السبت 25 أبريل 2026
الرئيسية أخبار السيارات مواضيع اليوم
روابط قد تهمك : السيارات | تحويل التاريخ الهجري والميلادي | تاريخ اليوم الهجري | رواتب السعودية | الموسوعة | قناة السيارات
عاجل
كشفت شركة هيونداي بكين النقاب عن سيارة Ioniq V الجديدة كلياً في معرض بكين للسيارات 2026 وسيتم تصديرها عالميا | مازدا تطلق نسخة جديدة من CX-6e قبل معرض بكين للسيارات 2026 | الكشف عن مرسيدس GLC L الكهربائية لأول مرة بالصين | سيارةبويك إكزيمبلر 1 موديل 1967 هي سيارة فريدة من نوعها مصنوعة بالكامل من النحاس، ومبنية على هيكل سيارة بويك ريفييرا جران سبورت لم يكتب لها الانتاج التجاري | أرجأت شركة جنرال موتورز طرح الجيل القادم من شاحناتها وسيارات الدفع الرباعي الكهربائية كاملة الحجم
الرئيسية المنتديات المساندة الرحلات والطلعات والسياحة ..:: TAHOE // SUBURBAN // YUKON FANS ::..

..:: TAHOE // SUBURBAN // YUKON FANS ::..

الرحلات والطلعات والسياحة مغلق
9,046 رد 2,916,060 مشاهدة 534 مشارك الأقدم أولاً
m
mylovely @user_266930 · 08-12-2011
888888888888888888888
حياك الله ابو ديالا انت اخو ونستفيد من ردودك الي تبرد الخاطر والله ولها اهتمامها

اولا اعتذر بسبب انقطاعي

واليوم تم عمل صيانه لدى وكاله العيسى مخرج 25 الله يدومها لنا والله اشخاص عسل وكل حاجه
طبعا امون عليهم كلهم وادخل داخل وعبوو لي زيت نوعه نسيت اسمه اظن اي سي ديلكو علبته سودا بس الشاهد ان رقمه 5w 30 يقال انها افضل من 10 30 كاسترول عشان الكاسترول خفيف بزياده وطرمبه الزيت تخرب بسرعه منه هذا كلام موظف امين جدا جدا معي واثق فيه ثقه عميا والله ومااظن بيلف ويدور معي
طبعا الزيت لزوجته عاليه على مااظن ويمشيك 10 الاف كيلو طبعا
واي استفسار انا حاظر ان شاء الله
بالتوفيق للرابطه
أ
أبو ديـــــالا @user_149616 · 08-12-2011
السلام عليكم جميعاً

ما شاء الله الرابطة بالردود الاخيرة صار يستفاد منها

مؤ مثل قبل فترة صارت مكان لسواليف الشباب وهذا كان أحد اسباب تعليق عضويتي

بالتوفيق للجميع
S
SIERRA_HD @user_143138 ..:: TAHOE//YUKON GRP. MEMBER ::.. + RiYaDh 4X4 GrOuP · 07-12-2011
اهلين جميعاً مره اخرى ..

ممكن احد يشرح لي وش معنى مبرد زيت قير كبير ؟ و وين يتركب ؟


قدام الرديتر بتلقى رديتر صغير شكله مستطيل , هذا مبرد القير , وطبعا اللي طلعاته للبر كثيره وراعي تطعيس + اللي بمنطقه فيها مرتفعات ومنخفضات ينصح انه يركب مبرد قير اكبر عشان حراره القير ماترتفع ويطيح عزم الموتر + يقلل من عمر القير .


والله منت هين يا عزام كل هذي التعديلات سويتها بتاهوك ( ما شاء الله تبارك الله ) :xyxthumbs:


اخجلت تواضعي :a1120(86):

بالذات مبرد القير صراحه يعطيك راحه نفسيه , صرت ماعاد احط على حراره الترانسميشن ابد , وعزم الموتر صاير روعه ماشاء الله , بالذات لما اطعس كان اول يبرد او يقل عزمه مدري من ايش , طلع السبب من القير لان حرارته اذا وصلت فوق 85 يبدا يقل عزم الموتر وهالشي مسويته الوكاله زي السيفتي .


