لماذا اخترت السياره يابانيه ؟؟ دعوه للحوار (لامانع من كتابة القصص)

فعلا الياباني اثبت قوته وجودته في شتى المجالات

واشكرك عزيزي الزاااحف على ابداء وجهة نظرك

بسم الله

اول شي اخي اشكرك على هالموضوع

بالنسبه اني ليش اخترت الياباني

والله يا عزيزي

انا من طلعت على الدنيا وسياراتنا يابانيه

اولها السياره اللي تعلمته عليها السواقه
ددسن 85

وعقبها كامري 99

وبعدها سيارتي كامري 2002

اخرها الكورولا قبل 3 شهور شاريها

----
بالنسبه لاني جربت غيرها

ايه نعم عندنا كابرس SS 2003

الجوده بالترااااااب

اكلت مطب على سرعه ( متعود على الكامري )
المهم وانواااع المشاكل زيت القير يهرب والمساعدات الاماميه قفلت

وقبل شهر خرب الايرباق من نفسه
شفت القلق ؟؟؟

ما اقول الا الياباني وبس

وتحياتي لك

:confused: ؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟:confused:

تبون الصراحه مافيه شي افضل من شي كل شي له مميزات زي احنا البشر سوا عند ربنا بس يفرقنا بعض الامور يختلف كل واحد عن الاخر ودمتم .,,,,

شاكر لك عزيزي عاشق ارمادا على التفضل والمشاركه بلموضوع

والله يعطيك خير الارمادا ويكفيك شره

السلام عليكم .......

انا تجربتي مع اليباني سالـــفه

اول مره جربت اليباني صراحه 2002

تويوتا بريفيا


صراحه يا اخوان استعملها اخوي وانا والسواق وابوي وخالي والله تمااام سكر على عسل


المهم قبعنا فيه 3 مرات اشين وحده انا شلت مو ابو الصدام جده وجدته واللــــه ذاك الحادث المهم

بعناها وهي مقيوعه هي فل كامل بعناه واللــــه يجماعه 49000 المهم اخوي شرا كابريس...((مشاللـــه.مشاللــه))

والله تمــــــــــــــام ولا مره طب الوكاله الا الصيانه الدوريه ....

المهم شريت ارمادا ابض والله تماااااام على تماااااام ........ وطعسنا فيه وخمسنا فيه وقاومنا عليه وشوفو السيــــأرات الي قاومتها
.
.
.
.
جمس 2500

لاندكروز vx_r 2006

8100

كابريس ال تي زد

....

وفوق كذا كم مره اكلنا فيه رصف


واعطيك الزبده عن اليباني لا ادور غيره


لكن واللــــه الكابريس تمااام مشالله
هي السياره الوحيده الامريكيه الوحيده الي خشت مزاجي



لكل فقير ربه يغنيه
ولكل شجره ماء يرويه
ولكل جمس ارمـــادا يعديه

حياك الله عزيزي صالح ونورت قسمنا يلغالي

وفعلا افضل شي في السيارات اليابانيه هي ان تقود من دون خوف من الاعطال والخرابات والتعقيدات

وشكرا على المرور

السلام عليكم

بصراحة انا من عمري وانا اتسدح في الياباني

او سيارة سقتها كانت هايلكس 82 ايييييييه
بعدين مرسدس 280 وقعد معاي فترة والشهادة لله موتر ماعليه كلام

وبعدها اخذت اكثر من 7 سيارات وكلها يابانية بأٍتنثاء فولفو

بصراحة الياباني يمزة انه يعيش عندنا لملامئة الاجواء وتحمل الحرارة فالياباني مشاكل الحرارة فيه قليلة بسبب قلة عدد السلندرات من جهه وملائمة الاجواء اليابانية وتقاربها مع اجوائنا من جهه اخرى
ومن ناحية ثانية قلة الخرابات وقلة استهلاكها لقطع الغيار
وكذلك ثبات سعرها بعد البيع نوعاً ما خاصة التويوتا والهوندا
والياباني يتميز بالقوة والعزم بعدد سلندرات قليل وسعة قليلة وهذي ميزة يحاول الامريكي الان عملها في موديلاته الجديدة

