شباب في شاحنة امريكيه avalanche موديل 2003 بدون فتحه ولا جلد 5.3لتر معروضه علي من قبل صديق بـ60الف بيبيعها علي بدون ماياخذ علي اتعاب او ارباح
بالنسبه لموديلها تستاهل 60 الف ريال المشكله الوحيده انها ماشيه 240الف كيلو متر =150الف ميل
يعني ياأصحاب الخبره في السيارات الامريكيه ياللي تعرفون انها تكد وتكرف وتمشي ولا يضرها الممشى بالذات سيارات جنرال موتورز هل رايكم انها بتعيش معي وبتتحمل مشاوير يوميه لطالب جامعي وتتحمل واحد طول عمره يسافر.
والى كم تعتقدون انها راح تمشي بدون ما ينفتح كبوتها (تطلب قطع غيار )لأن كبوت المريكي حسب ماهو معروف اذا انفك كبوته مايعاد ينقفل يعني كل يومين قطعه وبعد كم الف تعتقدون انها بتتحمل ولو فرضنا انها بتطلب مني قطع وش القطع اللي لازم تتغير يعني ممكن تحتاج قير جديد؟ مكينه؟ مفصلات ابواب؟ كهربا السياره تتضرر مع كثر المشي؟ بالذات ان السياره نظيفه جدا واستخدام امريكي وتأكدت من الشاصيه بنفسي مافيه أي صدأ اللهم شي لايذكر
ولو اتفقنا جدلا ان السياره ماراح تتحمل الاستخدام اليومي, وبغيت اشتريها لمدة 3 شهور ثم ابيعها باخسر فيها؟ ولا ابيعها براس مالها؟ ولا بتنشب بحلقي؟
واذا فيكم احد يقدر يدلني على طريقه القى فيها افالانش 2003 ماشي 95 الف كيلو في احدى دول الخليج يدلني وماعندي مشكله اسافر لكن اتفق على كل شي قبل امشي واتمكن من مشاهدة الصور
واخيرا وليس اخرا من وين تضبيط الفالانشات يعني جنوط واكسسوارات في ناس نصحوني بدبي رايكم؟..؟
هذي الأسئله مالقيت من يجاوبني عليها فقلت مالك الا هيفا |11| قصدي مالك الا الشباب |6|
أرجو اللي عنده خبره وعنده اجابات وافيه شافيه يفيدني شاكر ومقدر واللي يبغى يجرب خطه لايتعب عيوننا بقراية ردوده وعلى فكره هذا أول موضوع لي في منتداكم الطيب ان شالله اكون خفيف ظل عليكم
