هام لأصحاب اللومينا والكابرس 2003-2004هام

245 كم @user_12338 · 13-07-2004

السلام عليكم ورحمة الله

أخواني أصحاب اللومينا والكابرس

أحذروا من البطارية ... كانت (( وانا اقول كانت )) عندي لومينا موديلها 2003 اس اس ،، طلعتها من العيسى ودخلتها لصيانة 15ألف كم ...
وبعد الصيانة بيومين كنت موقف السيارة داخل البيت ويوم جيت اشغلها ماطاعت
ودقيت على الرقم المجاني علشان يسحبون السيارة
ارسلوا سوداني من الشرق لنقل السيارات وجاي يسحب رجليه المهم الرجال قالي انها البطارية
جاب المفك قام يحاول فك زر التركشن ماطاع وقلب على زر الباور يبي يفكه ماقدر
وانا اقوله ليه يقولي ان الزر يطلع علشان تحته زر ثاني يفتح القير ويرجها لل إن ويسحب السيارة

شفت الرجال ماهوب لمها قمت وتطاقيت وياه مشخ لي الزر وبغى يكسره ...

الزول ذلف من غير رجعه قمت ورحت لمحل بطاريات اخذت وحدة مستعملة وركبتها
في السيارة ويوم شغلتها السيارة ماهي طبيعية حتى الدعسة تغيرت
والتركشن خرب صار يفصل ويشبك لحالة المهم وديتها للوكالة
ودخلتها عليهم قعدت اسبوع وكل يوم اتصل عليهم اقولهم وش فيها السيارة يقولون ماندري
وبعد اسبوع دقوا علي قالوا خلصت تعال استلمها ... يوم رحت لهم قالوا ادفع 156ريال حق بطارية جديدة وشغل يد ... ولعت اتش ... ويقوم الصراخ في الصيانة
يا أنا ياهم الملاعين .... بعد مارفعت صوتي وسمعوني الناس الموجودين في الصيانة قالوا خلاص المبلغ على الوكالة ((( يعني بلا فضايح )))
يعني انا وش ذنبي مالي يومين دافع حوالي 500ريال صيانة .. على ايش صيانة تغيير زيت وسيفون و يشغلون النور والمساحات ؟؟ هذي هي الصيانة ؟؟ كشف على 15نقطة مهمه ؟؟؟ والله اللعب على اصوله

المهم طولت عليكم .. اي واحد يطلع سيارة من العيسى او الجميح او التوكيلات العالمية او اي وكالة لازم يشوف البطارية ويشرط عليهم يركبون بطارية اي سي دلكو ... علشان ماتمرون باللي مريت به ...

وللعلم ترى خراب البطارية صارت مع واحد اعرفه معه لومينا ال تي زد 2003 وواحد معه كابرس ال اس 2004 ... انتبهووووووووووووووووووا

وقريباً ... قصتي الكاملة مع وكالة العيسى من الألف إلى الياء ...

تحياتي

245كم

الزعيـ 11 ــم @user_12898 · 22-07-2004

والله من جد الوكاله مالها امان الصرااحة يا رجال اخذلي كابريس تسعاوي والله يمشي زي الحلاوة .. ههههههههه ...الله يعينك اخوي
سلاااام .

Caprice @user_9992 · 21-07-2004

ياشباب ان بجدة وسيارتي من العيسى
هل اقدر اصلح المشكلة ذي عند التوكيلات العالمية؟

SS...$$ @user_9050 · 18-07-2004

الجميح ما يمشي معهم الا العين الحمراء يعني انا اتعامل مع دبي اقولهم السياره فيها كيت وكيت وبعدين يتصلون علي الصيانه واوديها لهم و صيانتهم حلوه بس مشكلتهم الزحمه لو يفتحون فرع ثاني للصيانه يكون احسن .

