باجيرو 2007

هلا والله
ماعليكم بتسمعون ان شاءالله كل شي يسركم
المهم بخصوص قطع الرالي آرت انا سرت عند الوكيل ماله اللي فدبي اسمه كراج توتال وهو اييب سامان الرالي ومتخصص في سوالف الرالي بس هو حرامي شوي وسألته عن موتري اذا فيه له سامان لاكن للأسف ماشي بعدهم مانزلو لا فلتر ولا هدرز والمتوفر كله للموديلات القديمة
ومشكور اخوي بلو على الرابط

أخوي Death Like الصراحة شرحك ممتاز يعطيك ألف عافية
هذا لنك لموقع ياباني فيه قطع RalliArt الأصلية، مدري اذا يمديكم تطلبوا القطع بالنت أو لا
وانتبهوا ركزوا في الشرح، لأنه بعض القطع للديزل بس


http://www.poweraxel.com/ralliart/catalogue/pajero/1.html
http://www.poweraxel.com/ralliart/catalogue/pajero/2.html

والله ياخوي الفلتر اللي كان عندي K&N أمريكي من عند رامي..

على العموم.. ITG Filters هذي شركه معروفه.. وهذا موقعها http://www.itgairfilters.com/

والترفيع للشتا.. تمام التمام

الشوجون هو الإسم في بريطانيا وأوروبا

سوي Search بالإسمين وإن شاء الله بتحصل

وسمعنا الأخبار الطيبه عشان نستفيد منك ونشوف سامان لنا يوم نستلم الموتر

|1|

هلا اخوي ديث
ادريبك ماتقصر ومشكووور الغالي
اها الحين عرفت شو تقصد وان شاءالله يوم بركب بتكون من الاوائل اللي بيعرفون
وبالنسبة للفلتر يمكن اللي كان عندك مب اصلي وانا محصل ماركة ثانية اسمها itgجان سامع عنها يقولون زينة ويمكن اركب منه تحصله وين محل يوسف رضا مال المداويخ هو الوكيل مال هالشركة
وعن الصب صراحة غالي سعره بس اذا حصلت بسعر زين حق موتري بركب لاني بعد ناوي ارفعه للشتا
وهالرنقات ماشفتهم اذا عندك صورة لهم حطها
وفي اسم ثاني غير المنتيرو اظن اليابانية اسمها شوجان

وسلامتكم

للإفاده.. الباجيرو في أستراليا إسمها موتيرو

Montero

يوم إدور على النت..حاول إنك تستخدم الإسمين

هذا الواجب أخوي.. ومسموح إسأل مثل ما تحب واللي بعرفه بقولك عليه واللي لا بقولك إسمحلي

:rolleyes:

بالنسبه للكتلك.. هذي سلمك الله الدبه الصغيره اللي تكون بعد المنفولت (الهدرز) وتوصله بالإكزوز

وظيفتها إنها تكتم الغازات وتطلع أقل نسبه ممكنه من الغاز.. للتوزيد.. يجب الإستغناء عنها..

وفي عدة طرق أولها الـ Straight Pipe يعني بايب عادي يركب مكانها.. هذي اللي أنا ركبتها أول شي وبسبتها يوم رحت أجدد حصلت علي 4 مخالفات غيابي (قيادة مركبه تسبب ضجيج)

هو صراحه كان صوت الموتر عالي..

هذي يركبونها جماعة التوربو والسوبر عشان يكون عندهم تدفق غازات بنسبه كبيره من المنفولت

النوع الثاني هو الـ High Flow وهذي اللي ركبتها بعدين وتكون من الداخل أوسع من مالت الوكاله بمعنى إنها تسمح بخروج الغازات بنسبه أكبر.. طبعا بتعطيك صوت رياضي..

النوع الثالث هو الـ Resonator ويكون عباره عن دبه صغيره تشبه الـ High Flow وتركب في وسط الـ Straight Pipe ووظيفتها إنها تقلل من الصوت..

عن مكان التحصيل.. أنا ما حصلت ذيك الأيام ودورت لك الحين وهم ما حصلت.. المشكله في التفصيل تكمن في إن القياس لازم يكون دقيق وإلا راح يضغط على المنفولت والإكزوز..

جرب تمر لفوكس وقوله إنك تبي تفصل وحده.. شوف نوع الدبات اللي عنده.. وأفضل ماركه هي بورلا... رامي يبيع منها بس تقدر تحصل تشكيله أكبر في محطة الإمارات اللي في العوير عند سوق السيارات.. في محل متخصص فيها.. بس أهم شي إنك تعرف قياس الكتلك اللي عندك زتشتري دبه أصغر منها لأنك لا تنسى راح تلحم قطع من الطرفين وبالتالي طولها بيزيد.. وإذا ما حصلت بورلا في ماركه ثانيه American Off-Road بعد زينه..