سؤال مهم فعلا وين يتركب ومن وين اشتريه وهل يفضل اغير المبرد ولا ما يحتاج


انا جابه لي رجال يقاله فيصل الخالدي , طلبها من برى وركبها بنفسه لي , كلفتني حدود 1200 ريال المبرد + شغل يده .

واذا انت منت راعي بر مايحتاج تركبه ابد .
G
GM_TAHOE @user_23867 · 07-12-2011
D
Dr.BAD
اهلين جميعاً مره اخرى ..

ممكن احد يشرح لي وش معنى مبرد زيت قير كبير ؟ و وين يتركب ؟

عندي سؤال الله لا يهينكم ، قيمة الصدام الامامي الاصلي الي من الوكاله ، كم سعره مع تغير لونه ؟


سؤال مهم فعلا وين يتركب ومن وين اشتريه وهل يفضل اغير المبرد ولا ما يحتاج
G
GM_TAHOE @user_23867 · 07-12-2011
T
TAHOE_LTZ
هو ساكن بمخرج 10 ( شارع عثمان بن عفان ) , وهذا رقمه 0548888025 اتصل عليه وفهمه سالفتك وشف وش بيقولك , بس اهم شي زي ماقلت لك ترى اذا التراكشن شبك من نفسه اول مره عادي , ترجع تفصله مره ثانيه وخلاص ماعاد يشبك , تأكد من هالنقطه قبل تسوي شي .

وبالنسبه لمكان الفيوز , افتح كبوت السياره وفك الغطا حق الفيوز وافصل هالفيوزين اللي بالصوره .


اهم شي اذا جيت تفصلهم او تشبكهم السياره لازم تكون طافيه لا تنسى :bigggrin:


ممتاز اجل بجرب الطريقة الاولى واذا ما نفع بفصل الفيوز
والله يعطيك العافية

T
TAHOE_LTZ
ياسلام عليك هذا كان اهم شي تسويه , حتى انا ركبت مبرد زيت قير كبير :bigggrin: الحراره صايره ماتتعدا 75 ابدا سواء كنت اطعس او لا , ومره ارتفع ووصل الى 90 لاني غرزت وشبكت الدبل الثقيل وجلسة كل شوي ورى وقدام حدود خمس دقايق تقريبا لين طلعة , بعدها مجرد ماوقفت لمده 10 دقايق نزلت الحراره الى 80 .


والله منت هين يا عزام كل هذي التعديلات سويتها بتاهوك ( ما شاء الله تبارك الله ) :xyxthumbs:
D
Dr.BAD @user_219933 · 06-12-2011
اهلين جميعاً مره اخرى ..

ممكن احد يشرح لي وش معنى مبرد زيت قير كبير ؟ و وين يتركب ؟

عندي سؤال الله لا يهينكم ، قيمة الصدام الامامي الاصلي الي من الوكاله ، كم سعره مع تغير لونه ؟
S
SIERRA_HD @user_143138 ..:: TAHOE//YUKON GRP. MEMBER ::.. + RiYaDh 4X4 GrOuP · 06-12-2011
أيضاً غيرت بلف الحراره باقي عاد البرمجة أنا ماني راعي سرعه ولكن ودي أقلل من استهلاك الوقود وخصوصا مع الكفرات الكبيره وايضا بعد تغيير البلف اعتقد يبي برمجه لأني ما افهم في هذي الامور


ايه نعم اذا ركبت البلف لازم برمجه ولا ما كانك سويت شي , والرجال اللي حطيت رقمه ( هاني بخاري ) يبرمجها لك .

بالنسبه للصدام من اي محل شريته .؟
S
SIERRA_HD @user_143138 ..:: TAHOE//YUKON GRP. MEMBER ::.. + RiYaDh 4X4 GrOuP · 06-12-2011
ياسلام عليك هذا كان اهم شي تسويه , حتى انا ركبت مبرد زيت قير كبير :bigggrin: الحراره صايره ماتتعدا 75 ابدا سواء كنت اطعس او لا , ومره ارتفع ووصل الى 90 لاني غرزت وشبكت الدبل الثقيل وجلسة كل شوي ورى وقدام حدود خمس دقايق تقريبا لين طلعة , بعدها مجرد ماوقفت لمده 10 دقايق نزلت الحراره الى 80 .
س
سعد القاسم @user_276035 · 06-12-2011
الله يسعدك ياعزيزي اشكرك جزيل الشكر على هذا التواصل
نسيت اكتب أني غيرت مبرد الزيت الى مبرد اكبر الي هو مبرد زيت القير
أيضاً تغيير الهوبات الى هوبات استراليه دي بي ا أيضاً فحمات سيراميك

