أف جي vs باجيرو ربع

انصحك تجرب الموترين في القومة والسرعة والمناورات والعزل الصوتي وتشوف جودة المواد ثم استخر , والله يكتب لك الخير وين ما كان.

ياخواااااان انا في حااااااااااااااااجة جيب باجيروا 2010 او 2009


تكفووووون الفزعه يالنشامااااااا

أنا معاك فيه مميزات آخرى ما ذكرتها ..

مثل 9 سماعات مع أوفر (مضخم ) .. مخرج AUX ..

غير المواصفات الأساسية في السيارة ..

بالنسبة للكفرات ..

لا والله إلا الآن لم أغيرها .. لكن قريب إن شاء الله راح أغيرها .. لانها أنتهت ستحال إلى التقاعد :bigggrin: ..

النوع الي عليها دنلوب ممتازعلى جميع الطرقات من تجربة رمال - جبال وحصيان رادميات وأمطار وأرصفة .. بمعنى يتحمل صح .. وما يحبل مثل الكفرات الآخرى ..

أنا دايم الكفرات الهواء فيها 30 ما عمري زتها أبداً إلى عند التحميل .. ومرتاح فيها .. حتى في البر ٣٠ و أمشي مرتاح بالموتر ..

أنا لم أبحث عن بديل للنوع لكن لو فيه نفس النوع دنلوب و أعرض من الموجود عليها شوي و يركب ركبتها ..


بالتوفيق

.

.

اتفق معكـ بكل النقاط واضن في مميزات اكثر من الي ذكرتها

يعطيك العافية ودامه معك سنتين بغيت اسالكـ

اكيد غيرت الكفرات بس اي نوع ركبت ؟وكيف الموتر معك ازين من اول؟

وين المواصفات الي بالباجيرو الربع ماهيب بالافجي وتقدر تروح لاقرب وكيل العيسائي وتشوف الباجيرو مافيه الا تراكشن ومزعج مرره ويفيد احيان وماضن يتقارن مع الدفلوك والتراكشن بالافجي
لاخفيف الباجيرو وتقدر تمسك خط فيه وتشوف كنه كورلا ولاهو باثقل من الافجي الي هو ارسى واخف بالبر من الباجيرو


في نقاط كثيره لصالح الافجي وماابخس الباجيرو حقه بس الافجي افضل بمراحل

وعليكم السلام ورحمة الله وبركاته ..

اذا بتأخذ الأف جي أتوقع أفضل لــك ..

أنا ما أعرف الباجيرو لكن عندي أف جي منذ سنين أستخدمه .. وماشاء الله ما طلب غير فلتر هواء و بنزين و زيت وسيفون . . :)

أولاً : الرساوهـ و الراحة في الخط في المراتب الأمامية .. الخلفيه لابأس بها متعبه قليلاً ..

ثانياً : خفيف جداً و قوي على الرمل ( يوجد به نظام دفلوك وتراكشن ) .. وثابت على الزفت . .

ثالثاً : الشكل . . هذي رغبه الي بيشتري السيارة .. وبالإمكان تغيير الشكل لانه قابل للتعديل .. وأيضاً الاكسسوارت كثيرة

رابعاً : المكينة قوية وممتازة .. القير جداً سلس وقوي ..

خامساً : جودة الداخلية يشهد الله على أنها صح بلاستيك لكن قوي .. لكن ما عمري سمعت لها صوت ..

سادساً : المراتب ما تدخلها الموية ببساطة في وسط المرتبه ..

سابعاً : أرضية السيارة ربل .. << قابل للغسيل بالماء .. وهذي ميزهـ جداً قوية ..

ثامناً : البنزين مشكلة التانكي صغير٧٢ لتر تقريباً .. اذا طلعت بالبر بعيد لازم تأخذ تانكي احتياط ..

تاسعاً : وهي الميزة الأهم .. توفر قطع الغيار وأسعارها معقوله جداً و وكيل ممتاز جداً في جميع مناطق المملكة ..

عاشراً : هذا الي أقدر أفيدك فيه .. أنا ما أقولك لا تأخذ الباجيرو .. بس عطيتك مميزات الأف جي .. ولا أعرف شيئاً عن الباجيرو ..


الي يقولك ما به رساوة على السرعات العالية تراهـ يكذب .. أنا أمشي حتى الشوكة يعني ١٨٥ كم/ساعه ماشاء الله راسي جداً ..


وبالتوفيق



.


.


.

الـ FJ سيارة رائعة جداً ...

