أخواني الأعزاء
السلام عليكم ورحمة الله وبركاته
أنا ولله الحمد توني شاري جراند شيروكي موديل 2005 - هيمي 5.7
انا من المعجبين بالشيروكي واول مره يصير عندي جيب وارجو انك تتحملوني على اسئلتي لأني جديد على هالفئة مع اني كذا مره اعزم اشتري وبعدها ارجع في القرار بس هالمره عزمنا وتوكلنا على الله..
1- ناس كثير خوفوني من محرك الهيمي ومن استخدامه وقالوا انتبه منه يبغاله عناية ومن هالكلام يعني كأن عندك جهاز بالبيت مفيد بس يخوفونك الناس من استخدامه لانه يخترب.. هل هالكلام صحيح وهل يحتاج الهيمي بالذات الى عناية وأرجو منكم تقديم النصائح بالنسبة للمحرك؟
2- الموتر وارد امريكا والحمد لله نتائج الكارفاكس لما كان بامريكا جدا ممتازه وأيضاً فحصته بورشة سهم على السستم حقهم حق الشيروكي مع الكمبيوتر وماطلع لي اي خطأ ولا كود سوى كود فصل البطارية في السابق.. كل شي فيه ممتاز ولكن المشكله عندي في شاشة السيارة حيث لايوجد الديفيدي حق الملاحة وبكذا لاملاحة ولاحتى تعديل للساعة الموجودة بالسيارة لانها حسب كلامهم مربوطه بالاقمار حق الجي بي اس.. سؤالي هل فيه طريقة لتشغيل الشاشة قصدي الملاحة مع خرائط الخليج او على الاقل هل يمكن تعديل ساعة السيارة؟؟
3- آخر سؤال الله يجزاكم خير.. هل يوجد اي نصائح تنصحوني فيها بالنسبة للسيارة يعني كيف اصينها واهتم فيها خصوصا مثل ماقلت لكم اني اول مره اقتني جيب .. علماً بأني مو حق تطعيس يعني لو بروح البر بيكون فقط خوض في رمال وطلوع طعس بشكل بسيط وليس قص وقومات ومن هالقبيل يعني تطعيس عائلي.. فهل من نصائح؟؟ وإذا فيه ورش تنصحوني بالتعامل معها علماً بأني من سكان صفوى بالمنطقة الشرقية فياريت أماكن ممتازة ومو ((نصابة)) بالخبر - الدمام - القطيف.. او اي مكان..
أتمنى ان اللي يرد علي يكون إما مستخدم للشيروكي أو له خبرة عملية وفعلية مع الشيروكي والمثبطين والمحبطين اللي يسمعوا فلان قال وفلان صار له لا يبدون رأيهم بالسلب الله يخليكم ويبارك فيكم... ليس لشيء ولكن اذا كان واحد ماعنده خبرة في الشيء فالأفضل أن لا يعطي رأيه خصوصاً إذا كان شخصي وليس من واقع تجربة..
وأعيد لكم اخواني لاتقيسون استخدام واحد كل يوم بالبر وتطعيس.. أنا لو بروح البر ماراح ادوس السيارة يعني راح بس اسوق السيارة بحيث انها تمشي بدون ما اغرز والدعوة تطعيس عائلي :)
أدري اني طولت بس تحملوني عليمي
تقبلوا تحياتي
