من خلال تجربتي بالورش أغلبهم يطلع بالسيارة مشاوير خاصة ويروح فيها البيت بالليل
مرة كنت عند باكستاني بوقت متأخر (9 الليل بالصناعية القديمة) وأغلب الورش مقفله وكان يحاول يخلص من شغل سيارة قلت له وش فيك مستعجل عليها روح نام وكملها بكره قال ابي اروح البيت وما عندي سيارة تمشي غيرها قلت له خليها وانا أوديك ما رضى شكله ناوي يروح التحلية :tongue:
ومرة كنت بورشة سوريين أصلح المكيف وسمعت واحد منهم يقوله في سيارة نرجع عليها قاله ايوة بس لا تسرع فيها عشان المساعدات منتهية
ومرة شفت ميكانيكي يقول لصاحب هيلوكس اتركها عندي شي ابي اتأكد منه ولازم أفكفك المكينة على رواقة في صوت غريب مو مطمني
بعد ما راح قلت له صوتها عادي ما فيه شي
قال وصلني قير من الإمارات وما عندي سيارة تشيله غير هذي ضحكت عليه عشان احمله فيها وبكره يجي ياخذها
أنا بصراحة ما اترك اي سيارة عند الورش افضي نفسي واجلس معهم لين تخلص سيارتي
بما اني ما عندي دوام الخميس مخصص صباح الخميس للإصلاحات والصيانة
حتى لو ما عندي شي تعودت اروح الصناعية افحص واشيك وامر على الورش الي صلحت عندهم قبل اسولف واسلم عشان اذا تجيهم محتاج شي يتوصون فيك
وصرت استمتع بهذا الشي أجلس أسأل وامزح واشوف السيارات الي عندهم وش فيها