أنا جربت قيادتها لـ مرة وحدة , والله ما شاء الله موتر هيبة وشبابية لأبعد حد ... :smile:

الباجيرو حلو , لكن سمعة وكيله وغلاء سعر قطع غياره وتوفرها وطيحة سعره عند البيع وقلة أنتشاره أمام الـ FJ وسمعة تويوتا الأفضل من ميتسوبيشي في الأعتمادية والجودة الأكثر هي من أسباب أنه أفضل لك الـ FJ !!

وعليك بالإستخارة , والله يكتب لك اللي فيه الخير ...

من قال لك إن الباجيرو الربع ما يجي 3.8

يوجد باجيرو ربع 3.8 لكن موديل 2010 إلى الآن ما نزل واحتمال ينزل شهر 10

وأغلب المواصفات اللي ذكرتها متوفرة بالباجيرو

بل وأكثر ومعروف ان مواصفات الباجيرو تتفوق على الإف جي

وكذلك من قالك ان الباجيرو خفيف بالعكس هو أثقل من الإف جي وأرسى كذلك من الإف جي

وحسب ما قرأت من ملاك الإف جي أنهم يشتكون من إن الإف جي غير راسي على السرعات العالية

عكس الباجيرو الثبات ممتاز ما شاء الله حتى على السرعات العالية

ولد الغلبا اوافقك الرئ في السفر لاني سافرت لمسافه 800 كيلو في باجيرو مو ربع في شاص طويل بابين وصراحه مافيه رسااوه في الخط السياره تلعب اذا في غباار في الخط وهي محمله عائله عاد كيف لو هي فاضيه وعاد كيف لو كان ربع اما من نااحيه القووه فانا اتجاهي راح للباجيرو وخاصه في البر ومن ناحيه الشكل الخاارجي اذا كان انت ميلانك للشكل من ناحيه القووه فا الباجيرو واذا كان انت ميلانك لشكل السياره من ناحيه الرفاهيه في الافجي وهاذا حسب الاذواق مثل ماذكررت واذا كان من ناحيه الشكل الداخلي الاف جي احسن من ناحيه الديكوور .. وهاذا الي عندي .

تحياتي.

انت قارن وروح للوكالتين وشوف وتقدر تجربها قبل ماتشتري

واحب اضيف على النقاط الي ذكرتها

الافجي فيه مواصفان مهيب موجوده بالباجيرو الربع
مثل الدفلوك
والكاميرا الخلفيه والحساسات
راديو ومحرك اقراص مع 9 سماعات

الباجيرو خفيف مرره وماضن يصلح للخطوط لان خفة جسم السيارة لدرجة إن لو مرة شاحنة بجنب السيارة السيارة تهتز

من رايي الافجي افضل




والله يوفقك

السلام عليكم

الموضوع نوقش اكثر من مره وبالامكان استخدام خاصية البحث في المنتدى

اختلف معاك في النقطه الحمراء ولد خالي معه باجيرو ربع يشتكي من الديكور الداخلي والي في الباب كمان والسياره ماكملت 1000 كيلو

نفس ماقال MKNN

إنا بأعطيك رأئي على شكل نقاط والغلبة لمن في هذه النقطة
1- الشكل الخارجي = الباجيرو
2- المظهر الداخلي = الباجيرو
3- قــــــوة الماكينة = الإف جي ( 2010 ) لإن الموديل اللي قبل كان أقل أحصنة
4- الأداء في البـــر = متساويين مع فرق لصالح الباجيرو الربع 3.8
5- الراحة في السفر = الباجيرو
6 - هيبة في الطريق = الإف جي
7- السرعة على الطريق = الباجيرو ( 200 كلم ) الإف جي ( 180 كلم )
8- القوة والصلابة = اعتقد متساويين
9 - سعر قطع الغيار = الإف جي ( اعتقد الفرق بسيط مو مثل ما يظن الكثير )
10 - سعر إعادة البيع = الإف جي
11- جودة المواد الداخلية = الباجيرو
12- السعة الداخلية = الإف جي إذا ما قارناه بالباجيرو الربع
13- عزل الهواء = الباجيرو

هذا ما لدي وهو مبني على معلومات شخصية

وعسى ربي يكتب لك مافيه الخير والصلاح

الباجيرو يتميز بأنه اريح وافضل من ناحية العزل واخف في البر..
لكن يتفوق الاف جي في القوة والعزم والمساحة والهيبة في الشارع ومرغوب اكثر..
الباجيرو صغير جدا وماله تميز يوم يمر جنبك..
ادائهم في البر متقارب مع تميز بسيط للباجيرو لخفة وزنه..

أنا رأيي لك الاف جي..لأنه جيب قلب وقالب..

عندي حاجة ثانيه

مثل ما أنتم عارفين كل سيارة ولها إيجابيات وسلبيات ..

ياليت تذكرون لي إيجابيات وسلبيات السيارتين من وجهة نظركم