معقولة GMC به كل هذه القوة؟؟!!!

i-VTEC_2004 @user_10819 · 08-02-2005

السلام عليكم ورحمة الله وبركاته
اسعد الله مساكم جميعا
اليوم جيتكم ومعي تجربة مدهشة بالنسبة لي ( بالنسبة لكم مدري )
في الأسبوع الماضي يوم الأربعاء 2 فبراير 2005 بعد صلاة المغرب في مدينة الجبيل الصناعية... كنت ماخذ جمس الوالد عشان اغسله في المغسلة.
الجمس موديل 2001 قطعة 1500 ماشي ولله الحمد (125 ألف كم ) ما شالله تبارك الله.
وصلت عند اشارة كانت مولعة اخضر من فترة وجاي بلف يسار توني جاي بلف وإلا بهذا الكابرس خش علي خشة بغيت اجيب فيه العيد.
الكابرس موديل 2004 نوع LTZ V8 ما اعرفه الشخص.
المهم انا عصبت :mad: وقلت انا اوريك يابو الشباب.. وصلنا لأشارة تسمى ( المئوية ) وقف جنبي وكان ناوي قومة من حركاته.
قلت ابشر ... حطيت القير في الأول... اول ما لعت الإشارة وادعس ابو البنزين (وعينك ماتشوف إلا النور) الحين احنا مع بعض لحد 80 كم .. وبعدها بديت اسحب عليه اسحب اسحب اسحب لحد ما صار صدامه موازي لصدام الجمس الخلفي ويوم وصلت 160كم سلم علي وعايدني.. بعدها قفل الجمس على 180كم.
وانا ما صدقت جمس يقوم على LTZ V8 2004 . :eek:
غريبة |10|
ابي اشوف رأيكم يا شباب
اخوكم i-VETC_2004

رعبوبM @user_16070 · 20-03-2005

أنا أيضا معي جمس موديل 93 وأتصدقوا ياشباب أني طلعت على كابريس SS 96 وطلعت على كامري 2002 (جراندي) و جاريت مكسيما GV3.5 قير عادي
وبنسب لهذا الموضوع فأنا ماأستغرب شئ على الجمس

KING of HUMMER @user_18465 · 20-03-2005

والله شكل راعي الكابرس يستهبل ولا جمس يطرح كابرس 2004

i-VTEC_2004 @user_10819 صاحب الموضوع · 13-02-2005

السلام عليكم
حيالك الله اخي العزيز Binz
اشكرك على الرد
والله كلامك عين الصواب ... دائما القومات والسباقات تكون على السواق او على طريقة تبديل القير لأن فيها نوع من الفن.
وانا إلي سويته اني نزلت القير على النمرة الأولى ثم عشقته قبل لا يقطع بلحظات وهكذا ... بس في ذيك اللحظة ظهر عزم في الجمس غير متوقع غير لما يكون القير على D.
عموما اشكرك على مرور ومشاركتك.
==========
أخي العزيز كابـــSSـــرس
والله انا سألت عن كيفية فصل السرعة ... وقالي انه من يوم ما استلموه من الوكالة ( التوكيلات ) كان مفصول من أصل هو في البداية استغرب.
كان فاكر ان جمسهم يفصل على 180كم بس مرة هو ما يدري شاف العداد نزل على 190كم ودعس زيادة وكمل 200كم. وبس
وانا ودي افص لالجمس حقنا... بس الوكالة يعيون
وأغلب الورش ما يعرفون
على فكرة هو ساكن في الخبر.
تحياتي لكم جميعا

كابـــSSـــرس @user_6060 · 13-02-2005

اخوي الغالي i-VETC_2004 انت تقول ان خويك فاصل طبلون الجمس

طيب وين الي يفصل فيه هل هو في الدمام او الجبيل

لان الجمس عندي مطير ريحتي مايمديني امشي الى فاصل الله يقلعه

تحياتي لك

أبوطه @user_7017 · 13-02-2005

أخوي الغالي

خذها بالعقل ممكن تسبقه اذا كان السواق غشيم

ممكن لعب بالغيارات وبالتالي السياره تلكأت شوي

بس التحدي القوي

مثل ما قلت انك تستطيع تغلب الي أفضل منك

أخوي انا عندي باترول 94 وكان جمبي على الاشاره

باترول 2003 (( والقص صحيحه وانا كنت اسوق ))

