذا؟

اركب صابونة ولاحظ الطبلون اركب رودماستر ولاحظ الطبلون اركب وانيت جمس

ولاحظ الطبلون وكثير من هذي السيارات التي ستنسى، طبلونها يشبه طبلون

الأكورد تماما عدا الإضاءة ، وإذا أنت تقول أني أول واحد يسب طبلون الأكورد

فأنا لم أقم بالسب ، بل قم بالنقد ، وأظن أن هناك فارقا بين السب والنقد .

قلت : اهنيك على هالانظمة...!!،مدري بتفتح مرقص بالموتر انت..!!،بس سالفة اسرع ذي..يبيلها قعدة..انا اغير السي دي في ثواني ويشتغل بذمتك كيف قست الفرق بهالثواني...،ذا الامور الصراحة ماتهمني بشكل كبير لان الزبدة ابي شي يشغل الشريط بصوت حلو وصافي..بس على الطاري فيه زر بالاكورد يجيب لك 12 قناة اف ام واي ام بضغطة زر ويسجلهم على الراديو...علما ان واحد قايلي ولا والله ماحرصت عليه...لكن انتم لاعبين عليكم بهالخرابيط اللي تسميها انظمة :p

جزاك الله خير وعن مرقص ما مرقص احترم من تخاطب وقدر الموضع الذي تتحدث

فيه وعدم السخرية بشكل أو باخر ، وكيف قست الفرق بهالثواني ، أنا ما أتكلم

معك عبث أنا كنت أجرب السيارتين وكل كلامي السابق واللاحق عن تجربة

حيث أنني قبل ما أشتري اللومينا كان في خاطري أكورد وقم بتجربتها

3 أيام وعند ابن خالي فل كامل و جربتها وجربتها عند اخر، ولكنها لم تكن

مناسبة لي في أمور كثيرة أهمها الحجم وضيق المسافة من الخلف.

نعود إلى ماقلنا ، تقول عن الأنظمة وغير هذا ومن عبارتك :

( الامور الصراحة ماتهمني بشكل كبير لان الزبدة ابي شي يشغل الشريط بصوت

حلو وصافي ) ترجح الكفة للومينا من ناحية نظامها الصوتي.


قلت : مقود الاكورد ازرار بعد...مثبت وازرار للمسجل..اما الجلد كلهم سوا...،الركوب انا معك المقاعد قاسية بعض الشي..

نفس الشيء ولكن مقاعد الأكورد كما قلت قاسية بعض الشيء

لذا نرجح كفة اللومينا من ناحية الراحة ......


قلت : ترى بديت احس انك تكلم عن موتر ثاني...وش اللي تمشي 40 وتحس انك تطير..!!
من ناحية الرساوة...وزنية اللومينا فيه بلى حتى لاحظ مع اول تهويزة تلقى الموتر جايب فيك عقدة...واحد من الشباب اخذ لومينا حقت اخوه وراح فيها الشرقية...المهم يقول سواقتها متعبة حبتين يعني على اخر الخط تحس انك ماسك خط جدة موب الشرقية...وهو رايح بموتره(كامري2003 جي ال)...للشمال،يقول سقتها تقريبا 6 ساعات والله مامليت بس بدلنا الطارة عشان ابرقد..مع ان الكامري قير عادي..!!

مو تطير تحس أن السيارة خفيفة خفة كبيرة وكأنها ليست على الأرض

والله عن وزنية اللومينا ما يحكم فيها الا راعي لومينا والظاهر اللي قالك

هالكلام يا نقل عن شخص اخر والا من موديلات 2002 وتحت

لأن الثبات يختلف بين الموديلين بدرجة كبيرة لذا لاتضع أخطاء الماضي بالحاضر

والغريب انك تقارن قيادتها بكامري ( الحمد لله والشكر ) إذا في صدق بهذا

الكلام أرجع وأكرر الموديل الحديث من 2003 وطالع.

قلت : وبعدين انا مدري وش سالفتك مع الدفع الامامي..انا ماشوف فيه اي عيب...اللكزس اي اس 300 دفع امامي...هل معناها انها ميب راسية..!!،ولا اللومينا ارسى منها....معليش مالك امل..!!

