ردا على موضوع الاخ S8 ما السر في نجاح السيارة اليابانية على الصعيد العالمي

السلام عليكم

شكرا للجميع على مداخلاتهم ...

وللجميع التجية

مارين

موضوع حلو وجميل
يعطيك العافية |352|

ليش ماهو واقعي؟؟؟

وعلى الابواب لا تنسى فهي شي رئيسي... قد شفت سيارة مالها ابواب؟؟؟ أما مواصفات السلامه فأول ما بدوا بتصنيع السيارات ما اظن كانو يتهمون كثير بمواصفات السلامه
فيه اشياء اساسيخ واشياء فرعيه أو اضافيه...

وانا معك ان فيه فرق بين الحادث على مكسيما أو على فولفو وان كانت المكيسما بسرعه اقل... بس شف سيارة غير المكسيما لأنها ورق البدي لو تحط يدك عليه انعفط... لكن مع هذا متوفره باربع ارباقات ومدري عاد عن باقي الانظمه اللي فيها...

خذ مثلاً الافالون أو ES300 اذا بتقارن بالفولفو... أو حتى الاكورد ...



أما الكامري ما تستاهل 65 الف؟؟؟ واللومينا اللي بهذلت عالم تستاهل؟؟؟ والله اللي يقرا كلامك بيستغرب وبقوه.. معقوله سيارة مريحه فخمه من داخل شكلها من برا حلو .. ولا تصرف بنزين وقليله خراباتها ولا تكلف عليك ابداً ... ما تستاهل هالقيمه ؟؟

اليباني عملي جدا جدا وبسيط مهما تكون قطع الغيار غاليه الا انه افضل من الامريكي بمراحل كبيره والالماني عملي بس يحتاج الى صيانه دوريه لاننسى القياده ومتعته والتحكم والسيطره والسلامه حق الالماني


الامريكي شنهو فيه غير الصيانه والخربات مريح فقط لكن بدون سلامه بتقول 8 سلندر وحق خطوط حتى اربعه سلندر تطلع خطوط يباني او الماني اذا قارن بين اليباني والامريكي في الخربات تكون مقارنه غير عادله اصلا اليباني اعطاله قليله ام الا مريكي عيني عليه باارد ه ما يخترب والدليل من نفس الشباب بلمنتدى الا يتكم ويقول الجير وظبته مرتين وقت الضمان والمره الثانيه بعد انتهاء الضمان والسياره كابرس موديل 94 اي فشل ذريع اتكلم عنه والاخ الا يمدح الكابرس في خلال خمس سنوات يوضب الجير مرتين ويوضب الماكينه مره وحده اي نجاح الا حققته السيارات الامريكيه اليوم بس عندى صاحبي جمس سفاري فان خارب عليه الدفرنش قطع توضيب الدفرنش اكثر من 2500 ريال وشراء مستعمل دفرنش 4000 ريال والسياره موديل 97 وكاله شاريه اي جوده في الصناعه الامريكيه لو اكتب من الحين الى بكره ما اخلص من فضايح الامريكي ووين القطع الرخيصه

طولت عليكم شباب وانا عارف انه فيه احد لو بوده يشيلني من المنتدى لاني تكلمت عن الامريكي لكني ما اتكم بعصبيه اتكم بواقع ملمووس عيني على اليباني صحيح مو مريح ولا يوصل في مستوى التشطيب الداخلي والامان والتحكم والسيطره مثل الاماني لكن رااحت بال وبنسبه لي الامريكي يحتاج كثير حتى يوصل الى بساطةاليباني وتقنية الاماني

اخوي كلامك مو واقعي ابدا ....

بالنسبه للسلامه اذا كانت تقول انه اذا كان مكتوب لك يجيك شي بالحادث بيجيك لو مهما سوت وكلامك صحيح بس لازم تفعل الاسباب اجل ليش تربط الحزام اذا ركبت السياره ولا ليه يصنعون للسياراه ابواب اصلا اذا كان مكتوب لك تطيح بتطيح حتى لو كان مكان الباب سد كامل ..... وهل برايك انك لو سويت حادث بمكسيما على سرعة 160 كلم زي لو سويت حادث بفولفو على سرعة200 كلم ...

و بالنسبه لكلامك عن الاسعار وسعر اللومينا زي سعر الكامري صحيح نفس السعر لكن سعر الكامري غاي عليها ولا تستاهل ال65 الف ...
وبعدين حتى من ناحية القياده جرب السيارتين وانت تعرف الفرق ....