ماشاء الله

تدري انا افكر بلباجيرو شكله عاجبني واحس انه حقت كرف بس متردد الى الان بسبب الوكيل

واشكرك عزيزي KEN على تجاوبك الجميل

هلا أخوي وليد

بالنسبة لقصتي مع الميتسوبيشي .. هو الصراحة مافيه قصة .. لكن .. أنا من يوم وأنا صغير كان عند الوالد الله يحفظه جالنت قديمة على أيامها .. بعد كذا شاف إنها ما تكفينا قام وأخذ له كاديلاك موديل 1982 .. وبعدها اشترى لأخوي لانسر موديل 86 تقريباً .. وهذا الكلام عام 1989 على ما أعتقد .. وهذي اللانسر رحنا عليها سوريا ولبنان وجدة والرياض .. وماشاء الله عليها .. ما قالت أح .. وبعد كذا .. أخوي باع اللانسر وشرى له جالنت جديد موديل 1992 في سنتها .. وجلست معنا فترة وأكلت حوادث كثيرة وبعدين أخوي عافها وشرى له فولفو إس 70 .. وغير كذا الوالد عنده مؤسسة وفيها ثلاث سيارات ميتسوبيشي إل200 وهايلكس وميتسوبيشي كانتر. وجيت أنا وكملتها بالباجيرو :)

الزبدة اللي أبي أوصل له .. حنا لنا تاريخ مع هالشركة العريقة.

وياروحي يالميتسوبيشي

تحياتي

Kenny

عزيزي اكورد فضي


اشكرك على الادلاء بقصتك الجميله والحمد لله مو انا لحالي انسدحت عند الاكورد :D

وفعلا الاكورد سياره تستحق الاعجاب نظرا لمواصفاتها الرائعه وجودتها الممتازه

والله يديم قناعتك بلاكورد امين والله يعطيك خيرها ويكفيك شرها





عزيزي KEN

فعلا الالماني لايعلى عليه لكن مشكلته مايتحمل اجواءنا الخلابه ويبغاله واحد يكد عليه

واشكرك على مشاركتك وكنت اتمنى ذكرك لقصة تعلقك بلمتسوبيشي لكن تكفينا طلتك يلغالي





عزيزي MaN aNd Men

حياك الله عزيزي واشكرك على طرحك الجميل والغريب :D ..

وفعلا المميزات والتقنيه كلها في الالماني لكن الورقة الرابحه للياباني هي الجوده






عزيزي AZN


حياك الله يلغالي ونورت الموضوع

وبلنسبه لاختيارك للافالون فقد احسنت الاختيار |1|

ولايهمك كلام الناس الافالون تباع في المعارض ب130.000 وماشيه زي الحلاوه

وفعلا الحب هو ان تحب الشي بمميزاته وعيوبه

واشكرك على الادلاء برأيك يلغالي

السلام عليكم

من رااايي ان اليباني متميز في جهتين بس اللي هي سيااارات الشباااب مثل المازدا والأكورد والسيفيك والكامري والكوريلا والايكو والألتيما والمكسيما والمستوبيشي وغيرها
وسيارات البر مثل الاند كرووزر والباترول والبرادو والهايلكس وغيرها

لاكن سيااارات كبار السن والسمااان يحبوون الأمريكي وبالأخص الكراون فكتوريا والجراند ماركيز والسوبربان واليوكون

وميزت الياباني مثل ما قالوا الشباااب انه مايخرب ويصبر على عكس الومينا والكابريس والأوبل
ولايصرف بنزين ولا يطيح سعره وبعد كااان اول رخيييييييص ارخص من الحين بكثيييير

ولاكن يبقى التميييز في السيارات الفخمه للألماني وهاذا شي ما يختلف فيه اثنييين لاكن اذا قرنتها بالكزس والأفلوون والانفنيتي الألماني خرباته كثييييييييييييره


اسف للإطاله ( حسييييت اني مقدم برنامج سيارات )

الياباني .. جودة .. أداء .. صرفية قليلة ... ويااااااااااروحي يالميتسوبيشي :)

هذا هو الياباني بكل إختصار

لكن زي ما يقولون .. العين ما تعلى على الحاجب ... ويظل الألماني .. تاج كل السيارات

تحياتي

Kenny

اهلين اخوي وليد...والله موضوع حلو.....