طبعا صاحب الباترول (( شابين بالثانويه تقريبا ))

وكان صاحب الباترول من التحليه بالرياض

وهوه كل اشاره يعرض عليها وشايف نفسه

وبعدين قوف قدامي على اشارة التخصصي

عند الحديقه الجميله صارت الاشاره خضراء

وانطلقنا مع بعض

بس طلع هوه وراي ويبغى يلحقني

ما استطاع ابدا لانه كان حاط الغيار

الثالث وانا على الغيار الثاني

بس بالمقابل

طلع علي جمس الشكل القديم

بالخط والقومه وبكل قوه

يعني المسأله مسألت واحد خبير يقدر يطرح

اكبر فياجره صاحبها جاهل

تحياتي

i-VTEC_2004 @user_10819 صاحب الموضوع · 13-02-2005

أخي Nitro
تراني تعبت وانا افهم فيكم :confused: كل شوي واحد يقلي يمكن الكابرس يتمشى..يمكن الكابرس يمزح معك.
اذا كمت في قلب الحدث تعال تكلم.
========
أخي mortally
ياخوي انا اول جربت مع الفورد خط بدون قومة وانا رايح من الجبيل للدمام ..وسحبت عليه بالأكورد.
وجربت قومة طلع علي في البداية ما يحتاج اكرر اني تقدمت عليه عند 160كم وبعدين سلمت عليه.
تحياتي

mortally @user_10232 · 13-02-2005

يا شباب ممكن يكون كلام الاخ صحيح فالجمس قوي وعزمة قوي جدا فما بالكم اذا كان صاحي ونشيط واعتقد هو وضحلكم ظروف القومة وشلون صارت والرجال ما قال انة قام على الكابرس بدايو واما عن الاخ الي يقول انة قام على فورد وبالخط بعدالفورد هذا جحش ومايمشي يا اخي الفورد يطير بالخط اظن انة العداد مقفول مايصير هوندا 4سلندر وفورد 8 سلندر

Nitro @user_15896 · 13-02-2005

أخوي أنا أقول يمكن راعي الكابرس كان يمشي بسرعته الطبيعية ..وانت تحسبه يقاوم

هذا اللي انا اعتقد انه صار...

i-VTEC_2004 @user_10819 صاحب الموضوع · 13-02-2005

السلام عليكم
اخي ابو غامد
بدأت القومة من اشارة المئة عام ( الطريق السريع للجبيل ) وبس
======
أخي الرائد
الفورد لم يفصل على 165كم لأني بدأت اتقدم عليه عندما وصلت 160كم لحد 190كم اصبح موازي لصدام الأكورد الخلفي ثم دقرت الفورد.
ثم جنبنا على الخط وهو قالي انه فصل عنده ... حتى هو سيارته ممرنها كويس...وما توقع الأكورد كذا.
تحياتي

الرائد @user_16969 · 11-02-2005

والي يقولك اني مشلخ فورد 2000 بالأكورد حقتي 2004 ... طلعت معها فرق بيني وبينه انه هو مقدم علي بنصف السيارة ثم سحبت عليه بعد 160كم. تبي تصدق صدق ما تبي على هواك.
وراعي الفورد اعرفه زين... والسيارة نظيفة جدا.

الظاهر أن الأخ متقاوم مع فورد استيراد أمريكي... ففصل عنده الطبلون عنده 165 كم في الساعة...

