لسكان المنطقه الشرقيه؟؟؟؟؟؟؟؟؟ فقط

اخي لو الحكومه ما تبغى تفتح باب لو سوت الحكومه اللي قلته انت بكره بيجيك اللي يبي يسوي سباق ناسكار او فورملا وبعدين عندنا في السعوديه نا س همج صراحه تحس انهم مش حق الشغلات هذي لكن اخوي انا اذكر محمد بن سليم الاماراتي طلب من السعوديه تنظيم رالي على مستوى الول العربيه وتم رفض الطلب .
لكن اخوي لا تيأس عندك في البحرين مثلا تنظيم سباق قومات رسمي وفي الكويت ايضا ميدان الصباح للربع ميل وهذا الميدان خاص للقومات وفي الامارات ايضا ومتى ما حسيت بالشوق للشغلات هذي روح هناك واستمتع واما هنا عندنا اغسل ايدك منهم هنا بس حق يركب السياره ويرز ويكشخ ولو يدوس الابنص بقوه ما عرف يتحكم في السياره وعلى فكره انا عندي زميلي عنده ليغاسي بكس حاول يعبثها هنا في الدمام بس ما لقى لها قطع وكل الشباب يتهربون منها وراح فيها الامارات وركب لها تيربو msd وغير الدسك والكلتش يا شيخ السياره صارت ما شاء الله صاروخ .
تحياتي للجميع....... .

ههههههههههههههههه
تسلم والله ونستني بالكلام دا .....بس عندي اقتراح مو لو كان يوجد نادي لنا للسرعات والقومات وغيرها ومكان حق الجمهور .... وسيارتين اسعاف ...لاتغير الوضع ؟؟؟ والله ويش رايك ؟؟؟؟

اول كانت زحمة العبث متركزه في الخبر لكن الان حتى في الدمام لكن على شكل عروض ما فيه جديه في الموضوع وهي شلون بدت في الدمام انا اقولك
اول لما كنا نتجمع في الخبر تجينا الدوريات واحيانا حتى هيئة الامر بالمعروف لانه لا اخفيك الامر كان من بين الموجودين بعض الشباب الله يهديهم سكران ويوصل البلاغ للشرطه ويجون بعدها على طول يحصل تفتيش ويسكرون مدخل ومخرج الساحه ويا ويل اللي يلقون عنده شي او سيارته مخالفه وكان عندنا بعد يعني نجيب ويانا اعز الله الجميع كلاب دوبر وغيره للعرض طبعا بعدها بدأت فكرة التجمع في ساحة جزيرة المرجان وهالكلام يحصل تقريبا الساعه 4 الفجر وبعد كانت الدوريات تطاردنا واللي يشوفونه لابس كبوس يفتشونه وعلى هالحال بين ساحة العبث في الخبر وبين جزيرة المرجان في الدمام طبعا الكلام هذا قبل لا يحطون الصبيات اللي في مواقف حديقة المرجان هاه وشوي شوي الى ان وصلت الشغلات هذي القطيف وسيهات لا وبعد الان فيه ورش للتعبيث والتلغيم حتى في بقيق بس ما احد يدري عنها وبالحجز. طبعا هذي اسرار لكن قلت اقولك منها عشان شفتك متحمس شوي .
تحياتي للجميع وبالاخص ليجاسي

الأشعث تسلم على الرد وانا باشوف دا الموضوع صحيح ...بس شكله عندكم في الخبر مو عندنا يعني في سيهات والقطيف ؟؟؟؟؟ والله ويش رايك

اخوي تأكد ان السالفه صحيحه ميه بالميه لاني فعلا مجرم سيارات لاني كنت اعرف الشباب اللي ذكرتهم لك طارق هذا لهم شركة سنام للمحركات اذا كنت سمعت فيها
ومخيمر من سكان الدوحه وكان من اللي يعبثون السيارات كانت عنده سوبرا 85 حق العرض بس وكان مجنون تفحيط وهو من رواد الدبابات السبيار اللي يسمونها بعض الجهال 1100 لانهم ما يعرفون معناها اصلا ومخيمر كان يشتغل على السياره في كراج بيتهم والدبس 24 ساعه رايحين جايين واحنا موجودين عنده داخل والرجال مجنون دبابات الله يذكره بالخير حتى الدبابات الهارلي والشدو هذي ما كانت موجوده اخوي الا قليل جدا عند بعض الامريكان بعدين اخذ وكالتها المطلق وبعدها صارت عند من هب ودب حبيبي الكلام يطوووووول وانا اكبر منك بواجد ذيك الايام كنت انت شكلك صغير واخوانك يمكن مالهم احتحاك واجد بالشباب على العموم ان موجود وعلى فكره انا كان عندي سوبرا لون مميز يعرفونها شباب ذيك الايام سوبرا لونها ازرق فاتح ما في مثل لونها بالشرقيه الله يرحمها كلت العافيه مني واكثر الشباب اللي كنت اعرفهم بعضهم التزم جزاهم الله خير وانا احمد الله على كل شي.اخوك الاشعث

