الالتيما 17 I4 بعد 10k كم...مالها وما عليها
صرفية البنزين...
جدا اقتصاديه.
الفل يمشيني 600 كم ويبقى لي اللي يمشيني 50 الى 60 كم داخل المدينه في الرياض. في السفر من جيزان الى الرياض فل التانكي مشاني 550 كم معي راكب واحد وعدد 4 شنط من الحجم الكبير والسفر كان ليلا والجو هادئ في نصف الرحله الاول الى الوادي. رياح وعج خفيف من الوادي الى الرياض. والسرعه بين 140 الى 160. كنت اعبيها فل وانسى البنزين واقول في نفسي احيانا " ليكون انبير البنزين معلق ".* ( اعطيها ممتاز في صرفية البنزين داخل وخارج المدينه ).
عوامل كثيره تلعب دور في صرفية البنزين حتى على السياره الواحده: وزن الركاب والعفش, سرعة الهواء في الخارج, نمط القياده ( التسارع المفاجئ يصرف اكثر من التسارع العادي ) , ضغط الكفرات ومقاس الجنط وغيرها.
راحة الركوب...
ما شاء الله مريحه وتعليق السياره الناعم نسبيا يساعد كثيرا على امتصاص تضاريس الطريق ( اعطيها جيد جدا ). ولكني لاحظت مراتب السوناتا 17 اكثر راحه بقليل واوسع ( استأجرت السوناتا 17 من المطار في احدى رحلاتي الى جيزان ) خصوصا مرتبة الراكب اللي بجنب السواق اللي ارتاح في مرتبة الراكب الامامي للسوناتا اكثر من الالتيما. لكني اجد مراتب الالتيما اريح من مراتب الكامري. امتصاصها للمطبات جيد جدا.
في السفر الطويل مريحه والحمد لله ولكنها ليست بالراحه اللي في المنافسين الامريكان والاوربيين ( اعطيها جيد جدا وليس ممتاز ).
المقصوره الداخليه
كل شي في متناول يدي وملمسه ناعم بسبب الشكل المحدب العام للطبلون وداخلية الابواب والدركسون والازرار. اصابعي اليمين واليسار تتحرك فوق الازرار بسهوله تامه دون ادنى مقاومه. ( ازعجني المظهر المقعر لدركسون للسوناتا 17 للدركسون الكبير الحجم واحسست اني اتصارع مع الازرار اللي في الدركسون لما جربتها ) الامر مختلف تماما في الالتيما 17. الدركسون حجمه جدا مناسب ليس بالكبير المزعج مثل السوناتا ولا بالصغير المزعج. سمك الدركسون جدا مناسب ومريح للاصابع وانعم من الكامري والسوناتا بكثير. اعطي الالتيما 17 ممتاز في هذه الناحيه.
اضاءة الطبلون ...
جدا مريحه للنظر ( اللون الابيض الثلجي ) بينما الجزء الاوسط ( المكيف والراديو وازرار الشاشه ) باللون البرتقالي. ما هي مزعجه وما هي جميله جدا لكني ارى اللون البرتقالي منبه اكثر لا اقل في وجهة نظري. مرتاح جدا من شكل والوان الطبلون وحجمه المناسب وكسوته الجلديه. اظنه آن الاوان للانتقال الى تقنيات طبلون افضل في 2018 وما بعدها , و الاكورد 18 الجديده جايه بطبلون TFT رائع رائع رائع. اعطيها جيد جدا مرتفع.
الفرامل ...
الى الآن اداءها ممتاز. اسمع احيانا صوت خفيف لما احرك السياره من السكون واضغط على الفرامل في الصباح ثم يختفي بقية اليوم. الجلنط foot brake تحت للرجل واعتبره افضل من اليدوي لكني كنت افضل الالكتروني واحسنت مازدا في اعتماده في موديلاتها في السنوات الاخيره.* اعطيها جيد جدا .
التكييف...
ممتاز. سيارتي ما هي مضلله ولا احب التضليل ( احب استمتع بالسياره كما هي ). ودرجتين في المكيف تبرد السياره. في صيف الرياض خلال شهري يوليو واغسطس في الظهر احتاج ارفع المكيف الى 4 درجات ( على فكره المكيف فيه 7 درجات والكتروني ) في البدايه الين تبرد السياره ثم انزله الى درجتين. دفع الهواء هادئ الى الدرجه الخامسه ويكون مسموع في السادسه والسابعه. ( لاحظت ارتفاع صوت دفع الهواء في الكامري 17 والسوناتا 17 ).* استعمل احيانا الاوتو للتبريد السريع وانسم القزاز ولاحظت ان المقصوره تبرد بسرعه. اعطيه جيد جدا.
عزل الصوت...
في* الالتيما 17 جيد جدا داخل المدينه وخارجها بشكل عام.
بالتفصيل...* العزل الامامي والجانبي افضل من العزل الارضي ( سيارتي السابقه فورد ماركيز ...عزلها الامامي والجانبي سيء بينما الارضي ممتاز ).لكني وجدت عزل الالتيما 17 افضل من عزل الكامري 17 ويساوي عزل السوناتا 17. لاحظت عزل فورد فيوجن افضل بكثير وقريب من عزل الباسات الالمانيه. الى الآن ما لاحظت اي اصوات نشاز في المقصوره الداخليه. لكن من الخارج اسمع صوت احتكاك خفيف لما افتح باب السائق او الراكب. ما ادري هل هو في كل موديلات التيما 17 او لا.
صوت المحرك يكون مسموع عند بداية التسارع ( البركه في قير السي في تي ) ولما تاخذ الالتيما عزمها يهدى الصوت ويكون طبيعي. عند تسكير الابوب خصوصا الخلفيه احس كأنها فاضيه من داخل ووزنا خفيف واتذكر ابواب الماركيز او الباسات واقول في نفسي " ايش جاب لجاب ". اعطيها جيد جدا.
