الأخوة الأفاضل في هذا المنتدى الرائع ..
حبيت أطرح موضوع يعتبر مهم لكل من يفكر بشراء سيارة جديدة ..
حيث الآن كثرت مغريات السيارات فكل واحده تمتاز بصفات عن الأخرى تضعك بحيرة
والتسهيلات ولله الحمد متوفرة من قروض وأقساط فلم يعد هناك عائق مثل زمان أول
حتى أنه في السابق لم تكن تتوفر خيارات كثيرة ..
فأما صالون (جمس) سيارة عائلية ..
وأما وانيت (سيارة نقل) دتسن أو هايلكس ..
وأما سيارة سيدان ..
وبالنسبة لسيارات السيدان لم تكن الخيارات كثيرة فأما تويوتا أو نيسان وإذا واحد
خربها طق مازدا .......
وعيال النعمة ما عندهم إلا المرسيدس فقط !! حتى البي إم تلك الأيام لم يكن لها رواج مثل الآن ..
فكانت الخيارات محدودة جداً وحتى الألوان كانت محصورة بين الأبيض وبعضهم يفضل الأسود وهناك بعض السيارات كانت تأتي باللون الأحمر ...
أما الآن فقد تغير الحال وتبدلت الأحوال ...
كثرت أنواع السيارات ..
بل تجد أن الوكالة الواحدة تضم عشرات الطرازات ..
فلو فكرت تشتري لكزس لأحترت عندك LS 430
عندك GS بجميع فئاته 430 – 300
عندك ES 350
ولو إتجهت إلى التويوتا نفس الطريقة الكامري عدت فئات
الكورلا أنواع أحجام ماكينة تختلف
النيسان برضو نفس الكلام
تدخل وكالة مرسيدس لتنبهر من كثر الخيارات المتوفرة
البي إم دبليو كل سيارة من سياراتها تقول الزود عندي
إذا اتجهت إلى السيارات ذات الدفع الرباعي لوجدت أنواع كثيرة ..
وبالسابق كانت مخصصة للطرق الغير معبدة ....
والآن أصبحت للتشخيص والتمشية والرزة من الفخامة الموجودة بها والراحة والرفاهية ..
وأما الألوان فحدث ولا حرج ...
مع كل موديل تجد ألوان جديدة تزيدك حيرة ...
حتى أنهم بعضهم يبيع سيارته لأنه شاف لون أحلى من لون سيارته ..
الخيارات الداخلية أصبحت كثيرة تريد مقاعد جلدية أم مخمل أم قماش
هل تبحث عن فتحة سقف ..
عن مقود جلدي ..
عن تكييف ألكتروني أم عادي ...
والكثير الكثير من الخيارات التي لا تعد ولا تحصى ...
بعد هذه المقدمة الطويلة .................... كيف تختار سيارتك الجديدة ؟؟
وعلى أي أساس تقرر ؟؟
بصراحة الأسباب كثيرة ومن الصعب حصرها جميعها هنا ...
ولكن على سبيل المثال لا الحصر ...
أهم الأسباب وأولها : الميزانية !!
كم هي ميزانيتك لشراء سيارة ؟ كم هو أقصى حد تستطيع الوصول إليه ؟
والأهم من هذا ميزانيك بعد شراء السيارة ...
هل تستطيع أن تتحمل مصاريف صيانتها الدورية مثلاً ...
لا سمح الله في حالة وقوع حادث هل تتمكن من تغطية الأضرار ولو كانت بسيطة ..
قطع الغيار هل لك القدرة على توفير قطع الغيار في حال إحتاجت السيارة لذلك ..
يعني مثال توضيحي بسيط :
لنفرض أن شخص أقترض مبلغ 100.000 ألف ريال وأشترى السيارة التي يحلم بها وليس
لديه أي دخل آخر ويسدد قروض السيارة شهرياً مبلغ وقدره ولا يتبقى من راتبه إلا شي
بسيط ...
وأحتاج الأمر إلى صيانة كلفت أكثر من 2000 ريال .. !!!!
وهو لا يملك المبلغ ! ماذا يفعل ؟
يترك السيارة على أعطالها ؟؟ أم يضع نفسه في مأزق من ديون وخلافه ..
لذا وجب التفكير جيداً بهذه النقطة قبل الإقبال على شراء السيارة والبحث عن السيارة التي
تلبي حاجته وباستطاعته تحمل مصاريف ما بعد الشراء !!!
