لأصحاب التاهو واليوكون فقط !!! نصايحكم في تاهو (دبل) ؟؟!!

المهم تبقى هاذي وجهات نظر

اخوي el3arbigi مالك الا الاستخارة والله يوفقك

السلام عليكم

اولا احيي اخوي ابو ديالا

و TAHOE_LTZ

و لحن المشاعر

و قروب التاهو

ثانيا
يا خوي انت حاله استثنائيه

يعني 1 \ 10

الحمد لله كان عندي تاهو 2009 دبل خطوط 100% ممتاز

تطعيس 100 % ممتاز

داخل البلد ما يحتاج خذ رجال و كان عيبه داخل البلد ان في بعض الحواري الضيقه
كنت اتضايق ان مراياته ما تنسفط

شريت بعده برادو و لو اقدر ارجع اليوم الي بعت به التاهو كان رجعته و ما بعته


يعني الاكثريه يقولون ممتاز و انت ع شان خرب عليك تقعد تذم فيه

هذا عيبنا

جراح 55

انت شكلك اول مره تشري جمس :)

بالنسبه للدبل لاتخاف , وتراه سهله لا ابطيت ماشغلته

اقرب برحه وخذ فره فيه 5 دقايق : )

يعطيكم ألف عافية جميعاً ومشكورين
السبب الي خلاني أخاف من الدبل إن موظف في وكالة العيسى يقول الدبل إذا ما استخدمته كثير بيخرب عليك ويحتاج صيانة ؟؟!!! :confused1:
أنا بصراحة استغربت من كلامه كيف إذا ما استخدمته كثير بيخرب ؟؟؟!!!
هل هو صحيح هذا الكلام ؟؟؟
وهل صحيح إن الدبل يفرق عن الي بدون دبل عشرة آلاف ريال ؟؟؟

نصيحة من اخوك المسلم والله ماهو تحيز ولا لي هدف من رائي
اقولك لاتاخذ لا تاهو ولا يوكن
والله شف معاي دينالي 2007 والله العظيم فاك القير له يومين وماني محصل له بعض القطع
مع العلم انها قطعتين الاولى بثلاثة وشوي والثانية 2900 يعني ستة الاف
المشكلة ماهو بالسعر بالمملكة كلها ماحصلت يقولون لازم طلبية من دبي تجلس لك 20 يوم
والتشليح اذا سالتهم عن موديل 2007 مستغربين يقول موديل جديد مسرعه يخرب
المهم يمكن اهمال مني او عيب مصنعي او ان المشكلة انحلت بالموديلات الي بعده
بس بوجه عام الموتر حساس وكله الكترونيات وحساسات مجرد ماتدخل البر يطلع صوت لليايات مايروح الا بغسيل ديزل او مع الوقت يروح
وداخل المدينة ثقيل ودك توقفه بالمضله وتروح على سياره صغير

اسف اني طولت عليك لاكن والله انا طلقت الامريكي كله اذا براسك سيارة لاتفكر بغير الياباني شي

اتمنى لك التوفيق والسداد وعليك بالاستخاره

آنآ ابي نفس الطالب الي تبيه بالضبط tahoe ltz
معليش خرجت شوي من الموضوع

بخصوص الدبل
انا عندي سوبربان 1999 دبل
معي من 12 سنه وما أشتكيت من الدبل تماااام ما شاء الله
من ناحية الرجة ما فيه

تجربتي للموديلات من 2002 وتحت

الامريكي سيارة مدينة اصلا لكن اذا كان الطعس مجرد مرور الكرام ماياثر فية

والجبال بشرط الخفة علية وتغيير الكفرات حجرية - اعتبرة ممتاز ويعبر بسهولة

لكنك تبي تحترف وتسوي مغامرات انصحك تاخذ جيب

الدبل مافية اي مشكلة في الموديلات الجديدة على حسب ماسمعت

الامريكي النظيف بشكل عام ابومواصفات خليجية او سعودية ممتاز جدا لسفر ومريح

لكن اشترة ولاتفكر تبيعة لانك راح تخسر من قيمتة الشي الكثير

وعليكم السلام ورحمة الله وبركاته
انا بجاوب على اللي اعرفه بحكم خبرتي القصيره في التاهو
وردودي بالاحمر


أنا بأذن الله الواحد الأحد ناوي أشتري تاهو إل تي زد ( دبل ) 2012 وحط بين قوسين دبل لأنه المحور الأساسي في موضوعي

احسنت الاختيار

سؤالي رجاءً لأصحاب التاهو واليوكون ( دبل ) والي لهم تجارب طويلة وسنين مع هذي السيارات