اول سياره لي كانت كابريس موديل 91 وياعيني اول مااخذتها ذاك الوقت قبل لاتطيح اسعار السيارات الامريكيه وكان سعر البنزين رخيص......كنت والله اغوص في اسياتها وياعيني على النظام الصوتي فيها...ذكرتني والله ياوليد بايام ثوب النوم والشعر المنفوش لووووووووووووووووووول...

طبعا ماطولت عندي الكابريس مو عشان انها ماتتحمل لا والله رجلي كانت ثقيله عليها وكانت مثل السبيل اخواني وقرايبي والجيران كانوا يتسلفون السياره مني ....تقول فاتح مكتب صدقات بالسياره......طبعا مثل ماقلت لكم 3 سنوات بس وخبطت المكينه وطاح القير وطبعا هذا كان كله من قلة الاهتمام خليتها عند اخوي الصغير وتراه كان غشيم ذاك الوقت ....حتى زيت مايعرف يغير....ووينك يالتشاليح ؟؟؟

طبعا بعد الكابريس كان كل همي اخذ سياره مريحه ولاافكر بالقوه او الجوده او غيره.....فاشتريت فورد ماركيز ابيض نظيف والله بس سويت فيه حادث في البحرين...بعدها كرهته بجد...

بعد الفورد صرت افكر في الياباني خصوصا ان معظم ربعي عندهم ياباني وان الياباني تطور وجودته صارت عاليه مقارنة بالامريكي....اخذت لي كامري 2001 ابيض...وياعيني عليه ....عيني عليه بارده والله ......صحيح الكامري حق كرف.......بس طبعا كنت متعود على بواخر الامريكي فصار لي مده طويله على بال مااتكيف مع الوضع الجديد ...عموما نزل الاكورد الجيل السابع وسمعت عن مواصفاته (تقدر تقول اني انسدحت ياوليد قدامه لما شفته بس لا تعلم احد لووووووووووول)...ولما نزل موديل 2005 قلت خذ لك اكورد ومافيها طقة عصا....بعنا الكامري والحين معنا اكورد وماشي مثل الحلاوووووووووووووووووووووووووووووووه...ومقتنع بالسياره 100%....

ومره ثانيه مشكورين على الموضوع الحلو.....ولاتفضحونا بين العربان عاد...


اخوكم
اكورد فضي

يعطيك العافية على الموضوع الحلو وبقوة بعد .

نبدا نتفلفس شوي في السيارات ومن المنطلق التالي <<< شفتوا اللغة على الاصول.

أولا : سبب شراء الياباني ثلاث اشياء ما حد يطلع عنها ابد وهي:


القوة : اقصد التحمل للسيارة وقلة حاجتها للصيانة مثل ما تفضل الشباب قبلي .


الصرفية : البنزين عبي التانكي ينتهي تاريخ البنزين في التانكي << بالعربي انسى البنزين.


سعر ما بعد البيع : الياباني بشكل عام سعره يمسك اكثر من الامريكي والالماني.


قبل اسبوع حاضر على كامري 2001 اكسل بيع بسعر 48500 وسعره من الوكالة كان 56000.


مصيبة الكامري يا جماعة .


بالنسبة لاستخدام السيارات استخدمت امريكي وياباني بس تبقى في مخي سيارة واحدة بس


تقدر تقول انها اقوى من الكرسيدا حبتين وهي لوريل ( 200 ال ) موديل 88 .


انواع الكرف اسبوعيا الرياض الشرقية لمدة اربع سنوات بعتها ماشية 550الف كيلو :eek:


مكينتها ما فتحت.