و عليكم السلام
أشكر ثناء الأخوين الكريمين مركز جوانا و
+KoRn , و الله يقدرنا على المساعدة.
أخي العزيز.. طالما أنك في الرياض فأدبرك بإذن الله لا تشيل هم لا في الورشات و لا القطع و زيت القير و لا أي شيء.
مشكلتك يا الطيب في حساسين في القير.
هذول هم:
طبعًا الأبيض كان في موديلات 2003 و تحت , و كان به عيب مصنعي ينتع و يعلق كثير. فتم إصدار الجديد الأسود لحل العيب. موديلات 2004 و طالع تلقائيًا فيهم الإصدار الجديد. فلما ركبت الجديد سويت برمجة سوفتوير السيارة في الوكالة بـ 200 ريال.. و الحمد لله كل شيء تمام.
هذا للثقافة طبعًا :wink:
المهم..
بلف البدي حق قير البيجو فيه حساسين للتعشيق نفس شكل الي بالصورة فوق , و 6 حساسات لأمور أخرى لحسابات في كمبيوتر القير ما أحد يتطرق لهم و لا يعطلوا (على أية حال سعر الواحد 110 ر.س.).
تقريبًا سعر الحساسين المقصودين حوالي 800 ريال للاثنين. أنا من سنتين شريتهم و غيرتهم بعد التوضيب , و الواحد بـ 300 بس ما أدري الحين , أنا مفترض كذا علشان غلاء الأسعار و الله أعلم.
هذا بلف البدي:
لاحظ الحساسين الرئيسيين في الأعلى.
بعدين أخوي الزيت الأصلي سعر العلبة بـ 60 ريال تجيبها من الموزعين برا الوكالة. و إذا بغيت زيت قيرات فولكسواجن بـ 45 و هو تراه نفسه . و عندك نوعية بـ 30 ريال ألماني Liqui-Moli كذا اسمها. و ترا كلهم واحد حق قيرات ZF بس كل شركة تعبئ باسمها.
و لونه يجي أصفر فاتح جدًّا و ليس أحمر , تقريبًا مثل زيت الذرة :bigggrin: من جد.
هذا الأصلي الي باسم ( بيجو-سيتروين):
و هذا أبو 30 ريال الي أنا مستخدمه و للحين تمام:
و هذول كمان.. الأزرق حق BMW و الثاني حق سيارات مجموعة فولكسواجن. و ترا هذي الصورة في الوكالة يوم ما كان عندهم زيوت باسم بيجو , فكان يتوفر البديل و هو نفسه كما قلت لك طبق الأصل. و هم معتمدينه. فأخذت الصورة للتوثيق من كاونتر قسم القطع في الوكالة:
و ما فيه زيت بـ 770 ريال! الوكالة عندهم نصب. مرة واحد مثلك سيارته 607 راح للوكالة و جلسوا يلعبوا عليه أن الـ 607 زيت القير فيها life-time و يفرق عن باقي البيجو!! سألت فني كان شغال في الوكالة و الحين فاتح ورشة برا , قال: نصابين. كل زيوتهم واحد!
حبيت أحذرك.
أنت الآن يبغالك أول شيء تفحص كمبيوتر علشان تكشف على الحساسات. و أقدر أوصلك لورشة تقوم بذلك,, لا تشيل همها.
و إذا -لا قدر الله- محتاجة فك قير فالأخ مركز جوانا ما يقصر و أنا وضبت القير حق 206 عنده. نفس حق 407 بس عندك أظن في كلتشين زيادة بس , هذا الفرق. و باقي التركيبة نفسها مع الاختلافات اليسيرة في مقاسات بعض القطع.
باقي أقول لك أن كثير من السيارات -و منها البيجو- ما لها ماسورة تعبئة للقير , و إنما فتحة على نفس جرم القير من الأعلى. يتم وضع لي نحيف من خلاله يُسكب الزيت.
و معرفة المستوى من أسفل القير و ليس سيخ عيار. قير الإكسبلورر نفس الحركة أتوقع. المهم لها طريقة.. و نعلمك كل شيء في وقته.
و لو تكرمت وضح
رقم الهيكل لسيارتك هنا.. سأطّلع على تفاصيل سيارتك في نظام قطع الغيار حق المصنع.
و شكلي طفشتكم يا جماعة بمقال الجريدة هذا :smilie16: , بس لازم نعطي الرجال فكرة علشان لا أحد يلعب عليه.
هذا جوابي أستاذي , و إذا نويت الفحص بلغني برسالة خاصة و خاطرك طيب إن شاء الله.
