السلام عليكم
قدر الله علي وصار علي حادث اليوم الظهر..
طلعت من البيت الساعه 10:30 متجه افطر في مطعم قريب من بيتنا واول ما بغيت اخرج من الحي للخط السريع، اعترضتني راس تريله تبغى تدخل شارع الحي. وقفت وقتها عشان اعطيه مساحه يدخل الشارع، وقتها سمعت صوت بوري من الخلف وبعدها تعداني جيب مرتفع. مشى قدامي ومشيت وراه شوي وبعدين وقف ورجع ريوس وصدمني. الرجال وقتها دعس وقلت بالحقه اوقفه.. كلها 10 متر وما دريت والا الرجال دخل على سيارتي بالجنب وشال جنب السياره كلها. وقفنا ولكن رجل حرك من مكانه وشرد.. نزلت من سيارتي عشان اخذ رقم اللوحه..
دقيت على المرور ابلغ على حادث مع هروب الطرف الثاني من الموقع.. المرور قالي بنرسل لك دوريه تجيك..
بعد نص ساعه والا الجيب جاي مسرع.. وقف جنبي ونزل وما دريت والا العقال على وجهي... مسكت فيه وتهاوشنا.. فاروعنا الناس وجاء المرور..
الرجال وقتها قال اني صدمته اول مره من الخلف وبعدين لحقته وصدمته المره الثانيه من الجنب وشرد مني لأنه يحسبني داعشي!!!!
اخذنا المرور وكتب تضارب اقوال بالتقرير وبعدين سألنا اذا نبغى نتنازل.. الطرف الثاني قال انا مابغى منه شئ.. ولكن انا رفضت وقلت ما اتنازل.. الرجال صدمني مرتين وهرب من الموقع وبعدين رجع يتهاوش..
قال المرور اجل نوديكم الشرطه.. رحنا للشرطه وعلمناه بالسالفه.. طلب مني اروح للمستشفى اخذ تقرير طبي بالضربات اللي جات في جسمي
بعدين رجعت للشرطه ورجع لي نفس الشخص يطلب مني التنازل وهو راح يسجل الحادث عليه 100% ولكن رفضت وطلبت حقي كامل بسبب الضربه..
الشرطه سجلت دعوتي ضده وقالوا تروحون لهئيه التحقيق والادعاء العام... المهم استأذنا منهم نروح للبيت اغير ملابسي لأنها تشققت وارجع لهم..
على المغرب وصلنا للشرطه ومن الشرطه تحركت لهئيه التحقيق والادعاء العام.. على الساعه 8 العشاء دخلت على المحقق وشرحت له الموقف وانه صدمني وشرد وبعدين رجع وعلى غفله ضربني وبعدين انا تهاوشت معاه
قالي تتنازل؟ قلت لا، ابغى حقي .. قالي الحين عندنا قضيه الهوشه والحادث تراجع فيها المرور بعدين... قالي المحقق راح يتصل عليك الاحد او الاثنين يتابع الدعوه حقتك.. المشكله انهم ما حطوه بالتوقيف مثل ما الشرطه قالوا لي.. فكوه على طول!!
بصراحه انا اول مره يحصل معاي موقف مثل هذا والظاهر الطرف الثاني عنده خبره واسعه بالمشاكل فقاعد يلف ويدور بالسالفه عشان يطلع نفسه منها..
اعتقد نصيحتي للناس، اذا صار عليك حادث وكان فيه هروب او مشكله تحصل، فالأفضل تكلم واحد يجيك الموقع يساندك لو صار شئ لا سمح الله..
الخبل هذا جاني بعقال والحمدلله ما جاني بسكين او ساطور...
انتبهوا يا جماعه من الخبلان المنتشرين بالشوارع..