تقارن الدفع الأمامي بالدفع الخلفي يكفي انه الأمامي تغير عكوسه اما

الدفع الخلفي الله يخليه لأهله قليل الأعطال قل ماسمعنا بأعطال.......

تقول ES300 الفئة ذي مثل الأفالون من ناحية الماكينة والجير واللي يسلمك

أفالون يمشي 200 عند منعطف وتزحف عليه السيارة ويضرب الرصيف

وتطير بالهواء وتنقلب كم قلبة بالهواء وتضرب النخلة وتسقط لمبة وتتقلب

على الأرض في هذا الحادث المأساوي مات قريب لي والسبب الدفع الأمامي

وخفة السيارة ، ولإقناعك أكثر جرب ماكسيما ( قريب لي ) يمر على المنعطف

ماشي 190 لولا الله ثم مهارته بالقيادة كان الحين ميت و ترك السرعة لأن عرف

أنه الدفع الأمامي مافيه خير بالثبات ، ولإقناعك أكثر أي سيارة دفع خلفي

أو دفع رباعي تمر سلام سلام على المنعطف المذكور سلفا ( تجارب شخصية )


قلت : وبعدين الاكورد موجود فيها نظامABS و SRS وTCS هذا حق الاتزان بالمنعطفات ومراقبة الكفرات الاربع..وEBD اظن اسمه كذا...

والاكورد فيها شدادات حزام اوتوماتيكية...يعني لما تقبع الله يسلمك وانت رابط الحزام يشد عليك اوتو عشان ماتطير انت وجبهتك وتطير القزاز:rolleyes:


هذي الأنظمة موجودة بأي سيارة من 80000 ألف وفوق يعني مافي تميز

وعن شدادات حزام الأمان ... يا أخي أنت قديم هذي حتى على سيارات

الواحد يخجل يذكرها عندما تتفاخر بهذا الشيء.


قلت : غير انها تقفل اوتو اذا فتحت الدرايش بالريموت او نسيت الموتر مفتوح...وصرفية الاكورد الاقل بكثيير من اللومينا...وصبرها وقوة تحملها...

الأنظمة اللي قلتها كلها باللومينا الحديثة وعن الصرفية الصراحة انت ظلمت

اللومينا في هذا الكلام ، أولا لأنك لم تقم بتجربتها وتكلمت عاطفة ....

اللومينا أقل صرفية من الماكسيما بكثير ولكن لا أستطيع المقارنة لأن جميع

الأكورد التي تم تجربتها 4 سلندر والأكورد 4 سلندر صرفيتها لانستطيع

أن نقول عنها معقولة بل أعلى من المعقول بقليل أما الستة سلندر أريد

أن أعرف كم تقطع إذا كان التانكي فل؟


قلت : والله اني راد على عجل ماودي الموضوع ينزل...الين ان شاء الله افضى من الاختبارات وافصلك الموضوع....لاني اشوفك مدحت اللومينا بزيادة واجحفت في الاكورد...(تراني راد على شان اقول اجحفت :D)

مشكور مقدما على التفصيل الذي ستقدمه لي والصراحة الذي قمت به سرد

للوقائع وليس مغالاة ومدح وإجحاف بالأكورد بالعكس الأكورد سيارة عملية

ولا أحد ينكر ذلك ولكن هذي مقارنة بين السيارتين في مواصفاتهما.


قلت: اخوي ترى الدعوة مواتر ماتسوى...مدري بس شكلك معصب ومتنرفز...

أنا أعلم بأنها مجرد سيارات ولكن أردت من هذا الموضوع وضع النقاط على

على الحروف ليعلم كل شخص ويعرف ماهي مميزات وعيوب السيارات التي ذكرت

وعن أن شكلي معصب ومتنرفز :mad:

أحس أنك ظلمتني بالعكس أنا أستمتع عندما أرى شخص يواجهني بنظرياته

و ارائه فهي من الأمور الممتعة بالنسبة لي في المنتدى

تحياتي لكم

صح النوم ..

