السلام عليكم انا توي راجع من وكالة رينو بعد تجربة القيادة لسيارة رينو الجديدة فلوينس
اولاً وصلت الوكالة الساعة 10:45 على اساس ان اقوم بتجربة القيادة
وبلفعل وصلت في نفس الوقت .... دخلت وقلت للموضف انا هنا عشان اسوي تست درايف للفلوينس
وهو الصراحة ما قصر و عطاني المفتاح وقال الى واحد هندي انة يجي وياي يشرح ليي بعض الاشياء ويضمن سلامة السيارة وركبت السيارة الساعة 11
وشباب اعذروني ما في صور ....
المهم السيارة كانت واقفة برة في الشمس ولما بطلت السيارة حسيتها انها بلفعل فرن ... "ما يحتاج اتكلم عن الجو"
ركبت السيارة ومعاي الهندي وكنت انا حران وبديت اعرق المهم "السيارة ماشية حوالي 1200 كيلو"
شغلت السيارة "بلكارت" وكانت هادئة جداً حتى ما تحس ان السيارة شغالة وطالعت ان السيارة مفولة بترول فاقترحت على الهندي اني اروح الى الصخير عشان اقدر اسرع ابها في الطريق واعرف كل شي عنها
يعني من جزيرة سترة الى الصخير ما يقارب 35 كيلومتر يعني روحة وردة يصير 70 كيلو
على كل حال انا كنت حران وحالتي حالة فشغلت التكييف في البداية كان المكيف حار وانا امشي قاعد اسب في التكييف بس طالعت اشوي الا كان الحرارة مالت التكييف مضبطة على 26 "تقول دفاية" ...... انا على طول حولتها الى 15 وصارت السيارة باردة جداً بل المكيف ممتاز جداً .... ادري ناس واجد تهمهم هذي النقطة
الحين نجي الى الثبات والتسارع:
بلنسبة للتسارع الصراحة السيارة تسارعها ثقيل شوي من 0 الى 90 تحسة شوي ثقيل بس بعد كذا السيارة اتصير صاروخ
الثبات:
انا جبت بلسيارة 160 كيلو متر في الساعة وكانت السيارة قمة الثبات .... يعني الثبات اكثر من ممتاز
جودة المواد الداخلية:
انا سبقت وعلقت على الجودة في احد المواضيع .... و احب اقول ان الجودة ممتازة جداً وممكن مقارنتها باودي وفولكس واجن و لايوجد اصوات طقطقة ديكور ولا من هذا القبل ..... ايضاً عزل السيارة ممتاز وما تسمع الاصوات الي في الخارج و لاحتى صوت الهواء اما العزل الارضي فهو جيد وليس ممتاز ... اعتقد ان السبب هو نوع التواير
ومن اناحية الشكل
الخارجي: الاشكال اذواق لاكن انا بلنسبة ليي الشكل ممتاز البعض يمكن ما يعجبة لما يشوف الصور لاكن هذي السيارة فيها شي عجيب لان جمالها يبين على الطبيعة اكثر من الصور
الداخلية : كما قلت لكم المواد فيها جداً ممتازة وراقية وبلنسبة للشكل هو ايضاً ممتاز و يمتلك ابعاد جميلة جداً وعملية ولازم الشخص يركبها ويشوف داخليتها ... وانا متاكد انها راح تعجبة
بلنسبة لتقيمي للسيارة هو 10/10 بلفعل سيارة ممتازة في فئتها وللعلم السيارة من نفس الفئة السعرية لهيونداي النترا و كيا سيراتو لكن السيارة اكبر منهم فلتوضيح ممكن اتقول ان السيارة اكبر من الكورلا لكن اصغر من الكامري يعني صايرة في النص وهذا يبين في المساحة الداخلية في السيارة
اعذروني شباب على التقصير واني ما صورت واذا في اي استفسار او شي انا ما قلتة خبروني
