والله موضوع مهم جداً ورائع، وفرصة رائعة للإستفادة من شخص ملم بميكانيكا السيارات وأشكرك أخي أبو فهد على المبادرة الطيبة.
أبدأ أنا بالاستفسارات. كما تعلم فقد اشتريت سوزوكي ساموراي موديل 91 بهدف تعديلها، وبالنسبة للمحرك فهو ضعيف جداً وسعته 1.3 لتر فقط. لدي عدة خيارات وأبغاك تساعدني فيها:
1. تركيب محرك الفيتارا 1.6 لتر، كربريتر وثمان صمامات فقط. ويتميز عن محرك الساموراي فقط بأنه أكبر وبالتالي يعطي قوة وعزم أكبر تصل قوته إلى 100 حصان. طبعاً 100 حصان على سيارة بوزن الساموراي وحجمه تعتبر جبارة. يميز هذا المحرك أنه يركب تماماً على نفس قاعدة المحرك الحالي ونفس القير بدون تعديلات، وحتى نفس الظفيرة. ويحجتاج فقط إلى تغيير طرمبة البنزين إلى طرمبة كهربائية.
2. تركيب محرك الجمني، وهو بنفس السعة ويركب على نفس الكراسي ونفس القير، وقوته تصل إلى 85 حصان ويتميز بصرفية البنزين الممتازة بسبب نظام الحقن الإلكتروني للوقود و16 صمام، ويعطي قوة رائعة مثل الموديل الجديد. لكن يعيبه أنه لازم أغير الظفيرة بالكامل وأركب كمبيوتر للحقن الإلكتروني، وغيرها من الأمور التي أنت أدرى بها.
3. لكني قلت إذا كنت سأغير إلى حقن إلكتروني، آخذ محرك القراند فيتارا ثلاث أبواب بسعة 1.6 لتر، مع نظام حقن إلكتروني و16 صمام، فيعطيني قوة رائعة يسيل لها اللعاب وفي نفس الوقت صرفية بنزين رائعة. لكن لابد من تغيير الظفيرة بالكامل وتركيب كمبيوتر للمكينة.
لذلك أستبعد الخيار الثاني مع وجود الخيار الثالث، فسؤالي هو ما مدى صعوبة تركيب المكينة في الخيار الثالث، وهل يستحق العناء أم لا؟
مرحبا بجميع الشباب وآسف عن التغيب عن الموقع لظروف السفر والدراسة وووو وخلوها على الله
بصراحة أنا ماعندي وقت ولا أحد يشره علي لأن أموري متشابكة هاليومين لكن الحمد لله مبدئيا توفقنا برحلة الشارقة وبرضو شرينا سيارة من هناك ولله الحمد وكالعادة ناكل خابور في جمارك السعودية وهو شيء لا يستغرب عليهم
عموما
موضوع الساموراي بصراحة أنا ما أنصحك تدخل في موضوع محرك بحقن إلكتروني إلا إن كان عندك الإمكانيات مثل : ورشة مزودة بكافة العدد وأجهزة القياس و عدد ميكانيكية وكهربائية ، أو عندك كاش (فلوس) وناوي تصرف علية بالهبل ماعندك مشكلة حتى وإن فشل المشروع
فنصيحتي خليك في السليم وابعد عن محركات الحقن الإلكتروني لأن خطأ واحد في التركيب ممكن يضيعك شهور!!! والمحرك موراضي يدور ( خصوصا إن كنت ماراح تشتغل بإيدك!!)
أنا عندي إقتراح جيد ولكن المشكلة إني ما أعرف قياسات قاعدة وشاصي الساموراي (يبيلي أشوفها) وإقتراحي هو إنك تفرغ المحركات (المكينة والقير) ونزل علية مكينة وقير باث فاندر موديل 90 محرك حلو كربريتر وقير ممتاز ما فيه مشاكل والتعديل والترهيم فيهم سهل جدا والقوة 2400 سي سي وتركب مراوح صني كهرب بعد .................. راح يكون زي البقي من زود النشاط
ميزة الإقتراح:
1- غير مكلف من ناحية المشتريات
2- المكينة والقير ممكن أي ميكانيكي يركبهم
3- الترهيم فقط في قاعدة المكينة (المثلث) وهو غير مكلف وما منه خوف نهائيا وبرضو عرموطة القير إن كانت تختلف
أتوقع المشروع كامل ماراح يكلفك 4 آلاف ، وتطلع بسيارة وطيارة بنفس الوقت
أهم شي تأكد إن كارونة الدفرنس الأمامي والخلفي مقابلة لمخارج القير والدبل بتوع محركات الباث فاندر
أنت ركب القير أولا والباقي يمشي سلام سلام
وفيهم ميزه برضو وهي فيما لو إنك أردت تعدل لاحقا المحرك من 4 سلندر الى 6 سلندر إلكتروني يعني 3000 سي سي كل ماعليك تسويه إنك تجيب لك هاف كت من دبي لباث 96 ب 3500 ريال وركب المحرك مع الهارنس والكنترولر على نفس القير الأول وتطلع بصاروخ أرض جو!!!
وبرضو وهو الأهم إبتكار خاص بك (لم يقوم به أحد قبلك ولم تنسخ الفكرة من أحد ولم تدع المجال للفاهم بأن يستبسطها!!!)
ولما تتم العملية بسرعة كسر رؤوس الكل بالمقاوم والتطعيس وبعدها إعتزل الترهيم والمقاوم!!!!
ليش؟؟؟؟
علشان تضل كأسطورة ماينسونها الناس اللي حواليك واللي يعرفونك وما تترك المجال للآخرين اللي صاروا بالمستقبل أقوى منك إنهم يمسحون خبرتك لأنك ماخليت لهم الفرصة يتفوقون عليك!!
هههههههه......................... تنسيييييييييييييييييييييييم
تحياتي لكم