أكيد الحين غيرت رايك |3|

أكورد وشو الي ليش تراي توي أنتبه

ياخي إلى متى وأنت منسم .. :D

الله يرجك .. :D

ننتظرك بفارغ الصبر أخوي ..

بصراحة انا ماقد شفت لومينا فل كامل عشان اقولك من افخم:)،لكن اللي اعرفه ان الاكورد فخمة من فئتها...وصدقني انا قبل مايكون معي اكورد كنت اقارن بحيادية بين المواتر لان اخرتها بدفع مبلغ في سيارة العمر..!!،ماعلينا..اللي ابي اوصله ان شكل الاكورد من تخشيبة وديكور وغيره...يوفر رفاهية مناسبة لفئتها...



الهوندا والياباني عموما معروف بقوة المكيف وقدرته الفائقة على التبريد..يعني اللومينا فيها مكيف خلفي..لأكن اراهنك باللي تبي ان مكيف الاكورد يبرد السيارة بشكل افضل من اللومينا رغم عدم وجود مكيف خلفي..!!،مكيف الاكورد الكتروني مزدوج...يشتغل بلمسة ويضبط بلمسة وبامكان فصله للراكب الامامي بدرجة حرارة اخرى...مااعتقد فيه طريقة استخدام افضل الا ان المكيف يشتغل لحاله اذا احتر:)..!!



سالفة مؤلمة للعين...بامكان خفض اضائة الطبلون وتحطها بالدرجة اللي تبي...،حلوة شكل الارقام...تبيهم يحطون لك لاتيني ولا افغاني:rolleyes:..!!،بالعكس شكل ارقامه حلوة والمسافة ايضا مناسبة وموجود السرعة بالميل..،بصراحة انت اول واحد والله العظيم اشوفه يسب طبلون الاكورد...




اهنيك على هالانظمة...!!،مدري بتفتح مرقص بالموتر انت..!!،بس سالفة اسرع ذي..يبيلها قعدة..انا اغير السي دي في ثواني ويشتغل بذمتك كيف قست الفرق بهالثواني...،ذا الامور الصراحة ماتهمني بشكل كبير لان الزبدة ابي شي يشغل الشريط بصوت حلو وصافي..بس على الطاري فيه زر بالاكورد يجيب لك 12 قناة اف ام واي ام بضغطة زر ويسجلهم على الراديو...علما ان واحد قايلي ولا والله ماحرصت عليه...لكن انتم لاعبين عليكم بهالخرابيط اللي تسميها انظمة :p



فيه النور البرتقالي الصغير الي قدام...هذا من جد معطي شكل حلو...وخاصة بالخطوط تحس انه يعطيك رومانسية<--- واحد يسمع بالرومانسية..،وشاشة الاكورد كبيرة شوي ولونها حلو وشكل من ناحية مؤشر الصوت ومبين السيديات وغيره رائع جدا ومعطيها منظر حلو..،غير النور الخلفي اللي يجي فوق الركاب اللي ورا موب زي باقي الياباني بالوسط...ولاعتبرها ميزة بشكل كبير...لكن مجرد ذكر فقط..


مقود الاكورد ازرار بعد...مثبت وازرار للمسجل..اما الجلد كلهم سوا...،الركوب انا معك المقاعد قاسية بعض الشي..


ترى بديت احس انك تكلم عن موتر ثاني...وش اللي تمشي 40 وتحس انك تطير..!!
من ناحية الرساوة...وزنية اللومينا فيه بلى حتى لاحظ مع اول تهويزة تلقى الموتر جايب فيك عقدة...واحد من الشباب اخذ لومينا حقت اخوه وراح فيها الشرقية...المهم يقول سواقتها متعبة حبتين يعني على اخر الخط تحس انك ماسك خط جدة موب الشرقية...وهو رايح بموتره(كامري2003 جي ال)...للشمال،يقول سقتها تقريبا 6 ساعات والله مامليت بس بدلنا الطارة عشان ابرقد..مع ان الكامري قير عادي..!!

وبعدين انا مدري وش سالفتك مع الدفع الامامي..انا ماشوف فيه اي عيب...اللكزس اي اس 300 دفع امامي...هل معناها انها ميب راسية..!!،ولا اللومينا ارسى منها....معليش مالك امل..!!



