السلام عليكم ورحمه الله وبركاته،،،
الظاهر أن الرجال يا أخوان يتكلم عن سيارة غير الكليو،،،
عرفت وشي السيارة، شي غريب بصراحة لأني قاعد أفكر جدياً بالسيارة هذي...
أبعطيكم كل اللي أعرفه عنها...وعموماً لو ما طلعت هي السيارة اللي يتكلم عنها، أقل شي استفدنا معلومه...
أسم السيارة Vel Satis
هذي صور لها..
من الداخل...
لحظه يا اللي ما اعجبك شكل السيارةالخارجي، لا تحكم، لا تستعجل، أبغاك تشوفها على الطبيعة...
سيارة ضخمة جداً، يعني من الحجم الكبير مثل المرسيدس واللكزس، تصميمها غريب، حلو، مميز...
نجي للمواصفات وطبعاً ما ارح اتفلسف واكتب من الكتالوج حق السيارة، راح اعطيكم المواصفات اللي اتذكرها وشفتها بعيني وشرحها لي ممثل المبيعات...
بسم الله نبدأ...
محرك سعة 3.5 ليتر بقوة 245 حصان حقيقية ( يعني السيارة راح تعطيك 245 حصان مع كامل الحمولة اللي هي خمس ركاب واعتقد اذا ما ني ناسي 60 كيلو جرام حمولة في الشنطة)
أنوار زينون وكشافات ضباب وأنوار ضباب خلفية
عشر (10) وسائد هوائية
نظام ABS (منع انغلاق الفرامل)
نظام EDB أعتقد ان اسمه كذا وهو يعني توزيع قوة كبح الفرامل اتوماتيكياً
نظام توزيع عزم دوران الكفرات عند انفجار احدها لا قدر الله، بمعنى انه اذا ضرب عليك كفر ما راح تدري عنه لان عزم دورانه توزع على باقي الكفرات..
حاصلة على خمس نجوم في اقسى اختبارات السلامة الاوروبية (نسيت اسم الاختبار)
مقاعد جلدية
مقعد السائق والراكب مدفأة وتتحرك بـ 12 وضعية
ناقل حركة أتوماتيكي مع امكانيةالتبديل يدويا (تيبترونيك)
تخشيب داخلي رائع مع شرائح ألومنيوم اروع
شاشة عرض داخلية رائعة بس نسيت اذا هي ملونة ولا لا
مرآة عاكسة كهروكرومية (تعتيم آلي)
مثبت سرعة مع تحكم بالدركسيون
تحكم كامل بوظائف المسجل والراديو من خلال الدركسيون
6 CD
مكيف ألكتروني مع امكانية فصل درجات الحرارة للسائق والراكب
مكيف خلفي بتحكم منفصل
ستائر جانبية للجميع وستارة خلفية
شنطة خلفية شفط
تشغيل السيارة وفتح الأبواب مثل كل سيارات الرينو الجديدة، عن طريق البطاقةالذكية اللي تخزن جميع رغبات السائق، من ضبط المقاعد، الموجة المفضلة للراديو واجهزة التكييف، يكفي انك تحط البطاقة الذكية بمكانها الانيق جداً، وكل شي راح يتبدل، وطبعا لتشغيل السيارة بعد ما تحط البطاقةالذكية، تضغط زر، واشتغلت السيارة، ولفتح الأبواب، والبطاقة في جيبك، قرب للسيارة وامسك مقبض الباب، وهب ،،،، افتح الباب، ولقفل الأبواب ابتعد عن السيارة ، وخلاص قفلنا، يعني بإختصار وبدون كثر كلام، مثل المرسيدس
الفرامل اليدوية أو اللي نسميها (الجلنط) عن طريق زر، مثل البي ام دبليو
فتحة سقف كبيرة وبسبع (7) درجات للتحكم بفتحها أو لرفعها.
بصراحة، من احلى المقصورات اللي شفتها بحياتي ومن غير مبالغة،،،
والله تعبت من الكتابة....
ممثل المبيعات تكلم كثير وشفت ازرار وحاجات كثيرة بس والله نسيت...
طيب نجي لسعر السيارة هذي...
كم تتوقعون؟؟ 200 ألف ريال؟؟!! 220 ألف ريال؟؟!!
لا، 180 ألف ريال؟؟!!
لا والله سعر السيارة هذي بالمواصفات المجنونةاللي ذكرت واكثر..
129000 ريال، ولاحظو انه بدون خصم وبدون أخذ وعطا مع ممثل المبيعات...
طيب سألت ممثل المبيعات سؤال، قلت له سيارة بالمواصفات هذي ليه سعرها كذا بغض النظر عن شعبيتها في السعودية؟؟ أكيد السيارة فيها عيب بالمكينة مثلاً، يمكن تكون مزعجة مثلاً، أو مو قوية، أو مو راسية أو أو أو...
مسك يدي وقال تعال...
طلعنا ووقعت على ورقة وصوروا رخصتي،،،
وياالله تجربة حقيقية للسيارة...
بسم الله....ومشينا وأن اللي اسوق...
تدرون وش صار؟؟
الرجال يقول لي ارجع للوكالة خلاص يكفي ورفضت وقعدت أنا وياه حوالي ساعة كاملة نلف بالشوارع،،،
شي خيالي ياأخوان، حرام سيارة مثل هذي قاعدة بالوكالة ولا احد يناظر لها
قوة جبارة، رساوة غير طبيعية (مشيت فيها إلى 160)، هدوء تام تسمع انفاسك معاه...
إلى هنا ويكفي اخاف اكتب اكثر وتقولون يبالغ ولا قاعد يسوي دعايه للسيارة مع انها تستاهل اكثر من مليون دعايه،اللي يبغى يشوفها من سكان الرياض يروح للزاهد اللي على طريق خريص...
نسيت اقول لكم، فوق هذا كله، عليها ضمان لمدة 3 سنوات أو 60.000 كيلو متر وكذلك عقد صيانة لـ3 سنوات أو 60.000 كيلو متر
يعني باختصار 3 سنوات ما عليك الا بنزين فقط، الزيت، البواجي، الفحمات، السيور، الفلاتر، وغيره على حسابهم..
آسف على الاطالة...
تحياتي...
