جيب مازدا CX9 أو نيسان باثفندر ؟؟

ابراهيم العويس @user_305659 · 15-12-2014

السلام عليكم
وش أخباركم شباب عساكم بخير

أنا قررت أشتري سيارة جديدة وحددت الفئة اللي بأشتريها
وهي فئة الكروس أوفر اللي تجمع بين الشبابية والعائلية والعملية

انحصر إختياري على جيب مازدا CX-9 وَ نيسان باثفندر نصف فل
وكلهم متقاربين بالقيمة والمواصفات والمزايا
المازدا 125,400 ريال (ياباني-ياباني)
باثفندر 126,600 ريال (ياباني-أمريكي)

أ[COLOR="Red"]هم شي عندي ان السيارة تكون عملية جداً وتخدمني أكثر من 7 سنوات
ويكون قطع غيارها رخيص وما تطلب كثير
وتكون مُريحة (راسية) بالخط

أرجوكم ساعدوني ولا تبخلون علي بآرائكم وتجاربكم

تحياتي
[/COLOR]

ابراهيم العويس @user_305659 صاحب الموضوع · 30-12-2014

يعطيكم العافية

abo_amer @user_293802 · 30-12-2014

انا املك باثفندر 2013 ومرتاح معاه.. كنت ناوي اخذ CX9 لكن ضيق المقاعد وعدم وجود تكييف للصف الثالث صرفت النظر عنه ,,انت روح وجرب الاثنين ,, وانتظر موديلات 2015 أفضل .

الجوكار @user_88658 · 29-12-2014

السلام عليكم

الله ييسر امورك ويوفقك

انا على اطلاع بشكل كامل على المازدا عمي يملك واحد .. السياره جدا رائعه وعمليه وجميله وكيلها جيد قطعها اسعارها مقبوله وبعضها رخيص وتعطيك عمر وبالخط روعه عمي دايم يسافر فيها خط جده ومكه من الرياض وعمره ماشتكى فقط يعيبها قساوتها لكن بشكل بسيط

الباثفندر انا شفت الردود هنا وبنظري ان اغلبها جانبها الصواب وغير حقيقي او من تجارب سمعت ويقولون او قديمه ان نيسان الان تغيرت جذريا بموديلاتها الاخيره السياره جميله وتفاصيلها حلوه ووسيعه وجودتها الداخليه حلوه
فالافضل اسال ملاكها بشكل مباشر وترى عادي لقيت واحد موقف اساله وخذ انطباعه عنها

بالتوفيق

مازن سرحان @user_160880 · 29-12-2014

توكل على الله وخذ مازدا والله سيارة ماعليها كلام وقطعها معقوله ولاتنسى الاستخارة والله عند أخوي مازدا ماشية 300 الف زي الحلاوه

majed_cool @user_114922 · 28-12-2014

بصراحة شفت االباثفندر وعجبني لكن كلام الاعضاء عنه خلاني اتريث من ناحيته

البروفسيور @user_25389 · 28-12-2014

CX9 وبدون ادنى شك افضل انا جربت CX9 سيارة رائعة وباخذ وحدة قريبا بس انتظر الشكل الجديد 2016 يقال انه بيتغيروالله اعلم

temsu @user_111207 · 28-12-2014

السلام عليكم ورحمة الله وبركاته

أبعد من نيسان . قطع غالية , أخطاء مصنعية , خرابات كثيرة .
ما أنكر أني أملكه _القديم جدا_ عاش معايا 5 سنوات باستخدام حنون ويطلع خرابات , خاصة الكهرباء :) تشتغل الشمعات في الليل والسيارة شغالة , بكرة تحس انه السيارة ما تدق سلف :(. حاولت أحل المشكلة عند مجموعة كهربائيين , بشكل عام الظفيرة أماكنهم بايخة , بين قواعد الشاصي وهيكل السيارة مكبوسة !!

خذ المازدا . أقلها أصدقائي مبسوطين منه وما شكوا من شيء .

ابراهيم العويس @user_305659 صاحب الموضوع · 27-12-2014

شكراً شباب

Sowper @user_303744 · 22-12-2014

اذا حاب و مصر تجيب نيسان شوف النيسان باثفايندر كلاسيك (الشكل القديم)

ما يمنع تشوفه

speeed1 @user_47102 · 22-12-2014

من ناحية الاعتمادية المازدا اثبت نفسه بالسوق

اما الباثفاندر صعب الحكم على جودته من سنة ولا اثنين فكل اللي بالسوق يعتبر جديد

:: ابو العز :: @user_260719 · 21-12-2014

لاتشتري من نيسان في السعودية لو سيكل :bigggrin:

ssf2002 @user_305649 · 21-12-2014

صاحبي عنده نيسان باثفاندر الشكل الجديد ويشتكي من عيوب مصنعية ومشاكل بالقير

ابراهيم العويس @user_305659 صاحب الموضوع · 21-12-2014

يعطيكم العافية جميعاً

راعي النيترو @user_83791 · 17-12-2014

اعتاول جيل له كانت فيه بالفعل مشكلة وهو الجير هالكلام لموديل 2013

2014 اعتقد تم تلافي العيوب لانه2 من اهلي اشترو والحمدلله ممتازة لحد الان

بس ما انصحك تغامر صراحة خصوصا ان وكيلكم على ماقرات ليس بالمستوى المطلوب

وانت شوف نيسان العربية

أبـوأسـد @user_15810 · 17-12-2014

مدري قريت تقرير عن بعض السيارات بخصوص العيوب المصنعية وكانت نيسان باثفاندر عيوبها المصنعية كثيرة لذلك رغم أن مالي خبرة كثير في المازدا CX-9 لكن أعتقد أنها خيار أفضل لك من الباثفاندر

ابراهيم العويس @user_305659 صاحب الموضوع · 16-12-2014

الله يجزاكم الجنة ووالديكم يا شباب

صراحة فرحتوني بنصائحكم ..