قبل البيع حلوه بعد البيع المعرض ما له دخل فيك اي شي يصير روح للصيانه

اذا حاب تسال عن شي ثاني او تبي معلومات زياده راسلني على الخاص

تحياتي

245 كم @user_12338 صاحب الموضوع · 18-07-2004

شكراً اخوي الملك ديل بييرو على ردك ومشاركتك ... ان شاء الله موتر الوالد مايصير فيه شي ويتبهذل مع هالوكالات ...

بس ماقلت ليه ماخذوك المنتخب ؟؟؟؟؟؟ يبون فزعتك ياخوك :D

وياليت تكثر من الاحطياط ... تراااااه مرررررة وااااجب :D :D :D :D

تحياتي

245كم

الملك ديل بييرو @user_12572 · 17-07-2004

الله يعيينك يا خوي 245 كم

والصراحه الوالد معه كابريس LTZ 2003 والحمدلله ماشيه معه تمام

ومشكووور وما قصرت

والإحطياط واجب

الملك ديل بييرو

245 كم @user_12338 صاحب الموضوع · 17-07-2004

شكراً جمعياً لتفاعلكم ....

أخوي فتى التحلية ... انت معك لومينا اس اس ؟؟؟ ليه صرفية ؟؟؟ اما بالنسبة للمطب انا اشوفه عادي بالنسبة لسيارة سبورت مثل ال اس اس ... مطبها رياضي بحت ... بالعكس ايام اللومينا حقتي مبسوط عليها ... بس الله لا يوريك يوم خذت جيب انفوي مع ان مكينته 6سلندر تعال شوف الصرفية ياشيخ تكره نفسك ... اما اللومينا صرفيتها جداً معقولة ... ولا تنسى اخوي تقولي كم موديل سيارتك ولونها ... يمكني شفتك في التحلية يوم من الأيام :D ... يمكن انت اللي في بالي .... تحياتي

أخوي SS...$$ ... وش رايك في خدمة الجميح قبل البيع وبعد البيع والصيانة .. ابي نصيحتك لأني ناوي ان شاء الله وكتب اني اطلع من عندهم لومينا اس اس 2005 .. لا تبخل علي بإجابة وافية اخوي .... تحياتي

أخوي معاند الجرح2 ... والله انك صادق بعد لو فيه لون اغمق من الأسود عطهم ياه ... وبالنسبة للعشق فما ظنيت

سيارة غير اللومينا عشق اول وآخر ...

تحياتي للجميع

245كم

معاند الجرح2 @user_5009 LUMINA SS 4 EVERE · 16-07-2004

اهلين اخوي 245
كيفك شخبارك واخبار الشباب الحلوين
اقولكم قصه صارت مع واحد من اصحابي معاه لومينا 2002
وللاسف السبب من من مصانع هولدن
السبب الرئيسي من الوكيل
مثل ماقالوا اللي قبلي
مالهم حيل يفصلون البطاريه من شان البرمجه
اول ماطلع السياره يومين وطفت البطاريه راح الوكاله
نفس الطريقه قالو له السعر 150 تغير بطاريه جديده
كنت معاه وصياح وهوووشه على كيف كيفك
قالو خلاص علينا الحساب وغيروها على حسابهم
وصاحبك السواداني اللي جببته مو فاهم شي
لان اللومينا 2002 صح يجي زر ينفك وبعدها تفك القير
وبالنسبه 2003 و2004
لايوجد زر ينفك وانما في نفس عصا القير
واقولك بيني وبينك الوكالاء اللي عندنا مايبيلهم الا عين
حمراء وفي النادر عين سوداء
وذا مانفعت حمراء ولا سوداء
فيه رقم في دبي الكل يعرفه اتصال واحد
والله بعد كذا تشوف الوكاله على اصولها صدق
وجرب اذا تبي
بالاخير
اقولك
عندما يكون للعشق جنون عندما يكون للحب فنون
تكون هناك سياره واحده بالطليعه لومينا اس اس
العالم خلفك

SS...$$ @user_9050 · 15-07-2004

الجميح

فتى التحلية @user_1136 · 15-07-2004

الله ياخذ الوكالات كلها ياشيخ ..

