الرسالة الأصلية كتبت بواسطة LHS
عزيزي شاطر
نفس جارنا اللي عنده الكريسيدا البيضاء اللقطه اللي كلمت ليدو عنها
عنده جيب شاص يهبل
ياخذ العقل
يكفيك انه تسعاوي موديل 79 تسعه وسبعين عشان ماتحسبها خطأ مطبعي
والجيب هذا بالنسبه للكريسيدا ال83 حسبة أخوها الكبير
وسبحان الله فيهم نفس المواصفات
ووالله حلو
وما فيه عيب
باستثناء
1- أذا دقها سلف بالصبح يصحي اللي في الحاره الثانيه واحيانا اللي في الحاره الثالثه
2- كل شي فيها يطلع صوت ماعدا المسجل والبوري
3- صداماتها من أحلى مايكون بس عيبها الوحيد إنها ممسوكه بالبودي بسيم
4- الكفرات ( الله الله على الكفرات ) مايهناك إلا تلمس عليها من نعومتها بس لا تخاف عراض
5- ايه الكبس اليمين مايشتغل وصدق من قال الزين مايكمل حلاه بس أبشرك ركب لها كبوس فوق التنده
6-المراتب حقتها لون بحري خلاب ويتمتع ببعض الطحالب
7- ايه وبعد ابسط ياعم من قدك , فيها فتحه لكن خطأ مصنعي حطوها تحت رجل السواق وللأسف الضمان مايشملها
8- فيه اير باق للراكب الأمامي مو للسواق عباره عن جركل أبيض 20 لتر ونفس الجركل هذا هو نفسه خزان البنزين لأن العام وهو ماشي على طريق الملك فهد بالرياض مادري إلا والخزان طايح عليه قام حط هالجركل
9- الحوض فيه مميزات الفندق 5 نجوم تخيل إن الباب حقه بس تقول به تك وهو يفتح على طول واحيانا يطيح بس مو دايم
10- المكينه ياعيني على المكينه رجاله من ظهر رجال تخيل انها تدخن من زمان ولا جاها سرطان
لكن باستثناء الحاجات البسيطه هذي السياره تراها صيده لا تفوتك
وانا باتوسط لك عند الرجال غدي ينزل لك خمسه أو عشر ريالات
بس شف أنا أشترط عشاء في مطعم مأكولات بحريه - يمدحون مطعم جزيرة الأحلام - مباركية السياره
هاياشاطر لا تطير من يدك
تراني ماني مسؤول
وبعدين ماباقعد أدور لكم سيارات كل شوي
وماتعطوني عمولتي
شاطر
تراها نصيحة أخ يحب لك الخير
خذها وانت مغمض
:D :D :D