قير السي في تي...
قير رائع في هذي الفئه ( السيدان المتوسطة الحجم المخصصه للتنقل اليومي ). احس الالتيما تسير بنعومه تامه بدون اي صراع بين المكينه والقير والتناغم بين المكينه القير جدا رائع. ان احتجت عزم اضافي للتجاوز او طلوع مرتفعات فقير السي في تي جاهز للعمل. وبتحويل عصا القير الى وضع السبورت وبارتفاع ليس بالكثير في عدد دورات المكينه يقوم قير السي في تي بانجاز المهمه بنجاح. واذا احتجت الحد من انطلاقة الالتيما في منحدر او احتجت الى توقف سريع فما علي الا الضغط على زر سبورت في الجنب لتضيء لمبة sport واحس بفرملة المكينه ( وليس فرملة السياره ) تكبح جماح الالتيما. استعملها احيانا عند الحاجه للتوقف السريع وتخفيف الضغط على الفرامل. وفي تلك اللحظه كإني عملت down shifting ونقلت القير الى نمره اقوى والاحظ زيادة عدد دورات المكينه وتقوم الالتيما بالتهدئه ومع ضغطه خفيفه على الفرامل تكون الالتيما وقفت بسرعه بأقل جهد لفرامل الكفرات. اعطي القير تقدير ممتاز.
ما استعمل الالتيما في المقاومات لكن احيانا احب اشوف قومتها مع سيارات بجنبي من نفس الفئه او احب اتجاوز واحد مقفل الجهه اليسار ولا يبغى احد يزعجه وما عنده مشكله يعطل غيره واشوفها تبيض الوجه. واكيد التيما V6 حصان طرواده في هذي المجال. ولو جات الالنيما 18 بقير عادي 6 سرعات او اوتو على محرك 2.0t في الفئه الرياضيه ( مثل الاكورد 18 ) بيكون ابداع. اعطيها جيد جدا مرتفع في هذه الناحيه.
ارتفاع الالتيما عن الارض...
اشوفه يحتاج الى مراجعه من شركة نيسان لأنها ليست فئه رياضيه والاحظها قريبه من الارض وممكن تحك في مطبات ما تحك فيها سيارات اخرى من المنافسين. حكت معي اكثر من مره في اماكن ما كان الماركيز يحك فيها. اعطيها جيد مرتفع.
فتحة السقف...
انسى افتحها في صيف الرياض واذا شفنا سهيل وزانت الامور وهب البراد هذيك الساعه افتحها واستمتع بالبراد. لا اسمع فيها اصوات والحمد لله. لا استطيع تقييمها بشكل كامل الى الآن لان استعمالي لها محدود في الصيف. بشوف في بقية الفصول كيف ادائها. بشكل مبدئي.....لاملاحظات.
الشاشه...
جدا عمليه واستجابتها عند اللمس ممتازه وما لاحظت فيها اي تعليق او تغير في الوضوح. الكاميرا في النهار جدا واضحه ولكن في المساء " مشي الحال " لاحظت كاميرا السونانا افضل من ناحية الوضوح ولكنها اصغر من الالتيما. اعطيها تقدير جيد جدا مرتفع.
رادار الالتيما ...
دقيق ما شاء الله.* هذه اول تجربه لي مع الرادار. كنت متخوف في البدايه من استعماله. ولما تشجعت لقيته مريح جدا في المسافات الطويله. لكن داخل الرياض مزعج نوعا ما اذا اللي قدامك ركب راسه وما فتح لي الخط. بشكل عام اعطيه ممتاز.
تغيير الزيت...
لدى الوكيل كل 5000 كم او 10000 كم. تكلفة الزيت مع تغييره 92 ريال فقط ل 5000 كم ( اختياري انا ). ولكن الوكيل يضيف عليها ما يقارب 400 ريال مقابل التشييك على السياره. حركه نجسه. في ال100 الف كم فيه 20 تغييرة زيت. 15 منها لازم المستهلك يدفع من 400 الى 600 ريال. و 5 تغييرات منها ( بعد كل 4 تغييرات ) بيدفع المستهلك بين 800 و 1200 ريال. مجموع المبالغ المشفوطه من جيب المستهلك الغلبان في اول 100 الف كم هو حول 11000 ريال ولو اضفناها الى قيمة السياره عند الشراء ( 83 الف ريال ) بيكون السعر الحقيقي الالتيما الفل 4 اسطوانات:
83 الف منها كاش معلنه
11 الف منها مقسطه على 100 الف كم
المجموع= 94 الف ريال
وبكذا قدر العيسى يخفض سعر الالتيما 17 فل كامل 4 اسطوانات الى سعر منافس يبلغ 83 الف ريال فقط , وسعر الالتيما 17 فل كامل 6 اسطوانات الى 87 الف ريال فقط.
حركه تسويقيه ذكيه اتمنى وكيل هوندا يتعلم منها.
المشكله ان العيسى مانع يبيع زيت الالتيما في قطع الغيار ورابط الضمان بالالتزام بالصيانه والتشييك عنده. يعني بالعربي .....ماكو فكه. تكلمت مع اكثر من موظف في محلات بترومين للخدمه السريعه سعوديين وفلبينيين واكتشفت انهم يسيرون على نفس خطى العيسى بل اغلى احيانا. لكني عرفت من احدهم ان زيت الالتيما هو 10w30. ما احتاج اتصل لعمل موعد صيانه دوريه في كل فروع العيسى في الرياض باستثناء فرع السويدي.
بشكل عام, اعطي الالتيما 9.5 من 10 وراضي عنها كل الرضى الى الآن.