شكلك حابب إتزود وأنا سويت عندك إحباط...

ولكن تدري.. لو أنا مكانك في هذي اللحظه.. ما بركب هدرز بس ممكن إني أركب إكزوز بس هذي المره عند فوكس مو إكزوز الخليج.. قوله إنك تبي أكبر عزم ممكن ومع صوت رياضي مو هارلي

بالنسبه للفتلر.. والله ياخوي خرب عندي ذيك الأيام.. وأنا قلت يمكن من الفلتر لأن أنا الوحيد اللي كان موتري مزود ويدخل الوكاله للتشيكات والوحيد اللي خرب عندي الماس..

المدعميه.. كنت بركب بعد ما إنكسر البمبر عندي مرتين من البر..

وحصلت عند ARB وشركه ثانيه نسبت إسمها.. إن شاء الله بحاول أدور عليه..

الـ ARB وكيله في أبوظبي.. وتقدر تحصله عند 4X4 اللي عند مطار دبي

بس المشكله إن المدعميات هذي ثقيله وتوصل 50 كيلو

50 كيلو بتنزل الموتر من الأمام وبتهلك الشوك أوبزيرفرز ولازم تغيرهم..

سعرهم يتراوح بيت 4000 - 7000 درهم

اللي بـ 4000 تقريبا يكون حديد واللي بحدود الـ 7000 ألمنيوم

هذي الأسعار من سنتين..

بالنسبه إذا موجود للشكل الجديد..

ماعندي فكره صراحه... بس راسلهم وبيردون عليك وهم بيعطوك رقم وعنوان الوكيل.. للأسف نسيت إسمه...

http://arb.com.au/

أقول أخوي بسألك.. شو رايك برنجات الرالي آرت ؟ أفكر أركبهم على الباجيرو قبل لا أستلمه

ما أدري إذا شفتهم في الوكاله أو لا.. في لونين.. السلفر العادي وفيه الرصاصي الغامج

هلا اخوي ديث ومشكوور وماقصرت على الشرح الحلو واشكر حرصك الشديد
يعني نصيحتك اني مازود ولا اتعبث بالمكينة لانها يديدة ومحد يعرف عنها شي
بس غريبة الفلتر خربلك الماس ليش؟؟ يعني ماتنصحني اركب فلتر لاني ماحيد الفلتر يأثر على الموتر وبالنسبة لل High Flow catlike converter ماعرفت شو تقصد فيه هل هيه البيبات اللي من عقب المنفول و وين بحصله مصنوع خصيصا للباجيرو
لاني صراحة محتار وايد وماابغي اركب شي واندم بعدين يعني ابغي شغل مضبوط
والصراحة برمجة الكمبيوتر وحتى اليوني جب شليتها من راسي الا اذا نزلو خريطة للباجيرو

وسؤال ثاني الله لا يهينك هل يركبلها مدعمية صب ولا ماينفع لان الشكل الجديم انا شايف كم واحد وشكله غاوي الصراحة وفي شركة معروفة اللي اسمها arb فمادري بحصل عندهم للشكل اليديد ولا لأ

والسموحة ادري غثيناك زيادة عن اللزوم بس ماشاءالله عليك عندك خبرة فالباجيرو
وسلامتكم

يا خل يا مشاكس يا وفي

:rolleyes:

صحيح إنك ماشكس.. بس والله إني أحبك في الله.. ما أدري ليش.. يمكن لأنك مشاكس

يعني الحين بيني وبينك.. (حلوه هاي).. لو شو ما حطوا على H3 هل سيضاهي الباجيرو والبرادو ؟

من غير ما أجربه حتى.. خله يدخل البر 3 مرات بس، صدقني السكراب ما بيشتريه..

(الله يعييني على حزب الـ H3 بعد هالجمله)

:D

ونرجع لموضوعنا..

هلا ومرحب بك أخوي رالي..

واللهي حسها مع الهدرز.. تبي الصدق.. ما يبالك الصوت ولا هالخرشه.. صدقني..

أما البرمجه فالمشكله تكمن هنا:

المايفك هو نظام حكري إخترعته متسوبيشي.. الحين بينزل على الإيفو 10

السوق ما عنده الخبره الكافيه لعمل خريطة له لأنهم أصلا ما جاهم باجيرو يزود

كل Uni Chip يبالها Map تنزل عليها وبعدين يسون الـ Tune لمطابقة التزويدات اللي على السياره

المشكله تحديدا إن ما حد عنده خريطة الباجيرو أصلا.. وإذا حد قالك عنده فهذا بس يبي البيزات..

بالعربي بيشتغل الخريطه بإيده.. وهذي الخريطه هي اللي بتمشي المكينه والجير وحقن البنزين..