أيضاً غيرت بلف الحراره باقي عاد البرمجة أنا ماني راعي سرعه ولكن ودي أقلل من استهلاك الوقود وخصوصا مع الكفرات الكبيره وايضا بعد تغيير البلف اعتقد يبي برمجه لأني ما افهم في هذي الامور

بالنسبه للصدام تم شراء صدام تجاري ١٩٠ ريال من الصناعية القديمه وجاري رشه بويع عاديه مع مثبت بويه مثل لون الموتر ب ١٥٠ ريال وبعد كذا ابقصه ان شاء الله وابركبه في البيت
S
SIERRA_HD @user_143138 ..:: TAHOE//YUKON GRP. MEMBER ::.. + RiYaDh 4X4 GrOuP · 06-12-2011
عيني عليك بارده ياسعد , ماشاء الله تبارك الله شغلك بالموتر نظيف ومرتب وغير مكلف صراحه .

بالنسبه لاستفسارك .

بالنسبه لسؤالي الله يحفظك هل قصت الصدام بهذا الشكل تعتبر انسيابية للهواء وخصوصا رساوة الموتر بالخط اي بمعنى هل هناك قصات معينه تحافظ على هذا الجانب اذا قسناها من ناحية علمية


انسى انها تكون انسيابيه :bigggrin: الموتر ممكن رساوته ماتختلف صح , لكن يصير بالخط ثقيل , يعني لو كان فيه هوا مثلا ماراح يمشي اكثر من 140 الا لما تدعس الدعسه كلها , لكن الرساوه ماراح تختلف اتوقع . وهالشي مجرب بالسييرا حق واحد من الزملاء , فاك اللحيه الاماميه كامله مع الكشافات والموتر صار بالخط صعب يجيب طبلونه , فـ اذا انت منت راعي سرعه من الاساس فـ انصحك فيها , اما ان كانك مثلي ( الله يهديني ويهدي الجميع :bigggrin: ) فـ لا تفكر تسويها , الا اذا انك بتشتري صدام ثاني وتقصه وتصير مثلا بالشتاء تركب المقصوص وبالصيف ترجع صدام الوكاله , بس برضو لازم تعمل حسابك ان البطانه لازم تقصها اذا بتقص الصدام , لان مو معقول الصدام ينقص والبطانه طالعه من تحت , بيطلع شكل الموتر بايخ :bigggrin: واذا رجعت صدام الوكاله بتشوف فيه فراغ حق البطانه المقصوصه وبرضو شكل الموتر بيطلع بايخ هههههه

فـ احسن شي تاخذ صدام بالبطانه حقته وتريح راسك :xyxthumbs:
S
SIERRA_HD @user_143138 ..:: TAHOE//YUKON GRP. MEMBER ::.. + RiYaDh 4X4 GrOuP · 06-12-2011

طيب شلون طريقة فصل التراكشن بالفيوز ؟
ووين مكان هاني بخاري ؟


هو ساكن بمخرج 10 ( شارع عثمان بن عفان ) , وهذا رقمه 0548888025 اتصل عليه وفهمه سالفتك وشف وش بيقولك , بس اهم شي زي ماقلت لك ترى اذا التراكشن شبك من نفسه اول مره عادي , ترجع تفصله مره ثانيه وخلاص ماعاد يشبك , تأكد من هالنقطه قبل تسوي شي .

وبالنسبه لمكان الفيوز , افتح كبوت السياره وفك الغطا حق الفيوز وافصل هالفيوزين اللي بالصوره .


اهم شي اذا جيت تفصلهم او تشبكهم السياره لازم تكون طافيه لا تنسى :bigggrin:
س
سعد القاسم @user_276035 · 06-12-2011
أيضاً قمت بعمل التالي

وان شاء الله تفيدكم



س
سعد القاسم
بسم الله الرحمن الرحيم
والحمدلله رب العالمين .. اللهم صلي وبارك على نبينا محمد صلى الله عليه وسلم .

بسم الله ماشاء الله لا قوة الا بالله ...