انا نفس الشئ صارت لي من فتره ابي ادق سلف ما رضى ..

واطلع على الشارع واجيب لي بطاريه جديده واجي اركبها والحمدلله اشتغلت

وكلها هذا من عندي ولامنتهم الله ياخذهم امين .. خدمات مابعد البيع الا والله سرق مابعد البيع .. والله كل الوكالات حراميه عيال الذين بس شنسوي شرينا وخلصنا ولو بيدي خذت لي هايلكس اصرف لي من هاللي معي .. بلع بنزين ومطب الله لايوريك ..

يله كل طقه بتعليمه ولابووالامريكي لابو اللي صنعه ..

اسف على الاطاله 245

تحياتي ..

245 كم @user_12338 صاحب الموضوع · 15-07-2004

اخوي كابـــSSـــرس آنست وشرفت الموضوع بمشاركتك واحب اوضح لك ان سيارتك بطاريتها اي سي دلكو وهذي البطارية مافيها مشكلة لكن المشكلة في البطارية البيضاء اللي تجي في السيارة هي العلة حتى اسمها غريب اول مرة اسمع فيها وزين سويت انك ماخذت من العيسى ....

اخوي BAssAM ss ... اشكرك على تشريفك الموضوع واقتباساتك الشهيرة .. ياخي بأسألك وش قصتك مع الاقتباسات ؟؟؟ كل مادخلت موضوع لقيتك ناقز اقتباس :D ...
ياعم خل البساط احمدي وقل اللي في خاطرك ... :D

تحياتي

245كم

BAssAM ss @user_8540 · 15-07-2004

كاتب الرسالة الأصلية TSS
والله بعض الوكلات للاسف اسم كبير لكن صيانه زفت ...

الله يكون في عونك واهم شي طلعت سليمه بعض الناس الله لا يوريك.

المهم تكفير ذنوب :D

مشكور على النصيحه

|1||1||1|

[SIZE=6][COLOR=red]BAssAM ss

[/COLOR][/SIZE]

كابـــSSـــرس @user_6060 · 14-07-2004

ياهلا والله بك يالغالي

انا معي كابرس 2004 وانا شاريه وهم ينزلونه من سيارة النقل

وكانت البطاريه مشبوكه بس الى يومك والبطاريه مافيها شي

والموتر طبيعي جدا جدا

والبطاريه يطلع فيها 3 الوان اخضر يدل على ان البطاريه كويسه

وانا الحمد الله عندي اخضر

وانا رحت للعيسى وكنت ناوي اشتري منهم بس جاني واحد مع كابرس 2002 اس اس

قالي نصيحه لله ابعد عنهم تراهم اكبر غشاشين وحراميه ؟

245 كم @user_12338 صاحب الموضوع · 14-07-2004

شكراً لتسييرك على موضوعي اخوي NiCK .. بس ياليت جبت معك الشاهي نقعد نحش في سيارات خلق الله |268|

أخوي luminass_2002 شكراً على ردك بس حبيت اوضح ان السالفة صايرة لي قبل 6شهور تقريباً ... والسيارة انا ماخذها من الصالة يعني مفصولة من يوم طبت المملكة ولسه مالها 3شهور من وصلت واستعملتها يعني المعروف ان عمر البطارية الافتراضي سنة اقل شي ... صحيح ان البطارية تفضى اذا كانت موصلة وماتشتغل السيارة بس المشكلة ان البطارية تخرب مرة وحدة يعني لا شحن ولاغيره ومثل ماقلت صارت معي واثنين من اللي اعرفهم ... الدعوة نصب × نصب وسع صدرك ...