أما النقطة الثانية : فأنظر أخي الكريم لحاجتك الفعلية للسيارة ..
هل أنت محتاج السيارة لمشاوير خاصة فقط أم لمشاوير عائلية ..
هل أنت صاحب أسفار كثيرة ..
هل عائلتك صغيرة .. هل لديك أصدقاء يركبون معك بأوقات كثير ..
فعجبي من يشتري سيارة (كوبيه) مثلاً وكل يوم ماخذ سيارة أخوه أو أحد أصحابه
ليش ؟ يقولك سيارتي ما تشيل ...
طيب منت عارف نفسك قبل ما تشتري !!!
وعجبي أيضاً ممن يشتري سيارة كبيرة مثل (جمس) مثلاُ وتلقاه دايم لحاله
ما عنده عائلة ولا هو يركب أحد معه تلقاه الحاله داخل السيارة لو صرخ سمع صدى صوته!!
طيب وش حادك على سيارة كبيرة وين تلقى لها موقف وصرف بنزين زيادة على غير فايدة..
والعكس صحيح تجد بعض الناس عائلته كبيرة وحاشرهم بسيارة صغيرة وعنده القدرة
على شراء سيارة أكبر ... بس يقولك أنا مرتاح على هذي السيارة .. طيب فكر بغيرك
وبالناس الي دايم معك (أقرب الناس لك)..
يعني باختصار حدد حاجتك لحجم المركبة حسب الوضع الذي تعيشه وحسب ظروفك المكانية
يعني لا تشتري سيارة سبور قريبة من الأرض وأنت ساكن بحي كله مطبات وحفر ..
أما النقطة الثالثة :
اختيار الألوان : وهو من أكثر الأمور الي تحير الناس ... لأنها مسألة أذواق قد تختار لون
وأنت تراه من أحلى الألوان ويجيك واحد يقولك (واااااااااع) كيف اخترت هاللون ؟؟؟!!!
حدد احتياجك وحبك لمنظر السيارة بهذا اللون لأن هذا الشي راح يحدد علاقتك
بالسيارة بالمستقبل ...
يعني ممكن لون يكون طالع (موديرن) وتستعجل تشتريه وبعد فتره تندم تحس أنه صار لون
بايخ ويخليك تكره السيارة وودك تبيعها يمكن بسبب اللون ..
فعند قرار الشراء فكر هل ستسخدم السيارة مدة طويلة 10 سنوات مثلاً ...
أذن فكر بألوان لا تتغير نظرتك لها مع الزمن مثل الألوان التي تعتبر أساسية على
السيارات مثل الأبيض والأسود والفضي والأحمر ..
لكن انظر إلى الألوان الجديدة مثل درجات الموف ودرجات الرمادي ودرجات الأحمر
تلقى اللون له سنتين طالع ويقولون عنه أوووه صار قديم !!!
وتلقى واحد معاه سيارة قديمة لونها أبيض مثلاً وعادي ما في أحد يجيه
ويقول لون السيارة قديم!!
فكر أيضاً بظروفك المناخية هل تسكن بمنطقة جافة وحارة أم منطقة رطبه بجوار البحر..
يعني أنا أستغرب ممن يشتري سيارة سوداء في مثل ظروفنا بالمنطقة الوسطى
الرياض تحديداً ... أجواء حارة في أغلب أيام السنة ..
لا يمر كم يوم إلى وموجة غبار تعترينا ..
طيب بالله هذا كيف يتهنى بالسيارة .. لدرجة أنه بعضهم يقول أغسلها باليوم مرتين ..
أو بعضهم تلقاه يقول طفشت من الغسيل ودايم سيارته مغبره وحالتها حاله ..
باختصار : أختر ما يناسب البيئة التي تعيش بها .....
النقطة الرابعة :
نظرة الفل كامل :
أصبح عندنا نظره خاطئة جعلت الوكالات يستغلوننا استغلال رهيب ...
ألا وهي الفل كامل (فل أوبشن) ..
تبدأ السيارة مثلاً من 60.000 وتبدأ معك الإضافات والاختيارات حتى تصل إلى 100.000
مثلاً ....
يعني زيادة 40000 ألف ولو نظرت لتجد ان أكثر الخيارات لم تستعملها أبد ..
بعضهم لم يفتح فتحة السقف إلا كم يوم أول ما أشترى السيارة ..
