أخوي هاوي
أن كان عدد عائلتك لا يتجاوز 5 أشخاص
فأشوف الأف جي أفضل من اليوكون
فأنا اشوف أن الاف جي عملي أكثر من اليوكون ولا الفرق شوي
يكفي أن لما تطلع مشاكل بالياباني تعرفها بسهولة اما الامريكي لغز محير علشان تعرف المشكلة خصوصا أن كان كهرباء أو مشاكل بنظام الحقن الوقود
غير أن الأف جي مخصص للبر أكثر بكثييييييييير من اليوكون
يكفيك مكان تصنيع السيارتين بغض النظر عن أسم الماركة
تأكد من أن الي بتاخذه فل كامل فئة FJ2 وراح أعلمك كيف تتأكد
لان الفرق الهوك الخلفي والصاجة الأمامية تحت الصدام و4 ايرباقات جانبية مع الايرباقين الامامية يطلع المجموع 6 ايرباقات ونظام الدفلوك ونظام A-TRAC ونظام VSC للثبات
بقولك سالفة واحد من زملائي يحدثني عن أحد زملائه كان بيشتري يوكون 2006 من الوكالة أو 2005 على وقته ونصحه ياخذ دبل والرجال مزاجة مقفل إلا يوكون بدون دبل يقول ما أحتاج أطلع البر ابيه للعايلة وبس غير فرق المبلغ
بعد فترة من الزمن تندم أشد الندم أنه ما سمع كلام زميله وشرى يوكون دبل
حقيقة جيب كبير بدون دبل مع أحترامي الكبير للي معه الموتر وغير تقليل منهم لكن أعتبره موتر سواقين! أماكن الي بيدخلها بالبر محدوده جدا بسبب عدم قدرته على حمل نفسه بدفرنس واحد لو بيدخل أماكن تغاريز يبلش يبيله واحد طاره وعساه ما يغرز لو يغرز به ما يقدر يطلعه إلا بالسحب
أعتقد ان سعر الأف جي كروزر شوي مرتفع لكن أنصحك أنك تاخذ الأف جي سواء نفس الي لقيته أو تبحث عن غيره أرخص منه ناظر السوق بالأول كيف اسعار الاف جي نفس الموديل ونفس الممشى
بخصوص أستفسارك للتراكشن ماهو؟
التراكشن هو ما يسمى بالتراكشن كنترول
بعض السيارات يكون هذا النظام خاص للانزلاق ولثبات السيارة لكن بعض السيارات مخصص أنه يكون للطرق الوعرة
حيث يقوم النظام عند دخول أماكن صعبة جدا ويرى أحد الأطارات تتوقف عن الدوار والأخر يدور بسرعة يقوم التراكشن كنترول بعملية كبح للكفر الي يدور أسرع من الأخر بحيث يكون كل الجهتين متساوية السرعة بالمشي ثم يقدر يتجاوز الطرق الوعرة بسهولة وهذا النظام يعمل على الاربع كفرات عند تشغيل الدبل الخفيف HIGH
يوجد نظام أخر اسمه الدفلوك ومكانه بالدفرنس الخلفي وهو نفس شغلة الأول تقريبا حيث عند تشغيله يقوم بقفل الدفرنس الخلفي حيث يدور الكفر الخلفي الأيمين مع الخلفي الايسر بنفس السرعة تماما وأدائه أفضل من التراكشن من ناحية أنه ما يتعب السيارة لأن الفرامل ما يتدخل على طول بل يقوم بقفل الدفرنس وخلاص وهو يعمل فقط في الدبل الثقيل LOW
ويوجد زر ثاني أسمه A-TRAC
وهو أختصار لـ ACTIVE TRACTION CONTROL
يقوم بالعمل التراكشن على المحور الأمامي فقط حيث يعمل على الدبل الثقيل فقط LOW
لأنك لما تشغل الدبل الثقيل يقفل تلقائيا نظام TRAC ونظام VSC الخاص بالثبات وتستطيع تشغيله مع الدفلوك علشان يعطي تجاوز ممتاز لأصعب الظروف الوعرة
وهذي صورة الدفلوك الي يرمز بـ RR DIFF LOCK ونظام A-TRAC
وهذي الصورة أن شفت نظام RR DIFF LOCK ونظام A-TRAC موجودة فأعرف أن السيارة فل كامل
توكل على الله ولا تنسى الأستخارة