الحقيقة عمري انا ان شاء الله داخل 23 سنة بس ذي اول مرة اسمع بها مع العلم ان كل اخواني مجانين سيارات وكم سيارة لعبو بها بس هذا الشي توني اسمع به بس الي خبري به مو الى اهناك الا عاد السرعة والغضب صار حقيقة ؟؟؟؟؟؟؟الفل اقصد ..
بس كيف كذا انا اطلع قومات وانت ذكرت التوقيت حتى احيانا تكون مشاكل في مباحث تجي في الموستنجات ما تعرفهم ويصيدون يعني اذا كذا السالفة فيها ان ...والله توني اسمع صار لي الحين من يوم كنت بو 17 سنة اشوف القومات بس ما لاحظت ذا الشي ؟؟؟ على العموم نفسي تصير السالفة مو حقيقة يعني تكون خيال ويكون اللعب شريف ومحترم .... وتسلم يا الأشعث ((شكلك مجرم سيارات )) بس قولي اذا عندك خبرة في تلغيم سيارتي الجديدة لأن سالفة انباح المحرك عقدة اهل الشرقية في السوبارو؟؟؟ تحياتي..

اخوي ليغاسي جزاك الله خير على النصيحه بس فعلا انا خبرتي قديمه في الموضوع تقريبا من بعد خروج صدام من الكويت عام 1991 وانا بعطيك امثله اخوي كنا نتجمع في ساحة العبث بالخبر لان اول ما في احد يتجمع في الدمام ولا في القطيف وكنا نبدأ السهره من بعد الساعه 8 تقريبا طبعا واكثر الشباب كانو فاتحين كبوتاتهم للعرض وكانت فعلا سيارات جنان وكان فيه شباب من البحرين والكويت وانا اعرفهم شخصيا وكان من اشهرهم واحد اسمه طارق يعرفه اللي كان من رواد الساحه في ذيك الايام وواحد اسمه مخيمر طبعا هذا لقبه وايضا كان فيه واحد من الشباب خبرته في المجال هذا من امريكا يطلقون عليه لقب حسن شنبر اذا كان احد سمع فيه وكان اول القومات على اصولها ولا تبدا الا بعد الساعه 2 قريب الفجر عن عيون الدوريات وفيه حكام وشهود مش بس قاوم عند اشاره وبس وقبل القومه يروحون اصحاب السيارات يغيرون السيور ويبدلون اسطوانات الغاز النيتروجين والله اذكرها ذيك الايام والبواجي بعدها تصير القومه والاستمارات او الفلوس تكون عند الحكم وتكون القومات على حسب المسافه لكن هذي الايام قلت المواضيع هذي تشوف الواحد مركب هيدرز وملغم وحالته حاله بس يخاف يقاوم قومة رجال لانه خايف على سيارته وانت يا اخ ليغاسي شكلك صغير السن ما لحقت على ذيك الايام او انك ماكنت تدري شالسالفه اذا في احد هنا من المخضرمين يتكلم رجائا
تحياتي

الأشعث ... في احد يراهن في الشرقية بالقومات فلوس وغيره ؟؟؟؟ توني اسمع ؟؟؟
على العموم اذا كانت في هذي الأشيار ارجوا من الأخوة الكرام عدم العمل بها ((حرام))
ولا تتجاهلون قد تاخذ الفلوس تاكل بهم او تعدل بها سيارتك بتروح فيها هذا ترى اعظم من عين الحسود يا شباب ..... توني اسمع والله العادة انا اقوام وان خسرت اوقف ابرد المكينة وامشي لا فلوس ولا شي ثاني ....

اهلا وسهلا فيك اخوي
شوف زي ما قال ليجاسي اذا سيارتك الله بالخير لا تجي ترى بيضحكون عليك لان الصراحه هنا في الشرقيه خبرتهم في هالمواضيع غزيره ممكن يكون جده اكثر شوي بحكم كبر مساحة جده لكن العبره مو في الحجم انما في المضمون والجوهر انا بد لك على اماكن التجمعات حبيبي
1 كبري سيهات زي ما قال اخوي ليجاسي
2 مرسى القوارب في كورنيش الدمام في المواقف
3 قدام شوي ايضا عن المرسى في الجهه الاخرى
4 كورنيش الخبر عند مجمع المطاعم الامريكيه
5ساحة القلعه في القطيف بس هذا المكان جنان بتحصل اشياء تشيب راسك من جد
6 بداية كورنيش القطيف بعد الدروازه بشوي
ملاحظه : اما بالنسبه لاماكن التعديل فعندك محل مو صاحي داخل الدمام عند فندق الدمام الجديد بالقرب من المعهد المهني على الشارع العام عنده كل شي حتى الشاشات الالكترونيه وبعض اغراض التعبيث والتلغيم وعندك ايضا شارع الملك سعود بالدمام يسمونه شارع تويوتا فيه محلات كثيره.
ملاحظه ثانيه :اما بالنسبه لاماكن التحدي والقومات والفزات فهذا ما فيه مكان معين لان الشغله كيف اول شي يتجمعون في الاماكن المذكوره سابقا واذا كان فيه تحدي يتفقون اول شي على الجائزه للفائز مثلا من استماره او مبلغ مالي وغالبا الاماكن هذي كانت يتقاومون فيها عندك مثلا خط الجزائر بالعزيزيه والخط الساحلي بالخبر او اي مكان . ارجو اني اكون قد وفيت وكفيت واهلا بك في الشرقيه حبيبي وبكل اهل المملكه والخليج .
تحياتي