السلام عليكم ورحمه الله وبركاته،،،
أنا عضو جديد معكم في المنتدى، اسمي (جهاز انذار) |129| ، وحبيت احكي لكم قصتي مع الالتيما،،،
أنا شاب سعودي مكافح، طموحي بسيط جداً، وظيفة وسيارة.
الحمدلله، وبعد جهد جهيد وظلم أكاديمي ، ووجع راس، ومذكرات وبحوث، خلصنا الجامعة، وبدأت رحلة البحث عن الوظيفة، طبعا من واسطة لواسطة، ومن شركة لشركة ومن شخص لثاني، حتى وجدت بحمدلله الوظيفة التي تناسب طموحي وتتوافق مع تخصصي.
تحقق أول احلامي ولله الحمد، وبقي السيارة التي تشيلني وما أشيلها، طبعا طول الفترة هذي كنت استخدم الجمس حق البيت حتى (طفرت) من كثر ما أعبي بنزين يوم ورا يوم.
المهم...تقشف، وجمع للدراهم، وعدم مواكبة للتطور التكنولوجي (جوالي الرهيب) ، كمبيوتري بنتيوم 2 ، بس ما يخالف، كله يهون في سبيل تحقيق ثاني أحلامي.
المهم، وبعد سنوات من الجوع والتقشف (حشا فيلم مجاعة مو قصة سيارة) ، تمكنت من جمع مبلغ محترم جداً ولله الحمد، وقررت تخصيص مبلغ 65000 ألف ريال لشراء سيارة.
وبدأت رحلة النطنطة |151| والبحث عن السيارة المناسبة،
المكان : استراحة الشباب على طريق الشرقية
اليوم : الأربعاء
الوقت : الساعة التاسعة مساءً
النقاش : يدور حول السيارة التي سوف يشتريها (جهاز انذار) اللي هو أنا...
واحد من الشباب : يا اخوي مثل الكامري لا تدور، اقتصادية وعملية وقطع غيارها بالبقالة..
واحد آخر من الشباب : أقول بلا كامري بلا بطيخ، ماكسيما وانت مغمض، قوة وتحمل وشكل حلو..
واحد آخر من الشباب غير الآخر اللي قبله: اقول اعقل بس ، كورولا وبس، صغيرة وحلوة ورخيصة، وعلى قدك..
واحد من عيال النعمة اللي معنا بالاستراحة يتكلم الآن : أقول خل عنك سيارات الضعوف، خذلك أودي A8 الجديد ولا حوت ولا فياجرا، ولا تدري انتظر للسنة الجاية يتغير شكل المرسيدس، ولا تدري خذلك CLS الجديد حلو، ولا تدري..
أنا : بسسسسسسسسس أنت وياه |285|
ارتفع ضغطي منهم، كل واحد يبيني اشتري مثل سيارته، وولد النعمه اللي فوق هذا يبيني اشتري حوت ، أنا لاقي آكل عشان اشتري حوت .
مشاورات، نقاشات، استخارة، وفي النهاية، باثفايندر...مع انه متجاوز الميزانية المخصصة، بس ماهي مشكلة شلنا من ميزانية المدفوعات ، وحطينا بميزانية المشتريات..
توكلنا على الله، على الحمراني على طول.
أنا : السلام عليكم
الموظف في الحمراني (يرمز له بالموظف فيما بعد) : عليكم السلام ورحمه الله، تفضل.
أنا : زاد فضلك، كم قيمة الباثفيندر، الفل كامل.
المهم رد علي بسعر يخوف بس ما اذكره الحين.
أنا : خلاص خلنا على السياحـ...................، لحظه وش السيارة هذي؟؟!!
الموظف : هذي ألتيما الجديدة..
أنا : أبشوفها وارجع لك.
الموظف : OK
المهم شفتها واعجبتني مره،، ورجعت له..
أنا : كم قيمتها؟!
الموظف : السياحي قير عايدي 58000 ألف ، والتوماتيك بـ 63000 ألف، واذا جازم نسوي لك خصم.
أنا : توكلنا على الله أبي وحده سياحية قير أتو.
الموظف : واللون؟
أنا : وشي الألوان ( عشان اختصر الأجوبة ، اخترت لون أبيض لؤلؤي).
الموظف : فلوسك جاهزة ؟
أنا : سم، هذا شقا سنتين وشوي ولا تهون الجمعيات اللي كنت ادخل فيها.
الموظف : طيب ، خلاص فك الدراهم
وأنا ماسك فيها...المهم ان فكيتها ورحت للبيت ونمت قرير العين والموعد بعد يوم أو يومين لاستلام السيارة..
بعد يومين، وأنا بالدوام مشغوووول مره، دق الجوال، ورديت : نعم من معي..
الطرف الآخر : سيارتك الألتيما جاهزة....
أنا : ok ، جاي الحين...
وانطلق بسرعة البرق واحلامي تسبقني وتخيلاتي عن سيارة مريحة فخمة قوية واعتمادية و و و ...
وصلت، ودخلت ورحت للموظف وقلت له : أنا (جهاز انذار) وين سيارتي
الموظف : وقع هنا،واستلم، هذي الاستمارة وهذي بطاقة الملكية وهذا المفتاح، والله يعطيك خيرها ويكفيك شرها..
أنا : الله يعطيك العافية ويسلمك ويخليك لعين ترجيك و .....و.......و......
الموظف : خلاص يا اخوي رح قبل لا يمشي موظف التسليم.
هو قال كذا ولا ما قال واانطلق مثل ذاك اللي يقول (بيب بيب)
موظف التسليم : وقع هنا، وهنا، وهنا، وهنا، وهنا..........وهنا، خلاص خلصنا (اتوقع تسليم طيارة بوينج 747 اسهل من كذا) |268|
مشيت وقدمي ترتجفان، ها هو الحلم الثاني على وشك أن يتحقق..
فتحت السيارة، وركبت، ما شاء الله، يا زين ريحة الجديد...
بسم الله الرحمن الرحيم، وشغلنا السيارة..
الهندي اللي عند البوابة يعطيني إشارة الانطلاق بعد فتح البوابة،،،
القير من P إلى R إلى N إلى D ........................ وبسم الله انطلقت،
ولكن...بعد خمس دقائق من بدء القيادة، دمعت عيني
وأحسست بالندم.............
لأنني...
لأنني..................
لأنني...............
لأنني، ما اخذت فل كامل.............. :D
آسف، للإطالة، وثقل الطينة، بس سامحونا، نسمع بالمقالات الهزلية...
ولا تنسون تباركون لنا على السيارة،،،
تحياتي...
أخوكم،،
جهاز انذار