الكامري صناعة يابانية وتجميع استرالي...عشان كذا قطعها رخيصة...ولاتصنع في استراليا...


وبعدين الاكورد موجود فيها نظامABS و SRS وTCS هذا حق الاتزان بالمنعطفات ومراقبة الكفرات الاربع..وEBD اظن اسمه كذا...

والاكورد فيها شدادات حزام اوتوماتيكية...يعني لما تقبع الله يسلمك وانت رابط الحزام يشد عليك اوتو عشان ماتطير انت وجبهتك وتطير القزاز:rolleyes:


وسالفة الخلل...هذا في الستة سلندر بس اولا...والمشكلة في مضخة البنزين..فيها ضعف الله يسلمك...وتخلي الموتر يطفى بعض الاحيان لحاله...وانا من شريت الموتر لين صلحت الضعف...والله ماطفت ولا مرة...يعني شف الهوندا رغم الضعف الا انها تؤدي الغرض بشكل سلييم ولا يلاحظ اي شي..

غير انها تقفل اوتو اذا فتحت الدرايش بالريموت او نسيت الموتر مفتوح...وصرفية الاكورد الاقل بكثيير من اللومينا...وصبرها وقوة تحملها...وعدد من الاشياء لكن والله اني راد على عجل ماودي الموضوع ينزل...الين ان شاء الله افضى من الاختبارات وافصلك الموضوع....لاني اشوفك مدحت اللومينا بزيادة واجحفت في الاكورد...(تراني راد على شان اقول اجحفت :D)

واخوي ترى الدعوة مواتر ماتسوى...مدري بس شكلك معصب ومتنرفز...



لي عودة باذن الله..

واحد كاتب عن اللومينا بأحد المنتديات ,, شوفوا تجربته مع السياره





أخوي wal416 والله أكره مدح السيارة دون تجربة لمجرد المديح أو ان شكلها عجبني أو انها طرحت سيارة في القومة وانت داري بالشباب وحركاتهم.

أخوي بالنسبة للومينا إل إس 2001 أنا شخصيا سقتها وكانت على الزيرو وبغيت اموت فيها.
القصة باختصار اني صفيت الطبلون على 190 كيلو تقريبا ( أظن حادينها على هذي السرعة ) وفي منعطف كبير حسيت السيارة بتحوص عليه، وقررت أعمل لها اختبار وأشوف كيف السيارة راسية، ومسكت خط هاي وي وتاكد ما فيه سيارات خلفي أو امامي وصفيت الطبلون ( 190 كيلو ) وأنا بذيك السرعة لفيت الدركسيون يمين وشمال بشكل خفيف واذا بالسيارة كانها عايمة على البحر، حاولت بكل حيلي أثبت الدركسيون واوازنها بشويش وشلت رجلي عن دواسة البنزين لكن لك الله السيارة خلاص بعد كل هذي المحاولات فقد توازنها تماما وحاصت بذيك السرعة واخوك أخذ لفة ونصف ( الحمد لله جات على لفة ونصف بس )، لفة كاملة على الإسفلت ونصف لفة على الرملة في جانب الطريق ووالله كان بين آثار الكفر وعامود الكهربة شبر وشوي بالضبط بس ربك لطف.
وبس رحت شيكت ان العلة مي من ضغط الكفرات، واتصلت على الشركة مباشرة وقالوا انه السيارة ما فيها أي عيب وإنه طبيعي ما تكون السيارة راسية لأنها مرتفعة عن الأرض + خفيفة الوزن + غير مجهزة بنظام الفريويل.
المهم والله صرت ما اتجاوز سرعة الـ 80 كيلو من كثر الخوف، وفي وسط البلد كنت ماشي بسرعة 60 تقريبا والإشارة حمرت واللي قدامي الأخ فرمل فجأة رغم ان الإشارة بعيدة عليه، المهم اضطريت أهدي السرعة وأنعطف لليمين، وبس وعليها السيارة والله بغت تحوص رغم اني ما سويت شي!!!!!!!!
صرت أعمل إختبارات في السيارة مثل إن آخذ يو تيرن بقوة، وأكتشفت انها حرام نطلق عليها لقب سيارة، ولا ننسى قصة المدرس اللي توفى هو وزوجته في جدة عند الكبري المربع وكانت سيارته لومينا، وأظن ان السبب الحقيقي اللي تجاهلته التحقيقات للأسف هو ان السيارة غير راسية مطلقا ويفترض من المسئولين سحبها من الأسواق.