انا معي تاهو 2011 دبل

رجاءً الي ماعنده مثل هالسيارات ولا جربها لا يفتي من نفسه

سم خلاص اللي ما معه هالسيارة بدبل لا يرد :bigggrin:

حتى الي عنده تاهو أو يوكون لكن بدون (دبل) رجاءً يترك فرصة

طيب اللي ما عنده دبل لا يرد :smilie20:

هل الدبل في التاهو يؤثر على السيارة ؟؟ أو بمعنى آخر يسبب مشاكل للسيارة ؟؟

من تجربتي التي امتدت لسنه الان لم اواجه مشكله ولله الحمد ( [COLOR="Blue"]ماشاء الله )
[/COLOR]
هل يسبب رجة على الطرق السريعة ؟؟؟

لا وش علاقة الدبل بالرجه ؟

هل يسبب مشاكل للقير ؟؟؟

لا

هل عمود الكردان حق الدبل يخرب كثير أو يسبب رجة أو اهتزاز ؟؟؟

انا من متابعي مواقع سيارات ولم اقراء ولا مرة عن مثل هذه المشكله في اليوكن او التاهو الجيل الحالي ( 2007 - 2011 )

هل الدبل أو الدفرنس الأمامي يخرب كثير ويحتاج صيانة ؟؟ ( أقصد بالصيانة هنا الصيانة الجامدة الي تحتاج ميزانية جامدة ) موب بس تغيير زيت أو حاجات خفيفة مقدور عليها

هذي اجابك عليها ابو ديالا وننتظر الاخ العزيز TAHOE - LTZ بحكم انه مسنتر بالبر حتى مخابية بها رمل

رجاءً أنا محتاج أسمع تجاربكم في أي شي يخص الدبل سواءًَ صغيرة أو كبيرة

الصراحه انا عندي صوت في الدبل ( انا اول مرة اشتري سيارة فيها دبل ) ولا شغلت الدبل يطلع عندي صوت حن حنه او ول وله اذا كان المكان اللي امشي فيه مطانيج ومدري هذا الصوت طبيعي ولا لا

لأني محتار وأخاف أتحسف إذا ماشريت بـدبل

والله انا اشوف تشتري بدبل افضل
حتى لو لاسمح الله احتجته ومعك اهلك ما تتورط وايضا الدبل مرغوب عند البيع اكثر من اللي بدون دبل

مع العلم إنها بتكون سيارتي الخاصة لمدة خمس سنوات على الأقل

يفيدونك اصحاب الخبره الطويلة مع هالسيارة

وأخيراً لو فرضنا إن الدبل مايسبب أي مشاكل ؟؟؟

طيب وش فيه ؟

كيف التاهو أبو دبل مع المطعاس ؟؟؟

الصراحه الموتر ثقيل اذا غرز ولكن مع شوي تنسيم وتشغل الدبل الثقيل يطلع على طوووول ماشاء الله


مع العلم ان الفرق بالوزن بين التاهو بدبل وبدون دبل 100 كيلو بالكثير لدبل بس

أنا بأرد بحكم تجربتي

معي تاهو ولله الحمد له ثلاث سنوات ونصف ولم تواجهني مشاكل بالدبل لحد الآن .

والموديلات الجديده تحسن الدبل أفضل من الموديلات القديمه من ناحية الأعطال .

وكل اللي أعرفهم ما واجهوا مشاكل بالدبل وحتى اعضاء الرابطة ما شفت أحد شكى من الدبل

والسفريات أبد الدبل مو مأثر , أنا الحمد لله بسيارتي قطعت المملكة من شرقها لغربها ومن أقصى الشمال لأقصى الجنوب والبحرين والأمارات ولله الحمد والمنه ما عمره عوكس علي (ما شاء الله )

والطعوس خذ ولد بس مشكلته إذا غرز ما يطلع بسهولة
وأنت بتاخذ فل يعني جنوط 20 وهذي تعقدك شوي بالتطعيس , بس ما عليه تنسم ويمشي صح (شف موضوع لي بخصوص التطعيس) وبس خل الأجواء تضبط شوي شاري كاميرا وبأنزل كم مقطع بحول الله

والثقل أنا الحقيقة ما جربت اللي بدون دبل بس ما شاء الله المكينة شايلة السيارة وزود

والله شف يابعدي ..
لحد الان ما سمعنا مشاكل ازليه بخصوص الدبل
يعني مشكله توجد عند الكل تقريبا , مافيه الحمد لله
واقولك خذه وانت متطمن ..
بالنسبه للتطعيس فيه , الموثر ثقيل
لكن لاننسى انه v8 وببطنه حوالي 320 حصان صافي
يعني طررررب , يكفي راعين الترهيم ماياخذون الا مكينه جمس ولا ls1 : )