عندي استمـآرتين .. !

FaHoDy @user_84441 · 25-03-2010

يا اخوآن عندي استمارتين لسيـآرتي .. !!
قبل فتره ضآعت استمآرتي و طلعت بدآل فاقد .. الكلام هذا قبل يمكن 8 شهور ..
امس الوآلده تقولي ترا استمارتك حصلتها طآيحه و حطيتها في بوكك !!!
رحت أشيك على البوك .. و احصل استمارتين كلها لنفس السياره ؟
يعني الحين عندي .. الاستماره الاصليه .. و الاستماره بدل فاقد !
الحين اذا فرضاً وقفني عسكري .. طلب الاستماره و الرخصه
أي وحده اطلعها القديمه و الا بدل الفاقد ؟؟
اكيد بدل الفاقد الله من زين السؤال
طيب بدل الفاقد ايهم .. ! يتشابهون مآبينهم فرق ..
و لا تقدر تميز هذي عن هذي .. !
و العسكري مابيمشيها اكيد الدعوه فيها سين و جيم
زي مثلا الهوية الوطنية .. اعلى البطاقة يعلمونك هذي اي نسخه
و ابشركم وصلت الحين النسخه : 4 pb094
وش تنصحوني اسوي .. خصوصاً واني يوم رحت للمرور ذيك الايام
ومن باب تسريع الاجرائات .. دبرت لي ورقة من الشرطه على انها مسروقه
شلون مسروقه و هي في البوك .. !!!
:a1120(82):

Night @user_14595 · 05-04-2010

تم نقل الموضوع من منتدى السيارات العام الى قسم ارشيف الاستفسارات

Rapture @user_151151 · 27-03-2010

بسيطة جدا,,, خلها احتياط الى ان تنتهي

FaHoDy @user_84441 صاحب الموضوع · 27-03-2010

ياسلام عليك يا سيرا .. بيض الله وجهك

SierraGMC @user_187147 · 26-03-2010

انا صارت معي نفس المشكلة

بنسبة للعسكر ما رايح يفرقونها

بس المشكلة عند التجديد ولا البيع

والحل انك تفرق بينهم انضر من الخلف تلاحظ في رقم تسلسلي

البدل الفاقد هي الرقم الاكثر مثلا الاولة 23050654
والجديدة 698857759

فهمت علي

FaHoDy @user_84441 صاحب الموضوع · 26-03-2010

برآآسكم .. انا كلمت لي معقب في المرور <~ يقولها كنه كلم مدير مرور الرياض

المهم قـآلي حط استمـآره في التجوري عشان اذا ضاعت عليك اللي في البوك خلها استبنه

osama007 @user_176727 · 25-03-2010

زي ما قالولك الاخوان
خلي الوضع طبيعي لاتزعل ولا شي خلها احتياط ولايهمك احد
اضحك للدنيا تضحكلك

(غير مسجل) @user_175485 · 25-03-2010

طيب واللي غلطانين بأسمة في الرخصة و حاطين انها تنتهي في عام 1529 ؟؟؟

وش يسوي في نفسة ؟ هههههههههههه

لها ثلاث او اربع سنوات معي ومافي ديرة الا وسافرت لها ومليووووون عسكري شافها
والامر عااااادي

اللي أكتشف الغلط عسكري واحد واخذها يم خوياهـ في التفتيش ضحكهم شوي ورجعها لي

خذ الامور ببساطة ترا الاوضاع دجـــه وانا خوك :bigggrin:

وأحتفظ بالثانية يمكن تضيع كالعادة

2009 كامري @user_191270 · 25-03-2010

يارجال وسع صدرك انت خل عساكرنا يعرفون يقرون الاسامي زي الناس بعدين خاف يعرفون يفرقون بين الاستمارات

وترى مافيها شي وزي ماقلو لك الشباب دور الانظف وحطها واما سالفه تزوير والخوف هذا ماله داعي

عالم تمشي بدون استمارات ومحد كلمهم

FaHoDy @user_84441 صاحب الموضوع · 25-03-2010

ياغوالي .. تصوروها براسكم

يوقفك العسكري و ياخذ الاستماره يشيك عنده في الكمبيوتر

الا ذي ملغيه بيقول انت سارق السياره ..

بتقوله هذي استماره ثانيه !! اكيد الدعوه بيصير فيها تحقيق و مرمطه :(

لو فيه طريقه اقدر من خلالها اعرف ايهن الساريه كـآن الحين ريّحت

هو فيه فرق بين الاستمارتين .. فيه رقم في الخلف مختلفين.. هل اقدر من خلال هالرقم

ارسل رساله sms اشوف المخالفات مثلاً بحيث اعرف ايهن الساريه ؟؟

GLX 2700 @user_175555 · 25-03-2010

خل وحدة معك و اذا ضاعت ولاك معك سبير :)

hayoulek @user_159061 · 25-03-2010

^^^^^
يا بو الشباب اضحك طيب على الأقل
ايشبك مسويها قضية كبيرة .. والله الموضوع ما يستاهل
حسستني انك تعبان نفسياً :smile:

خلاص مثل ما قلتلك اما انك تتلف وحده وتخلي وحده او تحتفظ بالثانية

ولا سمح الله صار ما صار

انت ما عملت جريمة .. ولا انت مزور لا سمح الله

وإذا مره مره تعبان خلاص روح المرور سلم نفسك .. قصدي سلم الاستمارة الثانية

FaHoDy @user_84441 صاحب الموضوع · 25-03-2010

والله مشكله .. مالي خلق ابد زحمة المرور و تحقيقهم

hayoulek @user_159061 · 25-03-2010

انا من رايي حاول تتاكد واكيد تلقى فرق في النظافة على الاقل
واذا عرفت الجديده .. خليها معاك على طول
والثانية .. إما انك تتلفها أو تحتفظ بيها في البيت ((تنفع اذا ضاعت وحده تلقى البديل))

ولا أقلك خلي وحده للوحة الأمامية اذا وقفوك في نقطة تفتيش
والثانية للوحة الخلفية اذا وقفك امن الطرق :bigggrin:

ابو خلود. @user_138684 · 25-03-2010

دامها شبه بعض سيم سيم وما تقدر تفرق بينهم خذ الانضف والثانيه احرقها