رابطة ملاك &عشاق مازدا (صور،أخبار،مشاكل،كل شي عنها.....)

وفقك الله للخير

السؤال الأول..
نعم ..ندمت على شيء واحد..
أنني لم اشتري الفل اوبشن..بمكينة 2300سي سي وقير عادي..
لأنها تعطيك عزم يتصدر فئتها للأربعة سلندر..

السؤال الثاني..
عندما افكر في شراء اربعة سلندر فستكون المازدا اختياري الأول بدون منازع..
اشكر لك تفاعلك..تقبل تحياتي..

أعود اليكم مجدداً بعد عودتي من سفر سريع الى الطائف لظرف طارئ داهمني..
أحب أن أعرض لكم تجربتي للمازدا في السفر الذي استغرق يوم كامل..
طبعا لابد من المرور بمكة ومن ثم التوجه للطائف عبر خط السيل الكبير..
المسافة بين مكة والمدينة 420كيلو متر..
المسافة بين مكة والطائف عبر السيل 86 كيلو متر..المسافة الاجمالية 506كيلو متر..
حيث كان الانطلاق من المدينة المنورةالساعة العاشروعشر دقائق تقريبا عبر خط الهجرة السريع..
وتم الوصول الى الطائف في الساعة الثانية إلا ربع ساعة تقريبا..(لاتنسوا دخولي لمكة وتضييع الوقت في اشاراتها وزحمتها)
ولكم ان تتخيلوا السرعة التي كنت أقود بها؟؟؟
سأختصر عليكم التفكير وأقول لكم..من160الى 200 وغالبا على المتوسط 180..
واجهني في الطريق هواء قوي، مرة في الوجه ومرة من الجنب..
يتميز خط السيل بانه يتجه صعودا بزوايا مختلفة وفي بعض اماكنه يهبط هبوط خفيف.
أعطيكم ابرز الملاحظات:
الرساوة:ممتازة ويزداد اعجابي بها في كل مرة اسافر بالمازدا..حيث كنت آكل منعطفات الخط السريع بسرعتي دون أن تحوص السيارة او افقد السيطرة..
مواجهة الهواء:عندما يواجهني الهواء في الوجه الاحظ ازدياد استلاك الوقود بالاضافة الى تراخي سرعة السيارة وعزمها بشكل بسيط وتغلبت على هذه المشكلة بزيادة الضغط على دواسة البنزين وكان لتصميم السيارة الانسيابي دون مهم جدا وكير في تخفيف وطأة الهواء وشدته على المقدمة..أما مواجهته من الجنب فكانت تبهذلني صراحة لكن تشبث السيارة وتمسكي بالطارة كان له دور في التخفيف من تأثيره..
صوت الهواء:بعد سرعة 120 الاحظ صوت الهواء والذي يزداد كلما زادت سرعتي وعند 200يكون بشكل ملاحظ ومرتفع بشكل لايدعو للانزعاج..طبعا لا يصل لدرجة الكامري..وهو بسبب شدة الهواء ودخوله في فتحات الباب واصطدامه بالمرايا الجانبية..
تنسيم هواء:لم الاحظ اي تنسيم للهواء الى داخل السيارة والحمدلله..
استجابة القير:ابهرتني استجابة القير عند الصعود في بعض طلعات خط السيل..وعندما يبدأ عزم السيارة بالانخفاظ يتم شد النمرة مباشرة مما يحافظ على سرعة السيارة في الحد المطلوب..>>الحد المطلوب200..
المكيف:كان تبريده عالي جدا اثناء السير حتى اني تذكرت قوة المكيفات الامريكية..اضطررت الى تخفيف المروحة الى 1 ودرجة البرودة الى نصف التبريد..
العودة من الطائف كانت في نفس خط السير الساعة الرابعة عصرا تقريبا ولكن زاد الوقت بسبب توقفنا لزيارة سريعة لأحد اقاربنا في مكة حيث وصلنا المدينة الساعة التاسعة والنصف تقريبا..
النتيجة..
يزداد اعجابي بالسيارة يوم بعد يوم..وسوف تكون اختياري الأول عندما ارغب باربعة سلندر..
ولي عودة باذن الله مع مشاركاتكم بعد عودتي من زواج أحد المعارف..
تقبلوا تحيات أخوكم المهجول:الوقدان

الله يعافيك وان شاء الله تكون احد مالكي مازدا

حياك الله :emot154: وأن شاء الله تكون احدى ممتلكين الزووووووم .