أخوي حتى تقتنع بكلامي سوي التالي:-
1- خذ لفة بقوة بسيارة اللومينا إل إس وشوف النتيجة وخذ نفس اللفة بسيارة كورولا أو كامري أو دايو أو اللي تحبه ولاحظ الفرق الكبير، بس انتبه تدخل في عامود كهربة أو تركب الرصيف الله يستر عليك.
2- أمشي بسرعة 80 وتخيل أمامك طفل أو جمل على بعد 10 أمتار وهدي السرعة وخذ يمين أو يسار بسرعة ( بس تأكد ان الخط فاضي لأنها بتحوص عليك 100% ) وعيد نفس التجربة بسيارة كورولا أو مازدا 323 أو دايو أو هونداي أكسنت حتى.

أخوي أنا أتكلم عن اللومينا إل إس فقط وما أعرف أي معلومة عن اللومينا إس إس لكن ينبغي عليك تسوقها بنفسك وتقرر.

أخواني القراء أرجوا كل واحد يقرى هذا المقال يسوي اختباراته على السيارة المذكورة ويكتب رأيه بكل أمانه وموضوعية، واذا طلع كلامي صحيح أتمنى نطالب بسحب السيارة من الأسواق السعودية ( لأنها مسحوبة من الأسواق العالمية أساسا )



وهذا واحد ثاني
بالنسبة للوكالة فهي في غاية السوء ، طبعا هذا الكلام بالنسبة للجميح - الرياض ،،، السيارة تدخلها عندهم ويقولون لك انههم بيبدون فيها بكرة ، وتجيهم بعد يومين تلقى سيارتك موقفة بالساحة حقتهم والشمس فقعت البودي واذا سألتهم وش صار يقولوا بدأو فيها ، واطلب من مديرهم ورقة لكي تشوف السيارة يعطيك ، واذا دخلت تلقى سيارتك واقفة تتشمس مع علب الزيوت والغبار ، وذا طلعت السيارة من عندهم يعني وقت الاستلام
يبيلك تاخذها للتلميع مباشرة واذا رحت تستلمها حاول تلبس أي ثوب قديم أو تكميلة قديمة لأنه بتلقاها من الداخل الله يكرمك كأنك بزريبة ، أثار بصمات اليد على الجلد وطبعات جزم العمال على الارضيات والغبار بكل مكان ، لدرجة اني مرة دخلت أشوف السيارة داخل الورشة واقسم بالله اني لقيت الهندي نايم بداخلها والأخ استغل انه السيارة مضللة بالكامل وانم فيها ورحت اشتكيت عليه محمد سليمان مدير الورشة وقالي مو معقول تعال ورني اياه ويوم شافه قاله ليش كذا انت مفصول ، ورجعت بعد 3 أسابيع ولقيت الهندي نفسه موجود ،،، عاد انا قلت يلعن ابو الواسطة الظاهر انه ولد الجميح بس متنكر بهيئة عندي ، ومدير الورشة يقول لي لا يهمك بنلمع لك السيارة ببلاش ، وبعد ما لموعها مع كل لفة أزرق من على الكرسي ، الظاهر انهم ملمعينها الجلد بزيت ,فوق هذا كله اذا حركت جسمي يطلع أصوات زقزت عصافير.
وبالنسبة لقطع الغيار فهي نار ، قبل فترة أخذت حفرة وانا مسرع والجنط 17 انش مايتحمل الضربات وانعفط على الجنط وحبل الكفر ، رحت شريت الكفر ب_ 1250 ريال والجنط بـ 800 ريال.