يعني العقل المدبر لعمل السياره وردود فعلها..

تخيل شو بيصير لو هذي الخريطه ما كانت معموله خصيصا للسياره..

الباترول والباثفيندر والزد والكروزر حتى البرادو اللي مو متواجد في أوروبا له خريطه

كل هذيلا تم طلب خرائطهم من قبل شركات البرمجه وأفضل العلامات التجاريه إلى الآن هي UniChip

والمتربع على قمة الشركات المتخصصه هي Motec

شركة UniChip بالأحرى وكيلها قالي ماعندي خريطه وأصلا مو موجوده.. لو تحب بنشتغل عليها..

السؤال: كيف يا وكيل بتشتغل على شغله إنت ما عندك خبره فيها (باجيرو) يعني أنا بكون أول زبون

في شركه ثانيه مشهوره بس ناسي إسمها في بوظبي (المصفح) قالي نفس الكلام ولكن كان أمين بمعنى الكلمه: بنشتغل بس ما بيكون شغل إحتراف وأنصحك إنك ما تحاول..

رأي الشخصي: خله وكاله ياخوي واللهي أبرك لك

بالنسبه للفلتر: الوكاله غيرت الماس على الضمان بحجة عيب مصنعي ولكن تحليلي هو:

1- فلتر الـ K&N عليه زيت بكثافه أعلى من فلتر الوكاله
2- الماس يمكن ما تحمل زيداة ضغط الهواء بعد الفلتر الرياضي

هنا قلت خلني أدورلي ماس رياضي وما حصلت ودورت على ثروتل ونفس الشي.. ما حصلت


الخلاصه: هذي MIVC يا خوي وما بتحصل حد عنده خبره فيها.. أما هدرز الوكاله.. مصنوع لمطابقة المواصفات الرياضيه لأن من أحد خواص المايفك الرئيسيه هي التحكم بمستوى تدفق الغازات من المكينه ودخلوها بطريقه تخلتف عن غيرها من المصنعيين..

من أخ لأخ.. تبي نزود.. (حاول) إدورلك على High Flow catlike converter اللي يكون بعد الهدرز تحت الجير

بس يكون ماركه مو تفصيل.. بيخفف الضغط وينفس عن المكينه شوي.. وكذلك بيعطيك حس حلو


أدري طولت عليك وعلى الإخوه.. ما ودي تطيح في نفس غلطتي..

تحياتي

مرحبا
اولا مبروك اخوي بي ام على الموتر مقدما والله يعطيك خيره ويكفيك شره

ثانيا هلا اخوي ديث
بخصوص الهدرز الصراحة انا مخترش وابغي اسمع لها حس وحاليا مب ناوي لاكن عقب ماتطوف العشرين بعزم على الهدرز
والحين حسها اوكي خاصة بعد ار بي ام 3 حس المايفك اظني
وعن الفلتر ليش خربلك السنسر؟؟
وعن السوبر انا مابغي تزويد قوي ابغي خفايف مثل هدرز وفلتر ويوني جب
وحصلت كراج فالشارجة اسمه التحكم وقالي يفصل وشكل شغله نظيف مادري اذا تعرف الكراج ولا لأ
ومشكوور الغالي وماقصرت على المعلومات المفيدة

شكرا للاضافة اخوي الخل الوفي
لاعدمناك

ههههههه
أقول ... بدينا نغلط! :D

بس حبيت أضيف إضافة، بخصوص الهمر H3
الهمر H3 فيه جميع التقنيات الموجودة في الباجيرو، تماماً. إلا أنه محركه أضعف بكثير، وربما صرفيته أسوأ أيضاً.

على البركه إن شاء الله أخوي بي أم..

ألف مبروك مقدما..

هلا أخوي رالي..

هدرز وإكزوز جاهز (ماركه يعني) قلبت الدنيا أيامها وما حصلت.. حتى إني راسلت بورلا (Borla.com) وما طلعت بنتيجه معاهم

بعدين رحت إكزوز الخليج اللي كان في الراشديه الحين إنتقل بس ماعندي فكره وين وفصلي كات باك وبعت فتره خذت دبات نوع American Off-Road من عند رامي (اللي يجيك بعد الحبتور) وكذلك الفلتر نوع K&N داخلي لأني لو كنت بركب فلتر تفصيل كنت لازم أخرم لهذا خذت فلتر داخلي

بعدها رحت فوكس وكان عنده هدرز ولكن سعره مرتقع شوي بحدود الـ 3,500 درهم

ولأني كنت عارف مسبقا إني ما باخذ نتيجه طيبه فقلت حرام.. وبالصدفه واحد من الشباب حصلي ياه مستعمل على 1000 درهم

الكات باك كلفني 2000 درهم والفلتر 240 درهم والدبات عدد 2 كلفوني 700 درهم (يومها عرفت ليش إمسمينه رامي الحرامي)

ولكن نصيحتي لك: إنك تخليه وكاله.. هدرز المصنع للـ 3.8 أصلا يجي رياضي وكذلك الكات باك..