,, زووم بدون تعليق و mazda62005 يعطيكم العافية على الردود ,,

بالنسبه للسياره ما عليها كلام ما شاء الله شكل حلو ثبات عالي مواصفات روعه قطع غيار بسعر معقول بس بالنسبه للوكيل ان شاء الله الشباب يفيدوك لاني من الامارات ما اقدر افيدك بس بالنسبه للسياره ما عليها كلام الها معي 3 سنين ونص وما شاء الله عليها ما غير فيها الا الفحمات مره واحده فقط اما بالنسبه للسعر ما اعرف في السعوديه بس بالامارات تجيب اكثر على ما اعتقد وان شاء الله تكون خير عليك

حياك الله اخوي mutasm في الرابطه كل شي الى ذكرت تمام الصيانه سعرها معقول والقطع ايضا ،
إلا شيء واحد سعر مابعد البيع .................... ينزل بسرعه

السلام عليكم جميعا ,, تراني جديد على الرابطة وان شاء الله بأكون عضو بعد أن تتقبلوني
السالفة أني أبغى أبيع اللومينا حقتي وأبغى أشتري مازدا 6 2009 ,,,
السيارة والله من يوم شفتها وسقتها ,, على طول دبغت في راسي ,,
لكن أنا ما أعرف ولا شي عن الوكيل الحاج في الرياض ,,
قريت كم موضوع في مواقع أخرى أن الصيانة غالية ,,
والقطع بعضها مهيب متوفرة فلازم تنتظر أسبوع إلين تجي؟!!
والأهم التعامل بعد البيع ...
طبعا قريت كل المشاركات في الرابطة ,, لكن فيه مشاركات أخرى
في نفس المنتدى تذم الوكالة من ناحية أسعار القطع والصيانة..!!

أنا عارف أني طولت عليكم ,,,, أنا في انتظار اجاباتكم

لتنشيط الرابطه حبيت اطرح سؤالين
الاول اذا رجع بيك الزمان لقبل ما تشتري سياره مازدا هل ترجع تشتريها(هل انت نادم ولا لا)؟
الثاني بعد ما شريت السياره واستخدمها وجربتها هل ترجع تشتري سيارات مازدا مره ثانيه؟
وشكرا لكم

وش فيها الرابطه ماتت ؟؟؟

شرح وافي ويجيب عن جميع التساؤلات

مشكورين جداً على النصيحة والتوضيح

وراح استخير والله يكتب اللي فيه خير

انا ما بزيد على كلام اخوي الوقدان
المازدا 6 سياره عمليه وشكلها جميل وصيانتها خفيفه انا السياره معي 3 سنين ونص والحمد لله
ما غيرت فيها غير الفحمات وانشاء الله ما حتندم على شرائك للسياره
وربنا يكتبلك فيها الخير

هلا حياك..
نتشرف في الرابطة بوجودك..واشكرك على حماسك خاصة وان لك السبق في انشاء رابطة..لكن العذر وقتها ان الأعضاء اللي يملكون مازدا وقتها قليل مرة..لكن الحين تزايدوا وكثروا..والله يطرح في ايديهم البركة ينفعون وينتفعون..
تحياتي..

شف اخوي..
ان كنت تريد مشورتي فانا بأنصحك بالمازدا كوني جربتها لسنة وستة شهور تقريبا تزيد قليلا او تنقص قليل..
سيارة عملية من الطراز الأول..راسية في الخط..عزمها مقبول..تعجبني فزتها عند الاشارات تحسن انها بتنقز..شكلها رياضي شبابي رايق..موديل جديد..مواصفاتها حلوة..اقتصادية جدا ولأبعد الحدود..
يعيبها انها قاسية شوي بسبب طبيعتها الرياضية..يعني لوقارنتها بالأكورد والكامري أجد أنهما أريح وأنعم منها بشكل ملاحظ..يمكن تحس انها ضيقة نوعا ما من الداخل لأنها أصغر من مثيلاتها في فئتها ماعدا السوبارو..لكنها تحتوي خمسة أشخاص معتدلين وهم مرتاحين..
اكسسواراتها في الوكالة غالية جدا مثل الجناح والجنوط(سيارتي 2007 جناحها بــ1300ريال!!!)
لكن قطعها الاستهلاكية اسعارها معقولة مثل الفحمات والفلاتر ..
ومثل ما قلت لك أنا أنصحك فيها لأني مجربها أولا..ولأنها يابانية ثانيا..وانتشارها اكبر بكثير من المونديو..وسمعتها احسن ..
المونديو فخمة وتصميمها خيال ومواصفاتها حلوة وسعرها تشجيعي..وصناعتها المانية..لكني ما قلت لك شي فيها لأني ماجربتها ولا أعرف أحد من معارفي جربها..حتى أسرد لك عيوبها ومميزاتها..ويمكن أن اخواننا في المنتدى الأمريكي منهم من جربها..لا أعلم..
اذا كانت زادت حيرتك فتوكل على ربي واستخره وخذ المازدا..وما راح تندم ان شاء الله..
واذا شفت انك توسع خياراتك بسيارات أخرى كالأكورد والالتيما يمكن تلقى فيها حظ ونصيب طيب..
لكن المازدا من تجربتي ممتازة لأبعد حد..واذا شريتها ما راح تندم عليها..
آسف على تأخري بالرد..وتقبل خالص تحياتي..والله يكتب لك نصيب في الزين..

