تكفون وش تشورون عليّ في الإكسبلورر؟..

الف شكر لك اخوي ابو لميس على النصيحه لانها فاتتني واقبلو اعتذاري يااخوان
وكل عام وانت بخير واعضاء المنتدى الكرام

الحقيقه انت ياابولميس افهم مني وادرى وانا والله حتى الركب ماركبته ولاسقته
ولكن ماهو ادفانس تراك وهل هو يفرق عن التراكشن كنترول
وتقبل اعتذاري مره ثانيه يالغالي

يخوي مافيه سياره ماتخرب بس خراب عن خراب يفرق اتمنى التوضيح عشان الفايده وكل عام ونت بصحه وسلامه

ما ذكرت لنا نوع الخرابات اللي تجيك ؟؟؟

هلا أخوي
تبي راي مجرب
أنحششششششششششششششششششششششششش من هالموتر
السيارة تخدمك لحد ال 120.000 كم وبعدها خذ تردد على الوكالة أو الورشة
الحقيقة الموتر طفرني وملييييييييييييت منه
تصدق أنا شاريه جديد عام 2005 ولحد نهاية 2007 وهو أحسن موتر لكن بعد ما تعدى هالمدة بديت معه رحلة التصليحات - مع العلم إني أتعامل مع الوكالة على طوووول - وأنا الآن جالس أكتب هالكلام
وحنا ليلة العيد .... والموتر موقفه لأن فيه خراب للمرةالثالثة على التوالي مع العلم إن آخر مره صلحته عند الوكالة عطون ضمان على القطعة لمدة سنة أو 20.000كم .....

والله العظيم إن توني عارضه بالحراج حق هالموقع !!!!!
طقت كبدي منه .....
مريح صح ...
يشيل العايله صح.....
تعامل الوكالة جدا ممتاز .....
اقتصادي بالبانزين .....
لكن لا يخرب عليك بشي
تكره عمرك من التردد على الوكالة
تصدة مره وديته مرتين بشهر واحد ...
أنا أقول هالكلام وأنا أحتري زبونه ....
ولا ودي تغلط نفس الغلطة .....
اشتر يوكن على الأقل متى مابغيت تبيعه زبونه جاهز ...

ولأي استفسار حط بريدك .....

آخوي الغالي إذا تبي نصيحتي رح شف الباثفندر شكل حلو مواصفات آحلى سعر مناسب

مكينته جبااااااااره ومن وجهة نظري أفضل من الأكسبلورا بكثير

جربت أكسبلورا 2006 سياره ثقيله في قومتها وصوت المكينه مرتفع قليلا

وكثير من الناس عندهم 2002 و 2004 يشتكون من ونه في الدفرنس والقير يخبط بسرعه

بس مادري هل هم تلافوها في الجديد أو لا

أهلين أخوي هب الريح أولا وقبل كل شيء كل عام وأنت بخير وجميع من يقرأ وتقبل الله منا ومنكم صالح الأعمال..

بالنسبة للمقطع يا ليت تكون حريص شوي لأن فيه بعض الشباب ما يبي مثل المقاطع واللي يطلع فيها نسوان ...

بالنسبة للأكسبلورر هذا قديم ..

وبعدين في ملاحظة على السواق وهو أنه لاف الدركسون والمعروف عند التغريز تعدل الدركسون وأحتمال ما نزل الهواء ...

على العموم ما نعرف وش نهايته هو طلع ولا نشب وجاء واحد وجره ... أنا جربت موديل 2005 بسفر والصراحة ما لحظت عليه ثقل يعني المكينة مقبولة

وهو فعلا في نظام أدفانس تراك يثبت السيارة عندما يدور واحد من الكفرات بوش يعمل على تقليل ضخ البنزين للمكينة مع دوس على الفرامل بشكل خفيف يعني يخفف من عزم المكينة لكن تقدر تفصله لكن إذا فصلته تفصل معاه بعض الأنظمة

شكرا والله يعطيك العافية

أخوي

طيب شيك على أخوه التوأم من الميركوري

الماونتير

يجي منه محرك 8 سلندر

وأفخم وأحلى من وجهة نظري

سلام

اهلا وسهلا بك ابولميس اما بخصوص الجديد والله مدري عنه لاني كنت ناوي على واحد قبل وكنت اسئل عنه كل واحد معاه زيه ويمكن ثقل قومة السياره من الانظمه الي فيها مثل تراكشن او غيره الله اعلم لان محركه بنسبه لوزنه ممتاز جدا ولااحد ذكر لي خربات عنه
وهذا مقطع لمديل 2005

[youtube]VT4-KuUjV-E&feature=related[/youtube]


وتقبل مروري

بالنسبة لي عاجبني وأفكر آخر واحد زيه بس خايف من قومة السيارة
والشي الثاني أنا أفكر في الإدي باور بس في موديل 2007 و 2008 الأسيات اللي بالنص تجي مفصولة وأنا أبيها متصلة
بالنسبة ل2009 ما أدري لأني ما رحت للوكالة
في واحد أعرفه معاه 2004 ويمدح فيه ويقول انه عملي وخراباته لا تذكر

تحياتي أخوي هب الريح ... أنا أشهد إن الموتر اللي بتوقيعك هب ريح إلا أعصار

2008 يختلف عن 2005 من ناحية قوة وعزم المكينة والقير

الاكسبلورر بدا يلقى رواج في الاونه الاخيره من الناس لانه في نظري الاختيار الذكي مواصفات + سعر معقول ويحمل بين طياته محرك ذا 4000 سي سي بقوة 210 حصان صافي عند 5100 دوره بدقيقه اقتصادي لكن يعيبه القومة لانه يعاني من ثقل شوي في القومه ممايجعله غير عملي على الكثبان الرمليه وبالاخص الناعمه
للامانه هذا كلام احد مالكي 2005

يا رجل إذا الموتر عاجبك توكل على الله بعد الإستخارة وإن شاء الله إذا كان فيه خيرة لك راح يكتبه الله من نصيبك وإن فيه شر لك راح يرده عنك

الموتر ما عليه غبار ولا سمعنا شكاوي عنه قوية وخصوصا في الموديلات الأخيرة ... وكلام الناس ما ينتهي وأكثره مجرد ترديد مهوب عن تجربة ... والسيارة أشوفها تنشر بين الناس

وبالنسبة للبر شف المقطع هذا والصراحة أشوف عزمه زين ومقبول

[youtube]ZmHh-4j4E34&NR[/youtube]

الله يوفقك ...