أخوي blue chevy

اذا كان الياباني محركه معقد وقطع غياره نار

اذا ماذا نقوول عن الأمريكي والألماني :D

أخوي الاسم للبيع

كلامك صحيح ويقوم على دلائل واضحة وواقعية

شكرا لك ولتوضيحك الجيد

سلاماااااات؟؟ اشوفكم قلبتو الياباني تايلندي ؟؟

يا بعدي..الحين ليش نشوف الكامري اكثر من اللومينا ؟؟ مع اللومينا افخم ومدري عاد عن مواصفات السلامه فيها...
وتشوف ناس تفضل كامري GLI مثلاً بـ 65 الف..يفضلها على ان يشتري لومينا LS ؟؟ أو سيارة امريكيه بنفس السعر...

الجواب وااضح مثل نور الشمس.. الكامري عمليه اكثر من اللومينا والكامري حتى ال93 نشوفها الى الحين بشوارعنا... أما اللومينا 99 ما نشوفها كثير.. وعشان اوضح اكثر الكامري تعيش وسواء كرفتها ولا حافظ تعيش معك ولا تواجه لا مشاكل ولا هم...
والكرسيدا اللي حيل التويوتا حطوها فيها .. والله اللي يجربها بالذات الجي ال اكس.. سيارة بما تعنيه الكلمه .. دفع خلفي وراسيه بالخط.. وسواقتها لها حلاوه.. زيها زي المرسيدس .. تحس بسواقتها وراحتها وكل شي فيها..


أما وسائل السلامه وطقتها.. فـ لازم تصير السياره كلها ارباقات وABS وانظمه ثانيه ومدري ايش ؟ ؟
ما ادري الواحد يشتري سيارة عشان يصدم بها ويشوف وش تسوي هالاشياء؟؟
خلونا واقعييــن :D ياخي لو الله كاتب لك تصدم واقل شي تجرح (لا قدر الله) ياشيخ لو انت مب باكسنت لو بـ فولفو اللي جايك جايك.. صح ولا انا غلطان؟؟؟

يمكن مع هالموصفات وكثرة الارباقات افرض صارلك حادث ولا طلعت الارباقات؟؟
هالاشياء تصير.. واللي يشوف سيارات التشليح يشوف سيارات ما طلع فيها الارباق وصار وجوده مثل عدمه..

واذا صار عند المطارات فوردات وشفر (لموزينات مطار)... اللي داخل المدينه كامري وسوناتا والنترا...

أما تعقيد المكينه بالياباني... والله هذا اغرب كلام قريته .. وشلون اجل ما تلقى أي ميكانيكي الا هو عارف بالياباني من الصدام للصدام.. ووشلون تلقاهم بس يشوفونها تويوتا ولا نيسان أو هوندا ولا يعرفون لها؟؟؟ بالعكس والله ابسط شي الياباني...
وقد قعدت اسولف مع ميكانيكي ..هو بنفسه قالي عندنا بعض السيارات الامريكيه نعرف لها لبساطتها أما اختصاصنا تلقاه بالياباني اكثر شي لأنه هو المنتشر والاسهل..

طبعا الياباني اللي اتكلم عنه كل الياباني باستثناء السوبارو نظامها هو اللي تقدر تقول انه مقعد ومب اي ميكانيكي يعرف له ..

أما باقي الياباني...انت لو تفتح الكبوت عرفت كل شي فيه ..

وشف محركات الياباني وشهي.. الماكسيما مكينتها وحده من افضل 10 مكاين بالعالم... الكامري مكينتها بنظام VVTI... الاكورد I-VETC ...

بعرف وش التعقيد الموجود؟؟


ولا مقارنه قطع الهوندا بالفكتوريا؟؟؟ ياخي بتجيب اغلى قطع الياباني وتقارنها بارخص الامريكي؟؟

قارن اسعار قطع الكامري بأي سيارة امريكيه براسك .. وشف نتيجتها وش بتصير..


ويا اخ مونديو
اقتبـــاس ردك:
---------------
المستهلك الخليجي عامة والسعودي خاصة .. لندخل لجوانب السياسه.. بالكاد .. يستطيع تدبير لقمة العيش .. ليس كل الناس ذوي الدخل المحدود وليس كل الناس لديهم القدره الماليه .. لشراء الشيء الذي يغطىء متطلباتهم .. أبداً بل مستحيل .. الحياة فيها الغني والفقير فيها القوي والضعيف .. ليس كل الناس سواء بالقدره ..
..
هنا السيارات اليابانيه لهذا السبب تبرز قوتها الماديه في ... تلبية ربع متطلبات الفرد ..
ولو كان يطمح للمزيد .. هذه قدرته ..
..
هذا سبب وسر النجاح ..
-----------------

بعرف وين يبرز هالشي وفيه سيارات امريكيه ويابانيه سعرها واحد ... لو فرضنا واحد معه 40 الف ... ليه يفضل يشتري كورلا على ان ياخذ ابيكا أو اوبترا (معليش اعرف اسعارها رخيصه بس ما اعرف كم :D) ... واضح لأن الكورلا تقعد معه وتخدمه اكثر من الاوبترا والابيكا...