وهو دافع زيادة حول 10000 علشان فحتة السقف ...
بعضهم يقول لم أستخدم بحياتي شاشة النافيقيشن أو ما أعرف أستخدمها
... طيب ليش تدفع مبلغ وقدره يعني بس تشخيص ..
البعض الآخر يحرص أن يكون بالسيارة مسجل وسي دي ولم يستخدمهم في حياته ولم يشتري
أي سي دي أو كاسيت منذ عشرات السنين وإذا بغى يسمع طق الـ FM
البعض وهذي المصيبة يختار المراتب جلد والكل يعرف أن الجلد أغلى وبعد
فترة تلقاه ملبس المراتب ..... ليش ؟؟؟؟
يقولك مراتب الجلد تجيب الحر .... طيب أنت عارف أنك ساكن بالرياض والجو حار
ولا نسيت تحسب أنك بفانزويلا ..
والبعض تلقاه حاط سجادة صلاة على المرتبة !!!!!
النقطة الخامسة :
المستعمل والجديد :
هناك حيرة كبيرة عند بعض الناس بقول ما أدري أشتري مستعمل أم جديد ويكون المبلغ كبير
شوي ... فأنا أقول حرام تشتري مستعمل وأنت قادر تاخذ جديد حتى ولو بمواصفات أقل..
لأن المستعمل مهما كان نظيف لا بد من وجود كسر من جوا ضربة رصيف شي خربان
لمبه طافيه فيوز محترق ..
مرتبه مشقوقة من طرف .. حكة بسيطة .. دقشة .. خدش ..
لكن الجديد لو ما يجيك إلا ريحة السيارة من الداخل تحسسك براحة نفسية ..
النقطة السادسة :
قوة الماكينة ..
بعضهم يحرص أن يكون حجم الماكينة كبير طيب صح حلو تكون السيارة قوية لكن !!
لو كانت سواقتك هاديه مره أو شاري السيارة لأحد أبناءك اللي توه متعلم أو
لسواق يودي ويجيب ليش تحرص على سيارة قوية وسرعتها كبيرة ..
إلا بالعكس عطه سيارة تزحف زحف ..
وإلى عشاق السرعة الذي يتمنى أن تكون سرعة سيارته فوق 300 كم ..
أقوله وين بتمشي 180 ؟؟؟
إذا 120 عطوك مخالفة وشوارع ضيقه وحفريات ومطبات صناعية وتفتيش بكل مكان
وين تبي تطلع كل هالسرعة ...
يعني أشتر اللي يناسب البيئة اللي أنت عايش فيها ......
بعض الملاحظات البسيطة :
عندنا أكثر الناس لما تشتري تاخذ الأكبر الأغلى الأفخم حتى لو على حساب ميزانيتها ..
طبعاً اللي معاه الله يزيده أنا أتكلم عن الشخص الي يالله يطلع موتر ...
بالعربي (مد رجليك على قد لحافك)
ملاحظتي على بعض الدول العربية تلقاه يشتري سيارة على قده وقد عائلته
وقد مصروفه وقد شوارعهم وقد حالتهم ..
ولا يبالغ ...
ولو تلاحظون الألمان عندهم نفس الفكرة ...
يعني لاحظ السيارات الألمانية المرسيدس والبي أم مثلاً
تلقى كل شي عندهم اختياري وبحساب ...
الجنوط كذا نوع حسب الميزانية ...
أنواع الجلد حسب الميزانية ...
التخشيب الداخلي أو لو تبي بدون خشب يطلع عليك أرخص
الشاص فيه طويل وفيه قصير حسب حاجتك وحسب الميزانية
الفخامة الداخلية .. الإكسسوارات .. الإضافات .. الحساسات ... كلها إختياري ..
حسب حاجتك وذوقك وميزانيتك ...
حتى أنني قد قرأت أنه بمكان الاختيار من بين الأزرار الخاصة بفتح النوافذ ..
يعني مو يدخل واحد يقول عطوني فل كامل ونص التجهيزات ما يعرف يستخدمها ...
....
في الختام أقول :
حدد حاجاتك حسب قريشاتك ...
وليس العكس : تحديد حاجات الناس وآرائهم على حسابك ...
وأتمنى أني أكون ما طولت عليكم ...
والسلام عليكم ورحمة الله وبركاته ..
كتبه
أخوكم / أبو عبدالله
الأربعاء 8/7/1427هـ
