ارجو المساعدة أهل الخبرة ( سيارة أودي والجير)

hfakhri @user_14374 · 31-01-2005

السلام عليكم ورحمة الله وبركاته

يا شباب , حبيت استفيد من خبرتكم في هذه المشكلة

عندي سيارة أودي A4 , شريتها جديدة في أواخر عام 2003 , يعني صار لها معاي سنة وشهرين تقريبا ( ماشية 21000 كم تقريبا) , وقبل كم يوم , بغيت اشغلها ,فاشتغلت لكن لاحظت أن عداد RPM ما يرتفع بالرغم من أني أدوس على الساليتر , وكانت شاشة العرض , تبين أن السيارة في EMERGENCY MODE

فنقلتها إلى الوكالة عن طريق سيارات النقل ( القلص) ,

فقال لي المدير أن السيارة تحتاج إلى GEAR BOX , علبة جير جديدة , وتكلف 3000 دينار ( 30000 ريال سعودي تقريبا ) , والحمد لله أن السيارة تحت الضمان وقال ان السيارة أيضا تحتاج قطعة في الماكينة , ما حفظتها وما اعرف وظيفتها ؟

سؤالي هو إذا تبدل الفير والقطعة الخربانة , ترجع السيارة لوضعها الطبيعي , ام تبديل القير ولو بواحد جديد يعني موت السيارة البطيء ؟؟؟

وهل تحصل هذه الحالة في السيارات الجديدة الأوروبية وتبديلها شيء طبيعي إذا كان هناك عيب مصنعي ؟؟

ولو كنت مكاني شنو تسوي ؟؟؟

hfakhri @user_14374 صاحب الموضوع · 03-02-2005

صدقت و90 % اعتقد انها عين إذا ما كانت 100 % , وخذيت ماء وضوء هذا الرجل , ورحت الوكالة صبيت الماء على السيارة , والله ييسر اللي فيه خير , أما عن الثرموستات فآنه اقولك قصتها كان هذا الرجل يسألني عن حرارة السيارة وشلونها معاي , وبينت له , وبعدها قعد يقول الكلام اللي يفلق الصخر والله المستعان , وانه اقوله قول تبارك الله قول ما شاء الله وهو ما راضي يقولها .

واكون ويالكم صريح , ماء وضوءه صبيته حتى على (الخاتم ) اللي عندي لأنه قد يتكلم ويقول انه ( ألماس ) , وعلى العموم ما اطول عليكم اوصيكم بأذكار الصباح والمساء ففيها حفظ من عيون الناس

وشكرا على ردودكم

فني سيارات @user_8460 · 02-02-2005

الصراحة الموضوع غريب حتى الثيرموا ستات مايخرب في السيارات الجديدة على الاقل تمشي 100.000 حتى تطلع مثل هذي العيوب

الله يعينك

mohammad 902 @user_10600 · 02-02-2005

غريب المفروض ان جير الألماني ما يخرب الا اذا مشيت عليه من غير زيت والغريب انك تقول انها خربت فجأة من غير ما تسوي شي
هذا يعني ان السيارة انصابت عين حارة حاول تحل المشكلة وان شاء الله ما تشوف شر

hfakhri @user_14374 صاحب الموضوع · 01-02-2005

مشكور اخوي وما قصرت

القطعة الثانية هي الثرموستات وهي ايضا بحاجة إلى تبديل , أما عن الضمان الجديد للقطع المسبدلة فللأسف ما يوجد

فني سيارات @user_8460 · 01-02-2005

hfakhri
الاودي ماعقبها شيارة ممتازه جدا ولكنها في نفس الوقت حساسة جدا وقطع غيارها نار
بما ان الجير بوكس على الضمان وهو جديد ويركب من الوكاله حاول ان تاخذ ضمان على الجير الجديد يفرق عن الضمان الشامل لسيارة
اما عن تبديله ما اعتقد فيه مشكله ماداموا هم متمكنين وتركيبة في الوكاله بترجع السيارة نفس ماكانت ويمكن احسن ولكن اذا كانت السيارة جديدة وحصل لها هذا الشي الواحد يخاف ينتهي الضمان وتخرب بتصير لك مشكله كبيره لك
من وجهت نظري صلحها وبيعها اذا رغبت في هذا الشي رغم ان تبديل الجير بوكس لايؤثر على السيارة مستقبلا
ولكن كيف ان السيارة مافيها شي ومرة وحده يخرب الجير وبعض القطع ايضا معاه فجاءة

-----------------
انا كانت عندي اودي موديل قديم استعملتها من احسن مايمكن بس شفت سعر السفايف و الدرام ويل صلحتها وبعتها على طول
سعر الفحمات بس 700 ريال صغيره الموديل القديم ؟؟؟