اشوف ان الامريكي طاح سوقه تقريباً عندنا.. لأن بنفس سعر السياره الامريكيه نقدر ناخذ سياره يابانيه خدومه اكثر وتعيش ولا تكلف على صاحبها...سواء كان من اصحاب الدخل المحدود أو غيرهم..

سبب قلت الاعطال في الياباني هو بدائية التصنيع و البتعاد عن التكنلوجيا و التكنلوجيا و الفخامه و السلامه و القوه هي اساس الصناعه عند الالمان ....
يعني مثلا ماراح تقارن التكنلوجيا الموجوده في البي ام دبليو و البنز بالكزس اللي ما طلعة شاشة الملاحه و التلفون الا 2004 ( طبعا عندنا بالسعوديه ) بينما هي موجوده بالاماني من سنة جدي ( تقريبا 6 - 7 سنوات) اذا ما كان اكثر ... و عشان نصغر الموضوع شوي شوف الافالون مع سعرها العالي والاوبل الاوميغا وشوف الفرق لا من ناحية الفخامه و لا الاداء و لا القوه و لا التكنلوجيا .
وهذا سبب قلة امشاكل الياباني وقلة صيانته على العكس في الالماني .... مع ان السعر يكون في بعض الاحيان متقارب

NiCK
..
كلامك على العين والرأس .. بس لو نظرة الى كلامي بعين .. الصواب ..
أنا مسؤوول عن كلامي ..
..
99 % متخرج من ثانويه بتقدير ممتاز مافي جامعه أو كليه أو معهد يقبله ..
ويجيك واحد 75 % عشان عنده واو .. أدخل حتى بدون مقابله وبدون أختبار ..
..
أين العدل .. هذي الصراحه ..وأن تَخرج .. أين سيكون مصيره .. في وسط الربع الخالي أم ماذا ؟ .. تشوف الشخص متخرج من جامعة من 5 سنوات شغل مايشتغل ..
..
وين هذا الكلام .. وقلت سابقاً أنا اتحمل مسؤلية كلامي ..
..
لهذا السبب الشخص يبيء شيء يمشي حاله فيه .. ومن ناحية السيارات الياباني يغطي الطلب ..
أنا معاك أن الشعب السعودي والخليجي .. يبي شيء حق كرف .. لكن الياباني فقط ممتاز للكرف .. بس شيء ثاني أبعد بعيد ..
..
تحياتي |3|
..
والحمد لله على النعمه

عيب الياباني ان محركه معقد وقطع غياره ناااااار .
مثلا الفورد فكتوريا مع الهوندا 8 مقابل 6.
سعرهم متقارب بالوكيل.
وقطع غيار الفورد أرخص من الهواندا مع ان الفورد أكبر.
الفورد كل واحد يعرف يصلحه وهو دفع خلفي.

وحتى ينفع الفورد للسواق ورجال الأعمال حتى .
أنا اذا تزوجت باذن الله راح آخذ فورد (عندي شفر الحين لازم نغير)
علشان نجمع للبيت والفورد أول ما يخلص سفايفها ما يضيق خلقي لأن أدري اننها رخيصة.
وشكلها ما تغير من موديل 98 للحين (الفكتوريا)
وشوف تكاسي المطار مع السواق كلهم عندهم فورد وشفر.
لأن مكينته سيط ومو معقد نفس الياباني.
وكافي 8 سلندر يعني مريحة على الخطوط (مفيد لكم انتم يالسعوديين)
صرفيت 8 سلندر تكون خفيفة بالخطوط الطويلة (هذا المطلوب)
أما في المدن فصرفيتها أكثر شوية.
وسامحونا على القصور

اخوي انت تاخذ من كل ياباني نقطة ضعف وتقابلها بشي مميز في امريكي يعني مقارنتك مو عامه ولا عادله

اول شي بالنسبه للصرفيه ما ادري عن الباترول لكن شف غيره؟ وصرفيت الجمس شف كيف والله تذببببح 140 ريال ما يكمل معك يومين

وبالنسبه لقطع الغيار اعتقد اخوي s8 رد عليك لانك جبت اغلى ياباني بهالشي وارخص امريكي

اما توضيب المكينه؟ اخوي من وين جايب هالكلام من قال لك توظيب مكينة الجمس ب 2500؟ انا ايام المطر بوشت على المكينه وتدري بكم وظبتها؟
والله بفوق العشر الاف وتقول لي 2500 :|

وبالنسبه للاسعار لو انك تشوف ان سعر الاند ما يستاهل شف انتشاره بالنسبه لليوكن اعتقد اليوكن ما يجي 001,% من حجم مبيعات الاند ولا وش رايك؟