اهلا وسهلا بكم اخواني جمعيا


مذ زمن وانا ((الفز)) الفز يعني اضع الشيء في بيبان السيارة اغراض وماشبه ذالك

قررت ان استغل هذه المساحه بشي معقول ومهم وايضا لا يؤثر مستقبلا اذا بغيت اشيله وسهل الفك والتركيب

مثل ماهو وضح بالموضوع بالنسبه للمساحه فهي في السيارات التاهو واليوكن القصير او الطويل للموديلات 2007-2012

هذا من واقع تجربة

....

استغليت المساحه وقسمتها كالتالي بالصور



عدد 6 مخابي ا جيوب تفصل بمقاس معين في نفس الشراع او الخرج ..
وكلن على رغبته الشخصية وعني انا فضلت المقاسات والاشياء الي انا راح اضيفها في الخرج او الشراع ...

والاشياء الي راح احطها فيه كالتالي

1-طفاية الحريق لما لها من اهمية بعد التشييك عليا طبعا اذا تحتاج تعبأه او لا ولابد يكون ظغطها على الاخضر ..

2- ادوت رحلات خفيفه مثل كشافات يودي ورأسي معيار هواء سكين خفيف دفتر ملاحظات مفك خفيف ذو راسين شنطة السيديات جيب او مخبى للايكوم اذا لم يستخدم ابر بلوف واغطية احتياطية للكفرات واشياء لا تحضرني متفرقه وسم ما شئت من الاغراض المتفرقه ... وكلن على حسب احتياجه

كيفية تركيب الخرج ذو الجيوب المتعدده:
طبعا بعدما رسمت الشكل في ورقه رسم هندسي بالمقاسات وديته للمحل مأرب الصحراء عندهم خياط جيد
وفعلا قاسها هو بنفسه واعطاني اقتراحاته وكانت ممتازه ..
لاني مركب بلاستك ارضي و حطيب فيالخرج لازق تشك تشك ذكر وفي البلاستي الارضي لازق تشتشك انث وصمغته بصمغ قوي .. حتى يصير قوي وتركته فتره ينشف مع ترصيصه مضبوط

وهذي صورة الخرج من تحت



وهذ الجهة الاخرى الي بيلزق فيها
طبعا الصورة قبل التصميغ وبعدما صمغتها وركبتها ماشاء الله قوية جدا علما بان الخياط اعطاني ثلاث لزاقات قماش وقالي ترى واحده بتكفيك تحطها فوق وفعلا جربتها ولقيت انها متماسكه جدا مع القش الي فيها واما الاضافيات تقدر تحطها على الجوانب والشراع مجهز بالجوانب ايضا والشهداه تراي ماركبت الا واحد واجده قوي مره بس لا زم يركب في الجهه الي فوق



وهذا بعد تركيب الطفاية متماسكه والحمدلله




جهة الراكب مايضايقه شي



الجهتين جميعا للراكب والسائق



بالنسبه للتكاليف الحمدلله كلف علي 60 ريال تفصيله والتخطيط من عندي وكلن على حسب رغبته

وانا قمت بتركيبه بالطريقة التي تناسبني ..

بالنسبه للمحل والخياط الي فصله فهو مركز مآرب الصحراء على طريق خالد بن الوليد الرياض

رقمهم

012781818

تم بحمدالله

وفقنا الله واياكم

دعواتكم ايها لاخوان
س
سعد القاسم @user_276035 · 06-12-2011
بسم الله

سم اخوي تاهو حياك الله اشكرك واشكر تفاعلك الطيب كما لا أنسى اشكر لك عرض الصور فعلا شكله مقبول وطلع رفيع الوجه ولا تقول حك ربل ولا لا

قبل لا أبدا سؤالي سأوافيك بالإجابة على الذي اعرف
بالنسبه لسؤالك عن تدبيل المساعد الأمامي حقيقة كنت متردد أنا قبلك ولكن بعد ما جربت موتر واحد من الربع اقتنعت وشفت طريقتها وارتحت نفسيا لأني ما احب العب بالموتر خارج نطاق السيفتي الأمان اهم شي