X_abu.s_X @user_189988 · 16-12-2014

وعليكم السلام

ابتكلم عن المازدا لاني املكها ما اقدر احكم الان اذا هي عمليه او لا لان السياره جديده ما بعد كرفتها

لكن اعرف اثنين معهم 2009 و 2010 كلهم يمدحون السياره و الي معه 2009 ماشي 300 الف

اذا حافظت على السياره وحافظت على صيانتها اول بأول بتعيش ان شاء الله معك

بس الوكيل يعطيك ضمان 3 سنوات او 100 الف كيلو

من ناحية قطع الغيار فتعتبر متوسطه الى رخيصه كمثال سعر الفحمات الاماميه 300 ريال
والخلفيه 220 ريال فلتر هوا المكينه 70 ريال فلتر الزيت ( السيفون ) 30 ريال فلتر هوا المكيف 85 ريال
الكشافات الاماميه الواحد 300 ريال رفرف امامي واحد 500 ريال طبعاَ الاسعار تقريبيه جداً جداً جداً

ولا تنسى انها يابانيه يعني تعمر معك اذا استخدامك معقول

بالنسبه لراحه المقاعد تعتبر مريحه بس مو مثل مقاعد الامريكي لكنها ممتازه يعني في الخط ما تحس بألام في الظهر لانها طبيه هذا بالنسبه لمقعد السواق و الراكب اما الخلفيه ففيها ليونه وراحه افضل من الامام

اما راحة مطبها ففيها قساوه شوي خصوصاً ان الجنط كبير وكفراتها قاسيه انا بالنسبه لي عادي
لان قساوتها مومثل السيارات الرياضيه يعني مثل اي سياره صغيره

من ناحية الرساوه كجيب تعتبر ممتازه ومع اللفات تطرب اذا مريت من عند شاحنات مايلعب فيها الهواء مثل الجموس والطاره فيها ثقل بسيط عشان تعطيك ثبات على السرعات العاليه

بالنسبه لي ايجابياتها : سعرها مقابل مواصفاتها وجودتها ـــ مكيفها ماشاء الله ثلج في عز الصيف مع ان الصف الاخير مافيه مكيف لكن بعد ماتشغله بـ5 دقائق تبرد السياره مع ان فيها 7 درجات للمروحه لكني ما قد حطيتها اكثر من 3 درجات وانا ماضللت وكنت شاريها في عز الصيف ـــ رساوتها ـــ حجمها كجيب ماتحس بحجمها كأنها سياره صغيره.. وايجابيات كثيره

اكبر عيب هو عزل الهوا عادي الى سيء لكن عزل الارض تسمع صوت الشارع في راسك اذا كان الشارع مكسر لكن على كلام بعض المالكين الي غيروا كفرات الوكاله ( بريجستون ) بأنواع ثانيه يقولون خف الازعاج وصارت الين في المطبات والعيب الثاني اذا انت مو راعي سرعه مايهمك الي هو الفصله تفصل على 162 كيلو طبعاً هذا الفل اما السياحي ( دفع امامي ) يفصل فوق 200
وباقي بعض الاشياء البسيطه ما اقدر اقول عيوب لكن فيها بعض الملاحظات

اخر شي اذا كنت راعي بر فالسياره ماتنفع لك يعني تدخل البر تتمشى بس او تدخل عند البحر
لكن تطعس فيها وتعاملها كأنها شاص بيخرب القير والدفرنس على طول ولو بحثت عن السياره بتحصل ناس تشتكي من القير او الدفرنس انه دايم يخرب واغلب الي يشتكون منه يا اما انه يدخل فيها بر كثير ويكرفها او ما يغير زيت القير في وقته فا اذا انت تحافظ على السياره من ناحية انك ماتكرفها في البر كثير وتحافظ على الصيانه بإذن الله بتعيش معك بأقل خسائر

اسف اني طولت عليك ادري اني كتبت صك مو رد :smilie16: بس قلت ابفيدك بالي عندي اهم شي لا تنسى صلاة الاستخاره والله يكتب لك الي فيه خير

انا وسيارتي @user_181125 · 16-12-2014

وعليكم السلام ورحمة الله وبركاته

أنصحك بمازدا لأنها اكثر عملية وأقل أعطالا ،

ولا تنسى صلاة الاستخارة

أبو مؤيد @user_128009 · 15-12-2014

عندنا اعضاء هنا يشتكون من الباثفيندر
وحسب الأحصائيات هي من اكثر السيارات اعطالاً في عام 2014