وبالنسبه لكلامك اخوي مونديو من قال لك الشعب السعودي كذا ياخي السويد يعتبر من اكثر شعوب العالم دخلا ومع ذالك قليل تلقى مع الواحد سياره عكسنا تماما من 18 سنه او قبل والواحد معه سياره الحمد لله على هالنعمه
لو انك قايل عشانها ما تخرب والشعب السعودي والخليجي يبي شي ينكرف ولا يشكي اكون معك :)

اليابانيون مافي فثلهم شعب مطور جدا وله الحريه في الأخراع والعمل لاكن توقعاتي كل اعمال واختراعات اليابانويون لها حدود خصوصا في السيارات واكتفو بنجاحهم على مستوى العالم لاكن لا نقول بأن الامريكان والالمان قد خسرو في منتجاتهم ..
لذالك فأن اليابنويون يفكرون من كل النواحي الاقتصاديه مثلا ..
او السيارات خفيفه الوزن واقل تكلفه وكل ذالك لمصلحه الانسان ..
ولأمريكان يعتمدون على اليابانيون في منتجاتهم بشكل واضح ..

السلام عليكم ..
..
نستطيع حسم الموضوع بكلام قيل سابقاً ..
..
المستهلك الخليجي عامة والسعودي خاصة .. لندخل لجوانب السياسه.. بالكاد .. يستطيع تدبير لقمة العيش .. ليس كل الناس ذوي الدخل المحدود وليس كل الناس لديهم القدره الماليه .. لشراء الشيء الذي يغطىء متطلباتهم .. أبداً بل مستحيل .. الحياة فيها الغني والفقير فيها القوي والضعيف .. ليس كل الناس سواء بالقدره ..
..
هنا السيارات اليابانيه لهذا السبب تبرز قوتها الماديه في ... تلبية ربع متطلبات الفرد .. :rolleyes:
ولو كان يطمح للمزيد .. هذه قدرته ..
..
هذا سبب وسر النجاح .. |1|
..
تحياتي لكاتب الموضوع الأخ مارين .. |3|

السلام عليكم

ما هكذا تورد الابل ...

لن اقارن سعر قطعه معينه باخرى ...

لو احدنا اشترى سيارتين وحده لاند كروزر ووحده يوكن او سوبربان بسعر متقارب

واستخدمها لمدة خمس سنوات وباع السيارتين كم بيكون خسر في كل وحده ...

اتوقع الفرق بيكون شاسع جدا ويقدر بعشرات الالاف ...

يعني كم صرفت عليها فوق مبلغ الشراء من صيانه ومحروقات طوال الخمس

سنوات وكم استرجعت من راس مالي ...

وكذلك لو طبقنا المثال على سياره صغيره سيدان او متوسطه او فاخره ...

وللجميع التحيه

مارين

ومع ان السيارات اليابانية اسعارها اغلى من الامريكيات الا انها اكثر انتشارا واكثر مبيعاً

فهذا دليل واضح على جودة هالصناعة واحقيتها على غيرها ...
لكزس خير شاهد ومثال

تحياتي مرة اخرى:)

وسعر فحمات الكامري 65 ريال بس
وفحمات الكراون فكتوريا 120 ريال
والكابريس 300 وشوي

طيب وبعدين؟

الياباني معروف جدا في قله اعطاله ....
وصيانته السهله وغير صحيح ابدا ان صيانه الامريكي اسهل من الياباني ...هذا للاسف كلام واحد مخرف

اخي الحبيب طاير بالعجة عند اقتباس الردود من الساحة العربية الرجاء ذكر ذلك

ودمتم:)

...... وعندي ملاحظه بسيطه البعض يعتقد ان السيارات اليابانيه اقل استهلاك من الامريكي

وهذا الشي غير صحيح خذ مثلا

نيسان باترول

يستهلك وقود

اكثر من اليكون ( GMC)

مع ان محرك الباترول اضغر حجم سعته 4.5 لتر بينما اليوكن 5.3 لتر

بنسبه للاعطال

ربما اليباني اقل اعطال

ولكنه مكلف اكثر من الامريكي

(من حيث الاسعار القطع و الايدي العامله )

خذ مثلا

فحمات الاكورد (هوندا) سعرها يتجاوز 230 ريال (تقريبا)

بينما الكراون فكتوريا (فورد )

سعر الفحمات لا يتاجوز حاجر 120 ريال

كذالك

توضيب محرك الكرسيدا او الهايلكس ياخذ عليك اكثر 3 الاف ريال

ينما الجمس لا يزيد عن 2500 ريال

مع الاخذ بالفرق بين المحركين الاولي 4 سلندر بينما الثاني 8 سلندر



يعني الفرق الضعف

اما السعره الشراء لاندكروزر سعره يقارب 150 الف ريال (GX_R)

بينما اليوكن لا يتجاوز 125 الف ريال

........

تقبلوا |3|تحياتي