المهم اول شي تمر محل المنار في الصناعية عنوان المحل وانت رايح الصناعية القديمة جاي مع الدايري جاك زجاج السالم على اليمين تعد الاشاره لين يجيك الكبري قبل الكبري فيه شارع كبير خش معه ابتل يجيك المحل على يدك اليسار
وتطلب منه مساعد بلستين ٥١١ بهذا الرقم قيمة الثنين ب ٢٩٠ ريال*
ثم تأخذها وتروح الصناعية الجديده مخرج ١٧
عاد مدري وين بتجيها معه ولكن ابوصفلك محل هناك حول الشارع العام
الان الشارع العام عليه محل كبير بالزاويه على شارعين قطع غيار اسوزو خش من عنده يصير على يمينك ووجهك شمال ابتل لين يجيك مديور طيور معه يجيك محل على اليمين اسمه القدره او القوه القصوى محل الصمعاني هو الي بيشتغلك فيها صح ان شاء الله شغل يديه ٣٥٠ تقريبا
بالنسبة للراحه الحمدلله ارتحت كثير عن اول خصوصا في الجروف والمهابد مع العلم رجلي بارده على الموتر واستخدام كله في السيفتي كشته وطلعات واحيانا قبل الكشته فرتين على النفود والاستمتاع بالقياده خارج الطريق

اما في المدينة حلو ومقبول مطبه لأبعد حد أزين من قبل كان يهابد كثير

هذا ما يتعلق بموضوع التدبيل للمساعد
وأما عن الخلف ياي الكابريس موجود ولكن لن يركب الا لما ترهمله قواعد على الدفرنس ولكن ارجو ان تعطيني فرصه شهر من الان لين ا شوف إثبات الجداره والتحمل
لان ماودي اقعد أمدح او أذم الا لين اجرب وخصوصا أني اول واحد اطبق اي الكابريس على قواعد مرهمه مع العلم أني اقدر اركب الياي الاسترالي الان ولكن الكابريس مادي دوره وزود بس عطني مهله. وابشر وأما عن رفعته من ورأفهي ممتازه جداً

وماعندي مانع الي يبي يجرب يركب معي في الموتر ويشوف من ناحية الراحه
ونتشرف بمعرفتكم

بالنسبه لسؤالي الله يحفظك هل قصت الصدام بهذا الشكل تعتبر انسيابية للهواء وخصوصا رساوة الموتر بالخط اي بمعنى هل هناك قصات معينه تحافظ على هذا الجانب اذا قسناها من ناحية علمية

وشكرا لكم*
G
GM_TAHOE @user_23867 · 05-12-2011
T
TAHOE_LTZ
ايه انا عندي اذا رجعت فصلته مره ثانيه خلاص ماعاد يشبك ابد .



هاني بخاري رجال راعي برمجه سيارات وتزويد واشياء حلوه :bigggrin: وانا برمجت موتري برمجه كامله عنده + ركبت فلتر رياضي وصار الموتر ماشاء الله نشيط بقوه :xyxthumbs: ويقدر يسويلك اللي تبي , تلغي فصله او تقوي عزم الموتر كلها يسويها هو .



تمااام

طيب شلون طريقة فصل التراكشن بالفيوز ؟
ووين مكان هاني بخاري ؟
S
SIERRA_HD @user_143138 ..:: TAHOE//YUKON GRP. MEMBER ::.. + RiYaDh 4X4 GrOuP · 05-12-2011
وبغيت أسألك عن تدبيل المساعدات الاماميه , كيف صار الموتر معك بالمراقى يطامر ولا لا .؟ واهم شي مريح بالمدينه ولا كنك تسوق شاص :bigggrin: وكم كلفك ووين .؟

لاني حست الصناعيه كلها ومريت على وكاله جبريال للمساعدات ومونرو وكلهم قالولي مافيه الا مساعدات خلفيه بس , امامي مانزل شي للشكل الجديد .

وبالنسبه للياي الخلفي اللي مركبه انت وين حصلته فيه .؟ لان صارلي فتره ادوره ولا لقيته , واهم شي يركب على طول بدون توليف ولا لا .؟ وكم يرفع الموتر من ورى تقريبا .؟
S
SIERRA_HD @user_143138 ..:: TAHOE//YUKON GRP. MEMBER ::.. + RiYaDh 4X4 GrOuP · 05-12-2011
هلا والله بـ اخوي سعد ..

شغلك بالموتر مايحتاج ماشاء الله روعه , وترى الصور ماطلعة مدري وش علتها .

