السلام عليكم،
أول شيء أبعطيكم نبذة مختصرة عني.. أنا انسان كل سياراتي الماضية كان مستواها عادي.. يعني أكثر سيارة سقتها كانت كامري موديل 1998 لمدة 10 سنوات، وسقت هيونداي موديل 1998 لمدة 3 سنوات، وسقت هوندا أكورد موديل 2001 لمدة سنة.. يعني بالعربي.. كل المميزات اللي بالسيارات الجديدة ما قد جربتها (مثل البصمة، تشغيل السيارة بدون مفتاح، الكاميرات، الشاشات... إلخ)..
بالتالي أنا جديد على عالم السيارات الفخمة.. ولا أبغى أطخ سيارة بأكثر من 300 أو 400 ..
أكثر السيارات اللي لفتت انتباهي حالياً هي: أودي A6، و BMW الخامسة، و ميرسيدس فئة E
وأكثر سيارة حمستني هي أودي A6 لأن الستنادرد حقتها فيه كل الكماليات الأساسية ما عدا النافيقيشن بزيادة 12 ألف ريال تقريباً، فتطلع قيمتها حوالي ميتين وشوي.. لكني متخوف من الأودي لأني ما أحسها مرغوبة كثير في السعودية، ومتخوف من ساماكو لأن ما أعرف شيء عنهم ولا صيانتهم .. ومتخوف من نظرة الناس للأودي (بيطلع لي مليون واحد يقول لي ليش ما شريت كذا وليش ما سويت كذا).. غير الأشياء هذي أنا مقتنع بالسيارة ..
وبالنسبة لل BMW الفئة الخامسة، فاللي محمسني فيها هو اسمها ونظرة الناس لها بالإضافة لشكلها الخارجي الجذاب. مشكلتها ان سعرها مرتفع نسبيا، والستاندرد حقتها ما فيه أي كماليات تسوى (صح والا لا؟)... يا ليت أحد يأيدني والا يخالفني ويتذكر ان ميزانيتي ممكن تزود عن الميتين بخمسة آلاف كحد أقصى تقريبا..
وبالنسبة للمرسيدس الفئة E، فاللي محمسني اسمها الكبير ومن المؤكد إنها مريحة بالسواقة، ولكن تبقى فئة E أقل بكثير من S ولا تحس انك تسوق سيارة فخمة مرة.. بالإضافة إلى إنه تصميمها من الخارج غريب..
واضح من موضوعي إني أميل للأودي A6 بالفئة حقت 200 ألف ريال.. وش رأيكم؟ وش تنصحوني؟
