السلام عليكم
يا شباب ويا اهل الخبره
ارجو ان تفيدوني
عندي سياره اكسنت 2014 ماشيه 70 الف طبعا ما قد سويت لها صيانه دوريه ف الوكاله كل صياناتها اسويها برا في بناشر عاديه لكن على عيني وباهتمام شديد لانها الحيله
حصل في السياره تفتفه ورجه بسيطه في المكينه واحيانا ادعس بنزين والسياره ما تجاوب
رحت وديتها الوكاله قالوا لي التالي
الوكاله : اذا السياره خارج الضمان بتدفع 550 كشف
انا: كيف خارج الضمان؟
الوكاله: يعني اذا قد سويت حادث
انا: وضح هالكلام ف الفاتوره
الوكاله: مو حادث بمعنى حادث بس اذا قد غيرت لها اي قطع اساسيه او غير الاستهلاكية خارج الوكاله
انا: برضه وضح هالكلام ف الفاتوره
الوكاله: ما يحتاج لا تخاف هذا كلام متعودين عليه وطالما ان الموضوع بس غيار زيت وكذا فما بتدفع شي
طبعا صدقتهم ودربيت راسي ومشيت
جيت اليوم الثاني استلمها اخذوا الورقه مني وسلموني المفتاح بدووون اي نقاش بعدين قالوا لي (المكينة تحتاج توضيب) :confused1:
وتدفع 550 كشفيه لان السياره خارج الضمان
كيف خارج الضمان قالوا لانك تغير زيت برا
كيف توضيب قالوا فكينا المكينه وهذي صورتها
فاكين غطا المكينه ومصورينها
طبعا السياره معي خلاص وشيكت عليها مبدئيا ما فيها شي .. بس تناحلت معهم ابغى شي يثبت دخول السياره وخروجها وايش سوو فيها
رفضوا يعطوني اي شي نهااااائيا لاني رفضت ادفع بناء على كلام موظف الاسنقبال
وكلت امري لله وبلغت وزارة التجاره ومشيت
يوم وصلت البيت فتحت كبوت السياره لقيت الزيت مطررررررطش ف كل مكان
من وين يجي
من وجيه الغطا
يعني فكو الغطا وركبوه اي كلام
اليوم الثاني رحت لهم قالوا هذي غلطتك ماهي غلطتنا واطلب الله
اتصالات ومناحلات مع ادارتهم الين كلمني واحد قال ماعندك غير حل من اثنين
يا اما تدفع 15 الف مقدم ونستقبلها ف الصيانه ونصلحها وتوقع ورقه انها خارج الضمان وتتحمل جميع التكاليف
والا تصرف وخل وزارة التجاره تنفعك غير كذا ما عندنا
وسلامتكم
وش الحل ووش تشوفو يا اهل الخبره
افيدوني جزاكم الله خير
دمتم سالمين
ومن الكوري معافين