أبوغامد @user_14247 Banned · 10-02-2005

ممكن أعرف وين بالجبيل تحديدا

i-VTEC_2004 @user_10819 صاحب الموضوع · 10-02-2005

والله انا مسرور جدا على مشاركاتكم جميعا
اخي عاشق لومينا SS
والله كلامك صحيح 100% ... إلي سايق جمس وشاف تسارع عداد السرعة كيف ينطلق... بذاك الوقت يعرف من الله حق.
========>>> ماشالله شكل جمسكم مرن صح.
الله يكفيكم شره
سؤال>>> كيف تفصل عداد السرعة لحد 200كم
وانا آسف جدا إذا أسأت لحد بكلامي..او احد ردودي
تحياتي

نيسان للأبد @user_17211 · 10-02-2005

لا عاد صح اني اقدر الجمس مررررررررررره بس ماهقيت انه يبي يطرح الكابرس

وبعد هذا الاكيد ان الكابريس يبي يطرح حتى لو 6 سلندر لان الوزن له دووور

تحياتي للجميع

سلام عليكم .............’’

عبدالعـزيـز @user_12072 · 10-02-2005

اخواني الاعزاء
اضعف سوبر شفته هو 8100 لانه اثقل 1500 بنص طن الي مكينته 5300
وواحد من اخوياي عند ابوه 8100 موديل 2001 يقول ثقيل دم يالا يقوم
بس اول ماركبته اليوكون حقنا موديل 2002 استغرب من فزته القويه وسائلني عن المكينه قلت مكينته 5300 وماصدق
قال 5300 وقومته قويه لهدرجه
سوبربان
1500 قومه اقوى 8100 لانه اخف بكثير
واقوى فزه وعزم في SUV في جمس هو اليوكون عاد كيف لو كان اليوكون GT كوبيه بس قهر لازم تطلبه طلبيه وتدفع كاش
وبعد 3 شهور يجيك

طولت معكم

سلااااام

Yukon4Ever @user_5912 · 10-02-2005

i-VETC_2004
حياك الله

عاشق الومينا SS @user_15754 · 10-02-2005

يا شباب انا ما رديت على الموضوع الا عقب ما لجية الشايب وعطاني مفتاح الجمس قطع 2500 موديل 2002 فول اوبشن

على طول كلمة خويي يطلع معي كابرس ltz 2002 وقاومنا على خط العباد الساعه 12 الليل بالمنطقه الشرقيه والله قاومنا من الصفر السوبر الى 180 كان ماشي مع الكابرس بعدها الكابرس راح معني فاصل الطبلون صار فرق بينا نصف لمبه على الخط خويي ما صدق
وقاومنا مره ثانيه نفس الشيء

i-VTEC_2004 @user_10819 صاحب الموضوع · 10-02-2005

السلام عليكم
يا جماعة انا اتوقف على النقاش.
وانا مقتنع بالي صار جمس يقوم على LTZ ... إلي صدق صدق ... وإلي مايبي يصدق وش اسويله ؟؟؟
عموما اشكركم جميعا على التفاعل الحار.
تحياتي للجميع

Yukon4Ever @user_5912 · 10-02-2005

i-VETC_2004
ما اتوقع انك تروح على الكابريس لا قومه ولا خط الا في احلام الصباح الجميل بالنسبه للفورد الظاهر راعية ما مرنه زين
وانا ماقد جربت مع اكورد لاكني جربت مع كامري وصابونةوشقيت والديهم طبعا في الخط لان الفورد مايروح في القومه ابد وقريبا اجرب مع الاكورد
بالنسبه للجمس 8100 هذا نظيف جدا وتوه جديد طبعا هو الي قام علي لاكن في الخط مايصف جمب الفورد
وتحياتي لك

NiCK @user_11949 · 10-02-2005

اخوي من جدك انت؟

وش سحبت وما سحبت ياخي انا عندي 8100 وعارف مستواه مستحيييييييييييييل شف كلمة مستحيل يروح على كابرس 6 سلندر كيف 8 هذي مو بس مستحيل الا مافيه امل ابد تفكر تشوف لوحته

واضف لمعلوماتك الكامري 2003 قير عادي يروح على الجمس قومه وخط وبفرق بعد كيف اجل الكااابرس

والله معليش ودي اصدق بس مافيه امللللل لا و 1500 بعد اسمممح لي وتأكد اني اتمنى يكون هالخبر صحيح لكن الواقع يقول عكس كلامك

تحياتي لك

تم تعديل الرد بواسطة NYC لمخالفة الرد لقوانين المنتدى