بسم الله الرحمن الرحيم
السلام عليكم ورحمة الله وبركاته
سيارتي هي أزيرا موديل 2006
عداد أكثر من 122000 كم ناسي بالضبط كم
وأظن والله أعلم هي أكثر أزيرا ماشية في المملكة لحد الحين بس باقي أتأكد من الناغي لكن المجدوعي والوعلان متأكد
المهم ماشاء الله تبارك الله السيارة امتلكتها في تاريخ 23 / 3 / 1427 هـ
وإلى الأسبوع الماضي ماقد خذلتني في اي شي سيارة تمام وعالي العال
أنا من النوع اللي مايحمي أبد إلا اذا درجة الحرارة تحت 10 م وراعي سفريات كثير بمعدل أسبوعيا الرياض - الخبر ومن فترة 6 شهور صرت ماأسافر بالسيارة هذي كثير وقبل اسبوع اضطررت أروح للجبيل توكلت على الله ومشيت ورحت للجبيل وماشي 200 تقريبا ورجعت والسيارة تمام وقفت في محطة ساسكو الله لايبارك في هذي المحطة وعبيت بنزين 95 منها وهي قبل الرياض ب 105 كم عند الوسيع طلعت من المحطة مشيت 10 كم صارت السيارة تقطع دعست وصلت 220 قلت يمكن تضبط اذا دعست لاحظت السيارة بدأ يضعف عزمها أدعس نزلت النمرة بالرابع والعداد ينزل مايزيد لين صارت ماتتعدى 180 كم حقدت وصلت الرياض وقفت عند أول إشارة طفت السيارة شغلت ورجعت طفت صار لازم أدعس بنزين عشان ماتطفي استغربت صراحة لأني قبل فترة مطلعها من تشييك 120000 كم وكانت الفحوصات تمام
المهم رحت للوعلان الخدمة السريعة قلتلهم السالفة قالوا المشكلة في فلتر البنزين وفكوه والله لايوريكم كله طين الظاهر ساسكو بنزينهم حاطينه في بير مو خزان
الزبدة غيرت الفلتر قالوا لي التانكي بيكون وصخ لاتخلي البنزين ينزل عن الربع وفترة وغير الفلتر قلت ماشي طلعتها من عندهم وقفتها كم يوم ماطلعت فيها وجا يوم وطلعت رحت الجامعة الوضع تمام طلعت من مواقف الجامعة قامت السيارة تقطع اذا كانت بالدي وضاغط بريك حطيتها بالإن صار الضغط يرتفع شوي وينزل رحت الوعلان الفرع الرئيسي أنا وواحد الله يستر عليه :D المهم صراحة أول مرة أدخل سيارتي الأزيرا عندهم جيت الاستقبال قالوا لي الأزيرا في قسم VIP استانست قلت كشخة المهم جاني الموظف قالي وش سيارتك ووش موديلها قلت أزيرا (لارج) <<< صدق عمره يحسب نفسه في الجفالي
المهم قالي كم ماشية قلت 122000 كم مسك راسه وبغى يطيح ولسان حاله يقول تكد عليها ؟؟
المهم قبل مايركب السيارة قلتله المشكلة قالي القير مضروب وركب السيارة وطلع يجربها قالي القير تتأخر تبديلاته قلت نفس تبديلات السوناتا 6 سلندر بالضبط اذا فيها مشكلة بدخلها على الضمان عندكم تصلحونها لأن السوناتا ماشية 26000 كم سكت المهندس قالي خلاص بفتح كرت والتشييك ب 280 ريال وأردلك بعد بكرة نفس هذا الوقت
طلعت من عندهم اتصل علي اليوم في نفس الوقت اللي متفقين عليه وهذي اعتبرها ميزة للوعلان دقة المواعيد قالي السيارة تكلف 5055 ريال قلت بجيك ونتفاهم رحت له وكانت الطامة اللي اذهلتني طلعلي تقرير لأنهم فحصوا كامل السيارة
التقرير كالتالي :
1 - السيارة فيها حذفة قوية لليسار والهيئة الأمامية سليمة والسبب من الكفرات
2 - البطارية أصغر من الحجم المطلوب <<< مركبها عند المجدوعي وسعرها عندهم ب 600 ريال وأنا مغيرها ب 200 ريال عند المجدوعي
3 - زيت القير معدوم يحتاج تغيير <<< مغيره قبل 3000 كم وقدام عيوني
4 - قطعة الكتورنية اسمها BCM رقمها 95400 - 3l400 وسعرها 1211 ريال وهي علبة الفيوز
5 - الاصطبات الأمامية كاملة وسعرها 3324 ريال وهنا مربط الفرس وش دخل اللمبات الاصطبات القزاز أو البلاستيك يعني الشمعات بس اللي لها دخل وإلا ؟
طبعا يقولون سبب المشكلة هي الزنون مو أصلي قلت طيب مركبه عند المجدوعي قبل ماأطلعها وعدادها صفر ليش توها تخرب قالي مدري يمكن غيرت اللمبات وتذكرت إني غيرت الشمعات لون أبيض <<<< فيكتور رحت فيها جهز 5055 ريال
عطوني تقرير إجمالي قطع الغيار 4535 ريال
أجور عمل 490 ريال
أخرى 30 ريال
المجموع 5055 ريال
طبعا اللي قهرني قالوا ياتسويها كلها يامانصلح السيارة وعطوني خصم صار المجموع 3700 ريال
انا صراحة طلعت السيارة وحطيتها في البيت بعد هذا الكلام كله وش ترون ياشباب
هل أودي السيارة المجدوعي وأشوف ؟
أو أتوكل على الله وأصلحها بالوعلان ومتخوف منهم صراحة ؟
أو أفك الزنون وأشوف هل يرجع كل شي طبيعي أو تستمر المشكلة ؟
طبعا راح معي واحد يقول لو يقولون المكينة مبوشة بصدقهم والسباب سواقتك
فيه شباب هنا في المنتدى عارفين سواقتي يركبون معي يرحمون السيارة فأنا أشوف السيارة كبرت بعيني زيادة
ملاحظة ياشباب ركزوا على سالفة البنزين الفترة بينهم 4 ايام بس والشي الثاني
انتظر مشورتكم
أخوكم / محمد
|3|