أخوي SS...$$ شكرا على تواصلك بس ماقلت من اي وكالة انت طلعت سيارتك ؟؟؟ مشكور على تواصلك ....

أخوي STRIVER شكرا على مرورك ومشاركتك ... تسلموا اهل البحرين ...

أخوي TSS .. تشكرات فنديه ... :D ... بس والله قهر سيارات مثل العسل تمسكها هالوكالات التعبانة ... بس حلوة تكفير ذنوب ... وربي اللي صار لي مع العيسى مايتصوره عقل ... انتظر وبتشوف القصة كاملة ... عمري ماراح انساها للعيسى ...

شكرا على تسيارك اخوي لوميـــ SSـــنا .. آنست وشرفت ...

أخواني انا اتأسف للتنبيه المتأخر لكن حسبت ان مشكلة البطارية ممكن تكون مصنعي وماصارت الا معي ... لكن بعد ماصارت في اثنين من اخوياي ... الدعوة انقلبت جد علشان كذا حبيت انبه وياليت يعمم هالتنبيه ...

انتظروا قصتي الكاملة مع وكالة العيسى

تحياتي للجميع

245كم

لوميـــ SSـــنا @user_12353 · 14-07-2004

مشكور اخوي على التنبيه ويعطيك الف عافية

TSS @user_5129 · 14-07-2004

والله بعض الوكلات للاسف اسم كبير لكن صيانه زفت ...

الله يكون في عونك واهم شي طلعت سليمه بعض الناس الله لا يوريك.

المهم تكفير ذنوب :D

مشكور على النصيحه

STRIVER @user_11838 · 13-07-2004

مشكور اخوي على موضوعك المهم جدا جدا ..

في ناس يسوون انفسهم فاهمين في السيارات وهم مايعرفون شي ..

الحمد لله في البحرين عندنا وكالة ميتسوبيشي صغيرة ..

SS...$$ @user_9050 · 13-07-2004

انا اول ما سلموني السياره وهي جديده شغلتها تشغيلها مهي طبيعيه قلت للي سلمني السياره قال بعدك ماتعودت عليها (حسباله اول مره اسوق سياره) اخذت السياره وبعد ساعه رحت لمحطة بنزين طبعا طفيت السياره يوم جيت اشغلها ما شتغلت اتصلت على الرقم المجاني قالو تبي نشيله نوديها للوكاله (الصيانه ) نخليها عند الباب لان الساعه 8 بالليل انتهى دوامهم قلت له خلاص لا ترسل احد بالمحطه فيه حق البطاريات سوالي اشتراك ومشيت رجعت للبيت ووقفتها بالكراج بالريوس من بكره الصبح ما شتغلت دقيت على الرقم المجاني وجو شالوها رحت الصيانه قعدو يفحصونها قالو المشكله بالبطاريه حطو جديده على الضمان طبعا .

الوكاله عجازين ما يبون يفصلون البطاريه بالتخزين علشان ما يبرمجونها مره ثانيه.

وهذا السوداني ما عنده سالفه اصلا قفل القير موجود تحت عصا القير يعني امسك القير من قدام ونزل تحت تلقاه تضغط عليه وحرك القير

تحيـــــــــــــــاتي

luminass_2002 @user_4200 · 13-07-2004

مرحبا شباب

احب اقول الى كاتب الموضوع انا انتهاء البطاره شي طبيعي
تخيل ان البطاريه توضع من يوم صناعة السياره وتكون موجود بالسياره والسياره واقفه بدون ماتشتغل

ثاني حاجه اخوي انت غلطان المفروض ماتتصل على الرقم المجاني تشحن البطاريه وتروح بالسياره للوكاله وبدلونها على الضمان وبدون دفع اي مبالغ ، انا صارت معي مرتين وبدلوها لي على الضمان

NiCK @user_11949 · 13-07-2004

مشكور على المشاركه والتنبيه اخوي
والله يعين الجميع على الوكلاء