:mad:قاعد أرزز خشتي عندكم .. ومعطيني أشكل :D

شف أخوي لند كروزر .. لاتقعد تمدح سيارة بس عشانه معك .. طيب ليش ما تعكس الأيه .. طبعا لاتقول سيارتي كامله وما فيها عيوب .. بحكم إنها سيارتك أكيد فيها عيوب .. نبغاك تقولنا وشي .. الأكورد مافيهاعيوب غير الجلد صراحة متخلف وقديم ومستغرب بس ودي أعرف هل هو نفس جلد المواصفات الأوربيه .. ولا يمكن إنه عملي وطالع شكله كذا

:D لاند كروزر صراحه ليش الحماس لسيارتك .. بس يعجبني إصرارك ويدل على شخصيه واثقه

الأخ خالع وسكن والع أنتظر منك رد وللمعلومية أنا ماشوّهت سمعة الأكورد

أنا قارنت بين السيارتين فقط لا أكثر حتى الأفضلية ماحددتها لأن كل عضو

هو اللذي يستنتج من هي الأفضل.

الأخ أكورد وبس

الكامري يصنع بمصنع لتويوتا بأستراليا ( كلمة تصنيع تختلف عن تجميع )

وقلت : أما اللومينا فتصنع في مصنع هولدن .. وش جاب هولدن للشفر ..

أولا الشركة اسمها جنرال موتورز وليس شفروليه وهي الشركة التي اشترت

هولدن ( جميع الأسهم ) كما اشترت أسهم شفروليه وأسهم GMC وأسهم

OPEL وأسهم كاديلاك وأسهم دايو وغيرها من الشركات العريقة.

لذا تعمل كل هذي الشركات لجنرال موتورز

هل تعلم أن نظام الكلبسات لتركيب القطع الداخلية والاكسسوارات باللومينا من

شركة جنرال موتورز >> أبسط دليل اركب صابونة والا بيوك وتلقى نفس الكلام

باللومينا............

هل تعلم أن ماكينة اللومينا SS أمريكة الصنع والمسماة بـ LS 1 ..........

من المعلومات التالية نستنتج أن :

مقولتك وش جاب هولدن للشفر مرفوضة مطلقا لأنهما فرعان يقومان بخدمة شركة

واحدة ألا وهي جنرال موترورز.

قلت : حنا ما ننقد على اللومينا إنها تصنع في استراليا لأجل إنها استراليا .. بل لأنها تصنع في مصنع جديد على عالم السيارات وتنزل عندنا باسم اللومينا .. وهذا اللي مخلي كثير من الناس يتوهقون باللومينا ..

أتفق معك أن مصنع جديد علينا ( الشرق الأوسط ) بس قديم بأستراليا

واللي توهق باللومينا هم الذين اشتروها بأول الدفعات حيث تكمن بها

الأخطاء المصنعية التي تقع بها الشركت عند اصدار أول موديل ....

ألم يستدع عبدالله هاشم سيارات هوندا أكورد 2003 .. وصحّح المشكلة

ألم تستدع شركة BMW العريقة سيارات ميني كوبر لوجود مشكلة مصنعية...

هنا تختلف بحسب الوازع الخلقي فالشركات التي تحرص على حماية المستهلك

تقوم بشتى السبل للحفاظ على سمعتها وهذا مالم تفعله وكالات سيارات هولدن

بالسعودية .............

واللي صارت له مشاكل بالسيارة بالدفعات الحالية كلها من سوء الاستعمال

ولو تلاحظ أن ذكر المشاكل باللومينا ( الموديل الحديث ) قل مؤخرا بشكل كبير

ان لم توجد مطلقا >>> هات شخص اشتكى من لومينا موديل 2003 أو 2004

وهو يعتني بها أشد العناية.............. ( حجّة بسيطة )

قلت : أهم شي .. ترا ما بالقلوب شي .. ونقاشنا على سيارات لا أكثر ولا أقل .. يعني لا يصير بخاطرك شي ..

أكيد القلوب مافيها شيء وونقاشنا ماهو الا طرح وجهات نظر واثبات وقائع

بإذن الله خالية من تجريحات وعبارات مسيئة

نحمد الله على النعم التي رزقنا إياها

تحياتي لكم