السلام عليكم.........................

الف الف الف مبروك (عارف متاخر شوي) على الرابطة الزومية والى الامام .

صراحة تقريبا قبل شهر من الان كتبت موضوع عن انشاء رابطة زومية ولكن محد رد علي غير واحد لا ورده كان "ان هذا الموضوع مكانه الشكوى وليس هذا المنتدى " صراحة زعلت .

ولكن اشكر كل من قام بهذا العمل الرائع ولكم مني جزيل الشكر.

ما شاء الله عليك أخوي الوقدان

إجاباتك مقنعة جداً وتنم عن فهم ودراية

من كثر ما ترددت تأخرت في شراء السيارة؟!!

أنا أريد شراء سيارة جديدة عشان تريحني من الخرابات وبستخدمها أكثر من خمس سنوات إن شاءالله

ما يهمني قوة السيارة وكثرة المواصفات الكمالية

أهم شي سيارة: 1- عملية 2- ومريحة 3- وشكلها مقبول!

هل هي المازدا6 2009 أم مونديو 2008 ستاندر أو نص فل

المونديو عليها ضمان خمس سنوات والمازدا مدري كم؟!

أعرف أنك قد أجبت على هذا الاستفسار؟

لكني أريد مزيد من التفصيل ؟ ورأيك في الأنسب؟

لكم مني الدعاء على الرأي والمشورة

شكراً جزيلاً

ما سوينا الا الواجب..
بالنسبة للمستعمل..
راح تلقى سوقها طايح واسعارها نازلة مرة..
خذ تجربتي..
اشتريت السيارة وكالة اقساط..وقيمتها كاش63000ريال..
يوم كانت ماشية 6000كيلو فقط بعد استعمال اربعة شهور تقريبا نزلتها الحراج..بالقوة وبعد الأخذ والشد جابت لي 40000شاملة اجور النقل ورسوم المعرض والدلالة..هذا وهي كانت جديدة لأن استعمالي كان حريص لأبعد حد..طبعا يوم شفتها كذا قلت الله يقلع الشريطية ومن يومها صرت اكرفها كرف الويل..
يوم كانت ماشية 17000نزلتها وجابت لي 34000بالعافية..
إذا كنت ناوي مستعمل فيبغالك تكون جدا حريص على ايجاد سيارة نظيفة خالية من السمكرة والأهم يكون بطنها سليم(المكينة-القير-المساعدات-العكوس-المقصات وجلد المقصات)ولاتشتريها الا على الشرط والأفضل فحصها في الوكالة..
وغير كذا حاول ممشارها يكون قليل..30000بالكثير الا اذا كان صاحبها حريص على الصيانة في الوكالة وتقدر تتأكد عن طريق سجل السيارة بالوكالة..
حاول قدر الامكان انك تحصل سيارة نظيفة حتى ما تاكلك بعدين بالصيانة..بتتعب شوي لكن يهون هذا الحصول على سيارة مضمونة..
مع اني انصحك بالوكالة اذا كنت ناوي استخدام طويل لخمس سنوات اقل شي..
الله يعينك ويكتب لك اللي فيه الخير..

تسلم يا غالي وما قصرت فعلاً ... ونصيحتك صدقني بأخذها في عين الإعتبار ...

باقي بس سؤال أخير

تنصحني أخذ مازدا مستعمل ؟؟ يعني كيف سوقها المستعمل ؟؟

وبخصوص الراجحي نسبتهم مع التأمين توصل لـ 10.5