مشكور اخي على التقرير الرائع والكامل
وما هو انطباعك الان عن السيارة وخدمتها وجودتها بعد استخدامك لها كم شهر
تحياتي أخوي ,,,
طبعا السيارة اللي في التقرير ليست لي هي سيارة لواحد عزيز علي قمنا بتجربة السيارة تقريبا في حدود الشهر تزيد أو تنقص أيام ,,,,
وبعد التجربة أقتنعت بالموتر وأخذت لي واحد واللحين الموتر له تقريبا في حدود الثمان شهور ماشي 44 ألف وكسور والحمدلله الموتر ماشي تمام ولا عليه ملاحظة تستاهل أن تذكر ,,,, وأخر سفرة مشيت عليه أكثر من ألف كيلو متواصل عبيت بنزين مرة وحدة طبعا فيه وقفات للصلاة ...
التكيف ممتاز لجميع الصفوف أهم شي يكون الموتر واقف في ظلال
الدبل ما شاء الله تبارك الرحمن وخصوصا مع تخفيف هواء الكفرات ,,, يعني راح يوصلك مواصيل ما تصلها بعض السيارات لكن لا يقارن بالباترول الفتك على وجه الخصوص ولا يقارن بالاند كروزر الفكسار من 2007 وتحت,,,,,, أما 2008 وفوق ما أدري عنه بحكم إن اللاندكروزر الجديد كبروا حجمه ,,,, وهو أفضل من اللاندكروزر الجي إكس آر من 2007 تحت وهذا عن تجربة لأنه كان عندي لاندكروزر 2006 جي إكس آر .... عيب الإكسبدشين الوحيد بطنه نازل يعني إذا صرت في البر جنب الموتر الشجر مثل الرمث وخصوصا إذا كانت شجرة الرمث كبيرة مثل اللي في الصورة لأنها راح تمسك بطن الموتر وراح يتعلق.... لكن واجهته مرتفعة أرفع من اليوكن ,,,, وأي موتر تمسك فيه شجرة راح يتعلق ... أتمنى أن يكون قصدي واضح ,,,, طبعا أسفل الموتر محمي
بالنسبة للديكور وخصوصا ديكور الطبلون ذكرت في التقرير أنه لو كان مثل ديكور اللنكون النافيقيتور كان أفضل لأن ديكور طبلون الإكسبدشين مجوف وليس مبطن مثل النافيقيتور أتمنى إنك تروح لوكالة توكيلات الجزيرة وتركب النافيقيتور والإكسبدشين علشان تعرف قصدي ,,,, ولا يعني هذا إن ديكور الإكسبدشين سيء بالعكس مقبول جدا وتقريبا خامته مثل خامة اليوكن والتاهو الارمادا كلها ديكورات الطبلون فيها مجوفة ,,,
عزم وقوة المكينة ممتازة ولا سميته فزاز من عبث ,,, الموتر تحس أنه جامد متماسك يعني كتله واحدة
تقييمي له حتى الآن أعطيه 4,5 من خمسة
وأي أستفسار لا يردك إلا الكيبورد