اللهم الدبات لو بتغيرهم وما أفضل بعد تجربتي..

الفلتر الداخلي.. عطاني بحدود الـ 4 حصانات ولكن خربلي الـ Mass Flow Sensor

طبعا وايرات وبلكات.. إنسى إنك إتحصل لأن الباجيرو يجيك كويلات

كنت ببرمجه ولكن المحل قالي على ضمانتك أنا مو مسؤول لو ما عطاك أكثر من 10 أحصنه فتراجعت وخليت الأمور كما هي عليه

نصيحه من أخ.. خليه وكاله أبركلك..

لو ناوي تخربها.. دزه سوبر ماركة Eaton.. واحد من شباب الراشديه عنده كبسول 3.0 فضي دازه سوبر.. عطاه في حدود الـ 450 حصان

إنت ما سألتني على الأسعار بس قلت أفضل أخبرك حتى تكون عندك فكره شامله

ختاما تقبل حبي وتقديري لك ولكل الإخوان

الاخ الكريم ( دث لايك) والاخ الكريم( رالي) لكم مني كل الشكر والتقدير
والشكر موصول لكل الاخوة المشاركين في الموضوع
ماقصرتو كفيتو ووفيتو
وبعد الاستخارة عزمت اني انتظر موديل 2008 واتوكل على الله وآخذ 3.8 والله يعطينا خيرة ويكفينا شرة

هلا
والله ياخوي بي ام اذا بتاخذ خذ ال3.8 ومابتندم ان شاءالله

وسؤال لك اخوي ديث شو نوع الهدرز اللي ركبته والفلتر
وهل هو تفصيل ولا جاهز
والسموحة

كفيت ووفيت رحم الله والديك
في انتظارك
تحياتي

واللهي الأسعار بالضبط.. إن لم تخني الذاكره:

3.8 ربع فل بـ 114,000 وهذا اللي يجينا فقط

3.0 رقم 2 ويفرق عن رقم 3 إنه مع ABS و CD Changer بحدود الـ 90,000

أما الطويل:

3.8 فل مع Sound System Rock Ford بـ 129,000
بدون النظام السمعي المذكور بحدود الـ 124,000

أما 3.8 طويل بدون فتحه + جلد + زنون (لأنهم يعتبروا إضافه واحد) بحدود الـ 112,000

الأسعار مو متأكد منها.. ولكن عطيني مهله اليوم فقط وبسألك.. فالك طيب..

اخوي Death_Like باركالله فيك
ممكن تعطينا اسعر الفل اوبشن للربع والاربع ابواب 2007 او 2008
تحياتي
سوال ثاني
هلي يجي اربع ابواب 3.8 ستاندر(سياحي) مع اتومتك قير + مثبت سرعه لان اهم شي عندي القوه + مثبت السرعه بغض النظر عن الاكسسوارات الثانيه
تحياتي مره اخرى

الصراحة الموتر عجيييييييب

متأسف نسيت أجاوب سؤالك من ناحية البر والخطوط..

من تجربتي للي كان معاي:
على الخطوط مريح نوعا ما ولكن بعد الـ 140 تحسه يحكر صوته يرتفع

أما في البر:

من ناحية التحمل والحراره.. كل ربعي شهدوله.. كنا نطلع صحراء البداير والشله مؤلفه من:
باجيرو عدد 2 (أنا وواحد من الشباب)
رانجلر
كروزر سته
باث فايندر
باترول

من ناحية المقارنه بين القوه.. كان الباجيرو أضعفهم ولكن كان أشدهم تحمل بمعنى إنا كنا ندخل إنقطع ساعتين فيطر الفريق للتوقف لأن مواترهم تعبت ويبالها تريح (العزم يخف) ولكن أنا وربيعي في الباجيرو كنا نلاحظ إن الأمور تمام والعزم عال العال

القوه.. يشيل عمره ويضرب إندود ولكن أقصر بمسافة من الباقيه
تعليقه مستقل وهذه نقطه لصالحه (في البدايه تعبني من كثر التغريز ولكن شوي شوي يوم عرفت له صرت نادر ما أعلق)

على فكره.. يمكن ما تصدق ولكن قلصت فيه كل من: الكروزر سته والباث والباترول..

السياره الوحيده اللي حاولت أقلصها وما قدرت أزحزحها من مكانها هي الجمس سيرا بس الحمد لله أنا ما غطيت..

أرجع وأقولك.. توكل على الله وخذ الـ 3.8