وبالنسبه للصدام , فكره قص الصدام اشوفها افضل بصراحه , الصدام الحديد صح يعطي منظر حلو لكن مشكلته يثقل على السياره + سعره غالي , بالذات اللي يجي وسطه ونش ( موجود بالسليماني بحدود 5000 ريال صدام + ونش للسييرا ) .

وقص الصدام سهل جدا ومرسومه حدود القص عليه يعني ماتتعب بالتأليف :bigggrin:








س
سعد القاسم @user_276035 · 05-12-2011
وش السالفه الصور ماطلعت مع اني متاكد اني حاط الرابط في المربع الخاص بالصور ؟؟؟
س
سعد القاسم @user_276035 · 05-12-2011
السلام عليكم حيالله اهل الرابطه

تحيه طيبه للجميع

احب اشارك معكم لنتبادل الخبرات والفائده للجميع

بسم الله ماشاء الله نبدأ

الموتر الله يكفينا واياكم شره تاهو ال تي دبل قصير 2010

اللون ذهبي

الاستخدام عائلي - بري - يومي

التعديلات
تركيب ليفت كيت 3.5 شركة الروف كنتري
تركيب سله علوية الي يسمونها السله القصيميه للنوم او للعفش والتحميل بدون تخرم في البدي وعلى نفس اللسان حق الوكاله العلوي
تدبيل مساعد امامي
تركيب قواعد على الدنفرس الخلفي ليكون مقاس الياي العريض مثل الاسترالي ولكن المثبت حاليا ياي كابريس قديم ومادي الغرض ومتحمل
تانكي ماء 100 لتر داخلي انزله متى مابغيت
كفرات ماستر كرفت AT كروزر 285 على جنط الوكاله 17 ارتفاع 70
تركيب نسافات mud
بطاريه اضافيه مع فيش خلفي وفيش امامي 220 و3 لمبات ورا وواحده في الكبوت
تركيب جهاز مراسله مع تثبيته وفكه ايضا لعدم الحاجه احيانا والاريل وقاعدته

هذي اهم التعديلات وافلح من ذكر الله

جاري دراسة تغيير الصدام الوكالة الى صدام تجاري وقصه بطريقه مناسبه لان احيانا يحك فيه الكفر من تحت وفي الفتره الاخير مع المناقز انعفط الصدام من تحت جهة السواق وقررت تغييره او تركيب تجاري ثم اقصه ولكن محتار في طريقة القص ولا لقيت صور في النت بصدام مقصوص لان هذي اوفر من الصدام الحديد ايضا الصدام الحديد راح يكون وزنه كبير

فما ادري وش شوركم علينا ايها الاخوه ...

هذي بعض الصور من النت لقيتها ومركب عليه الصدام




http://www.rdmoffroad.com/ironbullfrontwinchbumperfor2007-11chevrolettahoe.aspx?MMP=1013RZ1IB4N


اتمنى اكون قدمت مايفيد
S
SIERRA_HD @user_143138 ..:: TAHOE//YUKON GRP. MEMBER ::.. + RiYaDh 4X4 GrOuP · 05-12-2011
يعني اذا رجعت افصله مره ثانيه مايرجع يشتغل شي حلو لانه اقلقني يوم الثلاثاء الماضي كنت اطعس بالخرارة واذا مشيت على طريق ممهد بتراب وكان الموتر يزلق بشكل كبييير والتراكشن كان شبه يوقف السيارة يعني باقي شوي وتوقف

ومن هذا هاني بخاري ؟وليش سويت برمجه لكمبيوتر سيارتك , ووش يقدر يسوي بالكمبيوتر وهل يقدر يلغي الفصله حقت السرعة ؟


ايه انا عندي اذا رجعت فصلته مره ثانيه خلاص ماعاد يشبك ابد .

هاني بخاري رجال راعي برمجه سيارات وتزويد واشياء حلوه :bigggrin: وانا برمجت موتري برمجه كامله عنده + ركبت فلتر رياضي وصار الموتر ماشاء الله نشيط بقوه :xyxthumbs: ويقدر يسويلك اللي تبي , تلغي فصله او تقوي عزم الموتر كلها يسويها هو .
G
GM_TAHOE @user_23867 · 05-12-2011
w
wso
اخوي اذكر قريت عنها في كتاب السياره اليوم أتأكد منها



بالله بلغنا وش يطلع معك